Il PE cuintri de Pfizer, l’acuardi Sanchez-Macron e i indipendentiscj catalans che a tornin a fâsi sintî

Il protagonisim positîf dal Parlament European (PE), l’acuardi bilaterâl tra Ream di Spagne e Republiche Francese e i segnâi di vite dal indipendentisim catalan. Il principi dal 2023 in Europe nol è dome marcjât, in continuitât cul an passât, de vuere in Ucraine e dal scandul dal Qatargate; vie pal mês di Zenâr a nivel continentâl al è sucedût ancje alc altri, che in part al va daûr di alc che al jere za in vore tal 2022 e in part si presente tant che alc di gnûf.
◆ Ducj i doi chei aspiets si puedin ricognossi inte iniziative de Comission speciâl su la pandemie di Covid-19 dal PE, che ai 11 di Zenâr stâts e à fat buine a maiorance (cul vôt contrari dome dai components dal PPE e di Renew Europe) la propueste, fate indenant di Michéle Ravasi dal grup dai Verts/ALE, di sierâ lis puartis des sedis dal orghin di rapresentance dai citadins de Union Europeane (UE) ai rapresentants de aziende farmaceutiche Pfizer. La decision e je stade cjapade sù par vie che i eurodeputâts de Comission speciâl, cul intindiment di tirâ dongje plui informazions in cont di chel che al è stât il contrat european plui impuartant su lis vacinis anti Covid, che al previodeve la furnidure di 1,8 miliarts di dosis, par dôs voltis, intai mês di Otubar e di Dicembar dal an passât, a vevin convocât il president di Pfizer, Albert Bourla, par vê la sô testemoneance e chel al veve refudât di presentâsi. Cun di plui, la stesse Comission parlamentâr, cul intindiment di vê sclariments in cont dal sô rûl inte negoziazion di chel contrat, e à decidût di domandâ ae presidente de Comission Europeane (CE), Ursula von der Leyen, di presentâsi e di rispuindi ae domandis dai europarlamentârs.
◆ Cumò l’invît de Comission parlamentâr a Ursula von der Leyen al varà di jessi fat de bande de presidente dal PE, Roberta Metsola, che e podarès ancje decidi fâ di mancul di domandâi di partecipâ ae udience. Cun di plui, stant che chê audizion no varès nissun valôr legâl, la stesse presidente de CE e podarès refudâsi di partecipâ, compagn di Bourla, ma nol pararès nuie bon. Par che la revoche ai rapresentants di Pfizer dal permès di frecuentâ il PE e deventi realtât, invezit, la domande de Comission speciâl e à di passâ ciertis proceduris internis dal Parlament. Alc dal gjenar al jere za sucedût intal 2017 cui rapresentants de Monsanto dopo che la multinazionâl si jere refudade di partecipâ a une audizion parlamentâr. Tra la fin di Fevrâr e i prins di Març si viodarà cemût che e larà indenant la cuistion. Cun di plui, chel stes contrat cun Pfizer al è ogjet des investigazions dal Difensôr Civic, de Procure e de Cort dai Conts de UE, che a àn za rilevât che chê negoziazion no je stade fate daûr des proceduris “standard”.
◆ Ai 19 di Zenâr stâts, a Barcelone, il premier spagnûl Pedro Sanchez e il president francês Emmanuel Macron a àn firmât un gnûf tratât di colaborazion tra i doi Stâts. La iniziative e à chê di rinfuartî la cooperazion bilaterâl, e va daûr di un acuardi sù par jù compagn che il guvier di Madrid al veve sostscrit cun chel dal Portugal ancjemò tal 2021 e une des sôs previsions plui inovativis e je chê de partecipazion, almancul une volte ogni trê mês, di ministris di ducj i doi Paîs aes riunions di guvier a Madrid e a Parîs.
◆ La rivade di Macron in Catalogne e je stade ancje la ocasion pal indipendentisim catalan par palesâ la sô volontât di lâ indenant cul percors di autodeterminazion, sei a nivel istituzionâl, cuntune declarazion dal president de Generalitat, Pere Aragonès, sei a nivel popolâr, cuntune manifestazion publiche inmaneade de Assemblee Nazionâl Catalane. ❚