✽✽ Pre Checo Placerean al invidave i Furlans a no cedi al sotanisim, o ben a chê sumission no tant fisiche, ma etiche, morâl: une sorte di forma mentis che e varès distrut ogni pussibilitât di autonomie, di politiche, ma ancje di ideâl pal popul furlan. O vin descrit dispès chest aspiet de nestre identitât coletive, replicant cul so contrari, sedi in tiermins lessicâi che figurâts, ven a stâi cul “Mai cul cjapiel in man”, a segnâ inte lote e inte determinazion i elements che a fondin la nestre filosofie di vite.
✽✽ Cumò no sai se pre Checo al pensàs pardabon che il sotanisim al fasès part dal Dna di un popul o se invezit il so al fos un invît fuart, un riclam a no jessi condizionâts. O crôt che, ancje cence volêlu ameti, al crodès che il prin al ves dentri un fonts di veretât, ma che di cheste influence tremende si podès scjampâ, in graciis dal esempli di cualchidun e dal cjapâ cussience dai propris dirits.
✽✽ Cumò però o viodìn un fenomen strani: un pericul, un alarme – ancje justificât par cierts aspiets – di events e vicendis storichis, si trasforme in realtât evangjeliche. Chel che pre Checo al segnave tant che nemì di combati, al è deventât par cualchidun veretât teologjiche: i furlans a son un popul di sotans. ✽✽ Lis surîs a saltin fûr des fognis a propagandâ la malfidence e la impussibilitât di cambiament: ae fin, dut al devente dome une ciertece pietose di faliment.
✽✽ E pazience che chest concet al vegni doprât di chei che a àn vût simpri peraulis di dispresi pai furlans, intindûts tant che popul degn dome di jessi doprât tant che cjar di macel par vueris e fedêl sotan par difindi i confins o, in tiermins plui contemporanis e “politically correct”, figurazion statiche di int contadine, ignorante e provinciâl.
✽✽ No, i sostignidôrs plui incagnîts di chest messaç a son tra i furlaniscj plui convints, i prins a comentâ cun peraulis di fûc lis manovris dal nemì “centralist e italiote”, i prins a fevelâ di tradiment viers cui che al pense, che al resone e che al lote in tiermins che a puedin someâ gnûfs e diviers di peraulis di ordin che forsit a àn za fate la lôr storie.
✽✽ Leons di tastiere tant che si vûl, cualchidun ancje sclet intal constatâ lis dificoltâts e lis fermadis inte difese de Patrie e aflit parcè che chest al sucêt, ma te plui part dai câs, int che e predicje la ritirade, che e perseguìs no l’otigniment de autonomie e de libertât, ma dome la vergognose sensazion personâl di vê predite la disfate.
✽✽ I vêrs sotans, di cjâf e di cûr, a son lôr. ❚
