Sfuei Mensîl Furlan Indipendent
Archivi de Patrie

Il sium dal Friûl al gjenere la “regjon Triest”

Sandro Fabbro

Il  coleghe professôr Maurizio Maresca, che al è ancje president di Alpe Adria spa (societât partecipade di Autorità Portuale di Triest, Friulia e Ferrovie dello Stato), al piture, sul Messaggero Veneto, un senari strategjic, coerent inte sô dimension tecniche ma, par gno cont, no desiderabil par dute la regjon Friûl-Vignesie Julie. Cun finalitâts di dibatiment public e cun spirt franc ma leâl, o volarès oponi, a chê di Maresca, une vision che e integri e che no escludi, intun contest european plui larc, ducj i teritoris dal Friûl-Vignesie Julie.
◆ Maresca al scomence disint: “Si sa che la clâf strategjiche dal Friûl-Vignesie Julie e sarà dade de logjistiche di coridôr (…) e dal sisteme portuâl di Triest cui siei retropuarts…”, che al è tant che sostignî che il potenziament dal puart triestin e des conessions di rêt tra la regjon e il rest dal mont al è no dome cundizion pal disvilup dal puart di Triest, ma ancje dal disvilup dal rest de regjon tant che “retropuart” di Triest, frede “funzion” metude tal puest di un teritori reâl cuntun so non propri.
◆ O fâs un pas indaûr. Dopo vê provât a atualizâ, un pôc di agns fa, cuntun libri curât propri dutune cun Maresca, la vision pionieristiche de “regjon-puint” dal secul passât intai tiermins integrâts di un “puart-regjon”, o ai vuê constatâ che chê prove e je falide. Il risultât, però, propit no mi confuarte sul destin di dute la regjon. La plateforme logjistiche portuâl, cemût che si è vignude a determinâ intai ultins agns – o disarès tacant dal 2016, an di istituzion des gnovis Autoritâts portuâls – e releghe di fat il teritori regjonâl, se al va ben, a un rûl di contor dal puart triestin ma, se al va mâl, a un rûl dome di passaç di trafics di marcjanziis. Mi domandi lis resons di cheste strategjie. Finîts, cemût che o sin, intal biel mieç di un “burlaç perfet” determinât de cumbinazion di diviersis, e no casuâls, crisis ecezionâls (chê climatiche – che e va indenant di tancj agns e che e continuarà , chê economiche finanziarie tacade intal 2008, e la pandemie di cumò), ducj i modei di funzionament de ultime globalizazion – e duncje ancje chei logjistics – a laressin rimetûts pardabon in discussion. Assumi, invezit, senaris leâts a chei modei, tant che une strategjie “necessarie” par dute la regjon, mi pâr no dome falât – intal metodi e intal merit – ma ancje un pôc dogmatic: al come volê picjâ, in maniere vuarbe, il destin di dute une regjon suntun sôl claut instabil plantât intun mûr che al pues fruçonâsi di un moment a di chel altri. Soredut se, su lis cuantitâts futuris di trafic des marcjanziis, su lis liniis principâls, su lis viis mondiâls favoridis, no son tant la Regjon e il guvier nazionâl a decidi ma fuarcis di marcjât e assets gjeopolitics di caratar globâl.
◆ Dulà ise duncje la logjiche? Si pues capî la scomesse – par cierts aspiets, inevitabile – dal puart triestin e de sô Autoritât portuâl, ma che dute une regjon e vedi di ancorâsi a chest destin, al pâr in maniere francje un azart, fat sù, forsit, plui sul vueit di dibatiment e di propueste politiche dal rest de regjon che suntune strategjie crodibile di disvilup economic e teritoriâl. Intal gno ultin libri (“Ecopoli: visione regione 2050”, INUEdizioni, 2021), o critichi chestis posizions dogmatichis par cjapânt sù une che o speri plui laiche e plui vierte al futûr. Cence volê fâ di chê che i disin “transizion ecologjiche” il “gnûf dogme”, ma cjapantle invezit tant che un dispositîf critic e riflessîf par scomençâ a costruî gnovis imagjins e politichis postcrisi, o ancori cheste mê “vision ecopolitiche” a chescj ponts:
• Il model di disvilup portuâl, mercantilistic, globâl logjistic – o, miôr, panlogjistic –, al è deventât un “pinsîr unic” pericolôs.
• Un ent Regjon che si limiti a cheste prospetive – chê che, par estremizâ, o podìn clamâ “Regjon Triest” – al metarès a pericul la unitât de regjon atuâl.
– E je, invezit, une vocazion complementâr di dute la regjon, che e je chê ecosistemiche, che e je basade su cualitât e risorsis internis dai siei teritoris.
• L’agjî in difese e pe incressite dai “servizis ecosistemics”, intal gnûf cuadri globâl e european de “transizion ecologjiche” – cualsisedi robe che e vueli dî –, al è basic intal sens che, in cualsisedi senari di disvilup, al devente inevitabil (lu ricuarde ben l’imprenditôr Paolo Fantoni, in cualchi so intervent resint, su la risorse len).
• Ma cheste vision, se interpretade in maniere ative, e pues ancje cambiâ lis modalitâts di vite, di produzion e di mobilitât, su dutis lis scjalis e in ducj i lûcs de regjon; e pues gjenerâ gnovis filieris produtivis e gnûf lavôr cualificât, stratignint chei tancj zovins che o sin daûr a pierdi.
◆ A son dutis azions che si fasin sul teritori reâl, cun invistiments publics e privâts ben indreçâts e vuidâts. A cundizion però che la Regjon, tant che ent di planificazion e di programazion, e sedi presinte! Filieris economichis plui curtis; realizazion e gjestion di implants di energjiis rinovabilis, doprant i utii par fâ gnûfs invistiments sul teritori; control, incressite e gjestion dai servizis ecosistemics; sigurece climatiche e rigjenerazion teritoriâl, e v.i.: a son ducj programs di une Regjon Autonome!
◆ Se no ju perseguìs la Regjon, a vignaran agjenziis di difûr a fâlu, privatizant ducj i beneficis pussibii: e alore sì, mandi Regjon! Cheste, de “ecopolitiche”, nus pâr une agjende politiche che i pues partecipâ in maniere ative ogni teritori de regjon Friûl-Vignesie Julie. ❚

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +