“Il spirt de candidature di Gurize e Nova Gorica a Capitâl Europeane de Culture al à scjavaçât mûrs e confins, teritoriâi e mentâi, par cressi ducj insiemi: lis citâts ma ancje i lôr sistemis di riferiment”: cun cheste intenzion, il sindic di Gurize Rodolfo Ziberna al spieghe la volontât di fâ in mût che il 2025 al deventi une grande oportunitât pe ufierte turistiche di dute la Regjon e de zone slovene fin a Lubiane, metint dongje – in rêt – lis ecelencis dal Friûl-Vignesie Julie e promovintlis dutun.
◆ Par chest, i sindics di Gurize e de sô ex provincie e chei di Aquilee, Cividât e Dael, che a vevin sostignude formalmentri la candidature di Nova Gorica e Gurize a àn decidût di meti a disposizion la struture par mandâ a ducj i Comuns un cuistionari. In chest si domandarà di indicâ i events plui impuartants che a vegnin inmaneâts, i spazis disponibii pes iniziativis Go2025, i sîts di interès turistic e une sintesi de storia di ogni paîs. Dut par condividi une programazion unitarie di promovi traviers dai imprescj che la prime Capitâl europeane transfrontaliere de culture e varà a disposizion, e par insiorâ lis pussibilitâts di visite pai turiscj che a rivaran. Chest si slargjarà, po, a jevât fin a Lubiane e a mont fin a Palme, a Triest, a Pordenon, a Udin e ancjemò a altris.
◆ Il Gect, il grup di cooperazion transfrontaliere, adun cun Zavod – braç operatîf dai doi Comuns – al metarà a disposizion une persone par tirâ dongje dutis lis informazions e par integrâlis: al covente ancje jentrâ in contat cun dutis lis categoriis economichis par coordenâ la ricetivitât, lis informazions su viabilitât e traspuarts: il lavôr al è cetant, ma la ocasion e je di chês di no pierdi. Ancje parcè che rivâ a fâ scuadre jenfri ducj i Comuns dal teritori al sarès un tesaur impuartant ancje pal avignî. ❚
Fâ scuadre pe promozion integrade di dut il Friûl e mieze Slovenie
