Sfuei Mensîl Furlan Indipendent
Archivi de Patrie

IL NUMAR – Lenghe: un-doi al barbuç

............

Juste che o jerin daûr a sierâ il numar, a son rivadis dôs notiziis, une piês di chê altre, in cont de lenghe furlane.
La prime, chê di une gnove riduzion des risorsis economichis destinadis dal Stât pe leç 482/99 su la tutele des minorancis. In pratiche, il tai al è di metât dai contribûts: dai 5.617.000 euros dal an passât, cumò i bêçs a saran 2.274.000 euros. La part pal Friûl si ridusarà a un tierç: di 1.169.677 a 452.602 Euro.
In gjenerâl, di trate pardabon di un azerament de leç di tutele che si jere inviade cuntun stanziament di 10.600.000 euros intal 1999, cumò ridusûts a 1/5. Scjafoiament ae taliane vie, insome: par devant a peraulis si fasin bogns i dirits, par daûr si ju dinee no metint un carantan par atuâju.
Par dî la veretât però, la Italie e rive a dineâ i dirits ancje midiant des leçs: di fat, chê altre brute notizie e je che la Cort Costituzionâl e à fat bogns scuasit ducj (5 su 6) i rilêfs costituzionâi metûts dal passât guvier di çampe sul cont de gnove leç regjonâl di tutele des lenghis. Une sentence che no nus plâs ma che e merte analizade ben par vie che, se e à za dât mani par declarazions antifurlanis, e da ancje par acuisîts elements impuartants, par esempli li che e dîs che «la tutele des minorancis linguistichis e rapresente un principi fondamentâl dal ordenament costituzionâl (…); e rapresente il superament des concezions dal Stât nazionâl sierât dal Votcent» o che lis lenghis (che si ‘nt fevele te leç) a son «un element di identitât individuâl e coletive».
Insome, un «un-doi al barbuç»: di pachis di bande de storie il Friûl a ‘nd à cjapadis, o tornarìn a jevâsi ancje cheste volte. Che il Stât talian al fos centralist e nazionalist si saveve, che i politics furlans che nus tocjin a fossin pôc cunvints ancje (anzit, adiriture se la Consulte e ves fat bon cualchi gnûf dirit a vevin za chê di limitâlu!). Fin cumò o vevin vût doi, trê agns di respîr cun cualchi pas minût indevant. Ma al diseve pre Toni che nissune concuiste che e rive cence lotis e sacrificis no je une concuiste vere e che e dure: duncje, sù i vuantons di boxe, e in vuardie.
Dree Venier

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +