Sfuei Mensîl Furlan Indipendent
Archivi de Patrie

Il tribunâl che ducj a volevin salvâ… a peraulis

............

Cui tredis di Setembar, il Porton si è sierât. Un porton che si jere viert pe prime volte sul tacâ dal 1800, cuant che Napoleon al veve creadis lis “Giudicature”, po deventadis “Preturis” cu la Unitât di Italie. Passe 200 agns di storie, cancelâts cuntune leç ridicule, pensade – al veve dit il Guvier Monti – par fâ sparagnâ lis cassis dal Stât. Il Tribunâl di Tumieç, soprimût tant che altris trente in Italie, al è rivât insom al cjâf linie. Al jere l’unic che al rapresentave te nestre regjon un circondari che nol coincideve cuntun teritori provinciâl: e se 200 agns indaûr lu vevin dissegnât cussì, al sarà stât un parcè. Al vâl la pene ricuardâlu, a chei che a van indenant a dî che nol coventave plui. Passe 2.430 chilometris cuadrâts, un tierç di dut il Friûl-VJ; 44 comuns, e tancj di chei periferics e montans; doi confins (Slovenie e Austrie); siet varcs, ducj sogjets a fenomens di cuintribant e di imigrazion clandestine; une preson di massime sigurece vierte dal 1992, che il Stât – stait ben atents! – al jere rivât a fâlu costruî, pûr cu la proteste de int che no lu voleve, cu la promesse che il Tribunâl al sarès restât in citât par simpri. Uficis de justizie che a funzionavin tant ben, a jerin svelts a puartâ da pît i procès, forsit masse svelts, e par chest a cualchidun no i lave ben la mignestre. Soredut, al sindicât dai magjistrâts, la ANM, che e à pocât in lunc e in larc par fâ aprovâ cheste riforme – che e lave fate, ma cun criteris obietîfs e cuntune logjiche di font – a ducj i coscj. E po, cuntun displeament di fuarcis che al dovarès pardabon preocupâ chei che ancjemò o definìn politics, tal sens plui plen dal significât. Parcè che, se une lobby e rive a tignî in scac un parlament, doi ministris e un president de republiche – la cort costituzionâl nancje nomenâle -, ben, o sin pardabon metûts mâl.
Di cuant che si à tornât a tacâ a sintî che il Tribunâl al jere di sierâ – o jerin ae fin dal 2011 -, avocats e aministradôrs locâi a son partîts cu la bataie: letaris, incuintris, manifestazions di place, sindics che a àn riconsegnât lis fassis tricolôrs, pugns batûts sui taulins e pugns rivâts tal stomi, cun promessis no mantignudis, zughets di basse leghe e manovris plui o mancul scuindudis.
In chest 2013 si ’nd è sintudis di ducj i colôrs, e si sperave che cul gnûf parlament lât sù a Març al podès cambiâ alc. Sì, parcè che la cuistion – come che o disevin prime – e zire dute ator dai palaçs dal podê di Rome, Cjamare e Senât. Alì, lis leçs lis fasin e lis disfin. E al jere li, che il pês dai nestris onorevui si doveve fâ sintî prime di dut. Ma Rome – si use a dî – e glot dut. Ancje lis bielis sperancis.
Se a dut chest si zontin i zughets che a son stâts fats te nestre Regjon, o sin a puest. Colpe ancje dai cjargnei, no stin a dismenteâlu, parcè che cu la malfidence che a àn viodût fin dal inizi cheste bataie – secont lôr di caste, de caste dai avocats -, no àn di sigûr judât a compatâ un front comun che al doveve fâur pôre a Udin e a Triest. Come che al è stât pal eletrodot o pe cjartere di Tumieç. Cumò a tachin a inacuarzisi, cu lis corsis che a àn di fâ fin te capitâl dal Friûl, dome par fâsi fâ un certificât o spietâ par ricevi la nomine di un aministradôr di sostegn. Cuant che si lu diseve e si lu scriveve, tai agns passâts, la plui part e zirave il cjâf di chê altre bande. E intant chei altris a gjoldevin.
Il tumiecin Tondo, cuant che al jere president de Regjon, al è lât plui voltis a Rome, disint che però il Ministri no lu voleve nancje ricevi. Si varès vût di sburtâ la puarte un tic di plui, no mo? Di cuant che e je rivade la Serracchiani, viodude ancje la fin dal guvier tecnic di Monti e il tant bramât “tornâ de politiche”, la presidente e à cjapât in man la cuistion, pontant sui siei contats a Rome, ma nuie di fâ nancje cheste volte. Cui 13 di Setembar, la leç e je jentrade in vore, mantegnint lis sopressions par ducj i trente i Tribunâi, dome che par vot di lôr si à rivât a spontâ une proroghe par doi agns, fin cuant che lis pratichis no si saran esauridis dal dut. Cemût mai che par Tumieç no è stade concedude? Ben, parcè che i spietave al Tribunâl che al incorpore, vâl a dî Udin, presentâ la domande al Ministeri. Ma Udin no lu à fat, par vie che al à dit che a son plui che organizâts pai varis passaçs e che si saressin rangjâts di bessôi. Ma, di ce che a àn contât in chestis primis setemanis, nol somee propit… Udin, sì la grande Udin, la capitâl da Friûl che però par deventâ simpri plui grande si dismentee dal so Friûl, de sô Cjargne, che e domandave dome une man. Augurìnsi dome di no scuvierzi tra cualchi anut che daûr di dute cheste operazion a jerin ancje lis ambizion di sindics, avocats, magjistrâts e presidents.
Cumò ce sucedial? La flamute de sperance si sta distudant a planc a planc: modifichis ae leç par câs specifics il Ministri Cancellieri ju podarès previodi, baste che il parlament al cjati l’acuardi su chê desene di Tribunâi di ripristinâ. Facil di dî, cuasi impussibil di fâ. Al restarà il referendum abrogatîf, domandât di siet conseis regjonâi. Ma la storie e insegne che, cuant che un porton al ven sierât, par tornâlu a vierzi i vûl il picon. ❚
✒ David Zanirato

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +