Lis votazions par elei il Parlament european dai 6 e 7 di Jugn stât, e i resints atacs de bande di cierts ministris dal guvier Berlusconi ae regjons a statût speciâl, e aduncje aes sengulis realtâts di autoguvier presintis vuê in Italie, nus dan la dade par cualchi riflession sul cont de dimension europeane e des autonomiis regjonâls.
Un teren li che lis autonomiis regjonâls a varan simpri plui di impegnâsi al è dal sigûr chel de «Dimension Europeane» come dimension vuê fondamentâl e naturâl, in contraposizions ae Europe des «grandis» patriis. Su chest cont, al baste pensâ ae impuartance davuelte des associazions sore regjonâls a nivel european, come la Alpe Adria, il Comitât di iniziative des Regjons dal arc alpin e inmò la Arge-Alp.
E je vere che i faliments seguitîfs des cunvignis europeanis, la intese contrastade e variementri valutade su la Europe verde, la situazion finanziarie pesante de Comunitât, lis previsions crudis e pessimistichis pandudis di bande di impuartants statiscj, a semein rindi debule no dome la atuâl costruzion europeane, ma inmò plui debul il tentatîf regjonalist che si sta impegnant par dâ un fondament plui sintût, parcè che plui dongje aes popolazions, a une vere unitât economiche e politiche de Europe.
Dut câs, al è ancjetant vêr che un progjet preliminâr dal tratât che al istituìs la Europe, fat bon come ultin at dal prin Parlament european elet a sufragji universâl diret, al ripropon in tiermins organics, pardabon sorenazionâi, cheste sfide storiche intun mont dulà che i centris di comant a son simpri plui lontans di nô, ma a influissin cun simpri maiôr pês su di nô.
LIS REGJONS FONDE DE EUROPE_ Tal cjapitul che al trate in maniere specifiche de «politiche regjonâl», si sosten che la Union «e esercite une competence concorint in materie di politiche regjonâl» e inmò che «la Union e sviluparà il cuadri european pes politichis di asset dal teritori e e metarà in vore programs speciâi pe promozion de cooperazion regjonâl transfrontaliere, elaborant programs integrâts propis, in colaborazion cu la popolazion interessade e cun siei rapresentants».
Vadì che al è di augurâsi che i membris direts de Europe in avignî a sedin lis stessis Regjons, ma soredut lis Regjons «storichis» come il Friûl, il Tirôl e la Catalugne. Un tant al impon, a plui lungje scjadence, une profonde trasformazion de struture e des dimensions atuâls dai Stât nazionâi storics, e la lôr ristruturazion in «Grandis Regjons». Cun dutis lis dificoltâts e lis complicazions, la Europe comunitarie e divente aromai la vere dimension dulà che si misurin e si confrontin lis politichis e lis economiis.
Naturalmentri, une Europe di cheste sorte e scugne jessi par fuarce plurilengâl e multiculturâl. Chescj concets a valin denant trat pal recupar e pe valorizazion des lenghis maris des minorancis «storichis» europeanis, ma ancje des lenghis e des culturis des minorancis europeanis «resintis», o sei chês dai imigrâts. Cheste tindince e je darest ineludibil. In chest sens, il nestri Friûl al pues jessi un laboratori dabon ideâl.
FÂSI PLUI DONGJE A STRASBURC_ Lis votazions europeanis dai 6 e 7 di Jugn stât, a àn metût a fûc inmò di plui cheste dimension, che nus tocje plui di dongje di ce che dispès o crodin. Al è un teme che al condizione dut e ducj. In chest sens e pues jessi dal sigûr interessant la propueste di vierzi un ufizi di pueste in sede europeane in stât di sigurâ aes nestris assembleis eletivis, e aes organizazions sociâls, lis informazions necessariis e puntuâls par podê cussì cjapâ part ad in plen al procès di integrazion de Europe. O vin di usâ la int a pensâ european, a cressi cuntune mentalitât che e sepi scjavalcjâ lis centis locâls, impegnantsi a cognossi il tant che si fâs sul cont des leçs e des disposizions aprovadis intes istituzions europeanis. Un impegn in chest sens al rapresente il supuest fondamentâl ancje par inviulâ une partecipazion di base maiôr par un progjet concret di Europe che al sedi, denant trat di rispiet, e po di incressite culturâl, economiche e sociâl.
Renzo Balzan
(L)Int Autonomiste / Al esam di maturitât cu lis dispensis sul nestri sît
Dree Valcic
✽✽ E je une grande buse intal percors che planc a planc al è daûr a fâ l’insegnament de lenghe furlane inte scuele. Plui che une buse o podaressin definîlu un gorc che al va a pericul di gloti ducj chei si movin in chest setôr fondamentâl de nestre culture identitarie.✽✽ Si cjatìn di fat […] lei di plui +
L'Editoriâl / Risierve di valôr
Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +
Salon Internazionâl dal Libri di Turin 2023
Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +
COROT. Nus à lassâts Sergio Salvi
Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +
Vuê al è il 3 di Avrîl, si fâs la Fieste de Patrie. Fûr la bandiere dal Friûl! Mandi a ducj i furlans! Buine Fieste de Patrie!
............
Chest an si davuelç ai 16 dal mês la celebrazion che e memoree l’inovâl dai 946 agns de nassite dal Stât Patriarcjâl 3 di Avrîl dal 1077: une date fondamentâl pe origjin de nestre identitât di popul furlan, dal moment che propit cheste zornade e je considerade in maniere uficiâl tant che chê de nassite […] lei di plui +
Glesie Furlane / Grop amîs di pre Toni. Program dai events pal 2023
1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +