Sfuei Mensîl Furlan Indipendent
Archivi de Patrie

Il pont su la organizazion sanitarie regjonâl

............

Cancelade la riforme sanitarie che la Zonte Tondo e il Consei regjonâl de legjislature passade a vevin fat buine cu la leç dai 13 di Dicembar dal 2012 (passâ di 6 a 3 aziendis sanitaris e ridefinizion dai distrets, tra i aspiets plui di evidence) e inviament di un procès che si intint di puartâ a finiment tal 2014, cuntune gnove riforme che cumò si son pandûts i principis.
Al è chest il struc dal dissen di leç presentât de assessore ae Sanitât Maria Sandra Telesca vinars ai 27 di Setembar e fat bon in vie preliminâr in chê ocasion de Zonte regjonâl, cun a cjâf la presidente de Regjon, Debora Serracchiani.
La riforme Tondo, e à dit la assessore Telesca, “e jere dome une semplice riduzion dai ents dal sisteme sanitari regjonâl e dai distrets, cence un troi fat insiemi, un studi di fatibilitât, cence une forme di comparazion tra soluzions diferentis”. Telesca e conteste ae leç de passade maiorance di centridiestre ancje une “mancjance di principis e di criteris”.
NOVITÂT. Par ducj chescj motîfs, tal dissen di leç presentât de Zonte, si previôt une “novitât assolude”, ven a stâi “par dute la durade de legjislature, la Consulte regjonâl de sanitât, dulà che si à di favorî il confront costrutîf cun chei che a rapresentin interès tai setôrs sanitari e socio sanitari”. Il document, in sîs articui, al met a clâr i principis e i fins dal riordin, “par lassâ la definizion precise dal gnûf model a un moment sucessîf, tant che risultât dal confront”, e à spiegât Telesca.
REAZION. Nancje di dî che, a pene mandât fûr il test, a son rivadis lis osservazions di Tondo: “L’assessôr Telesca – al à dit -, nus informe che la Zonte de Serracchiani e intint di tignî la sanitât regjonâl a bagnomarie fintremai a une date di destinâ. Al è stât facil prometi riformis in campagne eletorâl – al à zontât – e al è ancjemò plui facil distruzi ce che o vevin inviât. Dificil, invezit, al è cjapâsi la responsabilitât di fâ sieltis. Miôr – al à sierât l’ex president – e je la consultazion cence fin cun chei che a rapresentin interès in chest ambit”.
OBIETÎFS. Dut câs, la riforme sanitarie Serracchiani/Telesca e à scomençade la sô strade e se e sarà fate e aplicade e rivarà dopo 20 agns de riforme che à superât la organizazion in USL par creâ lis sîs Aziendis teritoriâls che si à cumò, e lis aziendis ospedalieris di Udin e Triest, deventadis po dopo aziendis ospedalieris universitariis, e la aziende ospedaliere di Pordenon.
I obietîfs dal progjet di riforme a son metûts in rie al articul 2, e il prin al è chel di meti al centri dal troi di assistence la persone, fasintle part de tutele de salût. Obietîf, ancje, la integrazion dai servizis sanitaris e assistenziâi, la continuitât di cure tra l’ospedâl e il teritori, la omogjeneitât de ufierte, ven a stâi che in ogni bande de regjon i citadins a àn di podê vê sigurade la stesse rispueste assistenziâl. Cu la riforme si à di rivâ però ancje “ae semplificazion dal sisteme istituzionâl e organizatîf”, a “riorganizâ la aministrazion di dutis lis aziendis cuntun model gjestionâl compagn” e, ultin ma no par ultin, “garantî che il sisteme sanitari regjonâl si puedi sostignî economichementri, par mieç de riorganizazion des risorsis struturâls e des competencis professionâls.
MISURAZIONS. La riforme e varà “grande atenzion” pe prevenzion e pal inzornament dai operadôrs, bisugnarà sfrutâ plui che si pues la tecnologjie e doprâ lis funzions al miôr, aplicant propit chês che a conventin (la conformitât), cu la distinzion tra lis prestazions urgjentis e chês che a puedin spietâ. Ancje par chest, e à sotlineât Telesca te presentazion dal document, il dissen di leç al previôt “la creazion di un sisteme di misurazion e di valutazion de conformitât assistenziâl, organizative e cualitative”. Pal assessôr, la operazion inviade de Zonte e je un “pachet normatîf che, cence vê modei fats in partence, al pant il spirt e il metodi de riforme”, che “l’an che al ven o fasarìn sù cence fâle colâ dal alt”.
CAUTELE. Telesca e predicje “cautele”, par vie che si trate di intervignî su un sisteme istituzionâl e organizatîf “che al è considerât di ducj un sisteme di ecelence e che al è in ecuilibri dal pont di viste economic”. Inalore, “chest dissen di leç nus permet di studiâ dutis lis variabilis, partint propit di une definizion clare dai principis e dai obietîfs e vint a clâr la mission di une istituzion publiche: garantî a ducj i citadins – e à sierât – il dirit ae salût e al benstâ cence che chest al dipendi dal redit e dal puest dulà che si è a stâ”.
TICKET. A Setembar, la assessore ae Salût e à inviât ancje un  confront cul ministeri de Economie a Rome par cirî di mudâ l’impuart dal ticket regjonâl di 10 euros che cumò si paie su prestazions specialistichis, di diagnosi e dal pront socors. “Cun chescj 10  euros par prestazion – e à dit Telesca, dopo il prin incuintri a Rome -, la Regjon e varà di garantî alc di mancul di 13 milions di euros l’an e no 24 milions come che al jere stât imponût dal Guvier Monti”. Il  fat che la cifre e vegni smiezade “al permetarà ae Direzion regjonâl de Salût di proponi a Rome une rimodulazion de compartecipazion dai citadins al cost des prestazions”. In pratiche, si sta pensant di sbassâ il ticket pai redits plui bas e di alçâlu par chei plui alts, “tignint cont, dut câs, che la prestazion dal public no vegni a costâ di plui di chê dal privât”. ❚
✒ Antonella Lanfrit

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +