“Cori d’Europa”: a Codroip e a Udin
si è cjantade la armonie tra i popui
Si è davuelte la edizion numar 23 dal Festival Internazionâl “Cori d’Europa”, une manifestazion corâl di respîr apont european, ideade e realizade dal Grup Polifonic “Claudio Monteverdi” fin de sô prime edizion. Une rassegne corâl che e à a cûr la condivision de culture midiant dai savês musicâi, stant che cheste art e figure tra i veicui principâi di cognossincis e interscambis tra i diviers Paîs e popui dal nestri continent, e ancje oltri. Inte suaze di une tradizion milenarie, la corâl masculine di Rude e à inmaneât, sabide ai 23 di Setembar tal Domo di Sante Marie Maiôr a Codroip, e domenie ai 24 di Setembar intal Santuari de Beade Vergjine des Graciis a Udin, une manifestazion corâl di doi dîs, di nivel internazionâl. Ospit il Côr de Universitât Cardinâl Stefan Wyszy´nski di Varsavie, direzût di Michał Sławecki, anticipât des esibizions, dutis dôs lis seris, dal “Monteverdi” di Rude tant che formazion ospitant; si cjataran po dopo intal finâl a côrs riunîts inte esecuzion di “O Sacrum Convivium” di Luigi Molfino.
◆ Duncje, programs sacris par chescj doi dîs di vôs riunidis a dâ valôr al sens di fradilance e comunion che la musiche e pues trasmeti, sedi par cui che al cjante, sedi par cui che al scolte.
◆ Il grup polifonic di Rude al à eseguît une sielte svariade, dai rinassimentâi Francesco Corteccia cul “Caligaverunt oculi mei” e Lodovico Grossi da Viadana cu la “Ave Verum”, passant al tart Romantic Nikolaj N. Kedrov fin al nestri Orlando Dipiazza, za lôr diretôr par vincj agns, dal 1976 – an de fondazion – al 1996. Di lui a àn eseguît “Ecce panis angelorum”. Daspò Albert De Klerk cun “Pater Noster”, fin ai contemporanis Ola Gjeilo, cu la famose “Ubi caritas”, e Brian Schmidt cun “Lux aeterna”, intune alternance di periodis funzionâi e ben resonâts, dut sot de vuide di Barbara Di Bert, diretore artistiche dal Grup Polifonic “Monteverdi” di Rude dal Zenâr dal 2023.
◆ Il côr ospit di Varsavie al à rispuindût in maniere positive al invît, puartant ancje chel une scjalute resonade di biei tocs vocâi, sedi de lôr tradizion musicâl – di Cyprian Bazylik insiemi al nestri Giovanni Pierluigi da Palestrina, par tratâ il Cinc e Sîscent – sedi di altris puescj. De Letonie il contemporani Rihards Dubra; inmò di Varsavie Stanisław Włodzimierz Moryto che al è mancjât di pôc; un altri polac dal nestri timp, Michał Sławecki; l’ongjarês che al à lavorât par di dut il Nûfcent tant che compositôr, diretôr e violinist László Halmos; il brasilian Ernani Aguiar e il galês dal nestri timp Karl Jenkins, in plui che un anonim e Ola Gjeilo che al ven de Scandinavie. Un biel torzeonâ par culturis musicâls di tantis bandis de Europe e dal mont, sot de custodie dai sunôrs vocâi de musiche sacre. Une rassegne ben riessude ancje in cheste ocasion, viodudis lis competencis des corâls e la bravure di ducj i coriscj e dai lôr diretôrs.
◆ Il grup polifonic virîl di Rude al esist dal 1976: come che si à dit, al è stât fondât e direzût par vincj agns di Orlando Dipiazza, e a son stadis tantis lis afermazions a concors internazionâi, come a Arezzo e Ravenna tal 1978 e 1979, in plui che a Gurize tal 1982. In ben 45 agns di ativitât continue, a àn sunât pardut in Europe: Italie, Slovenie, Gjermanie, Svuizare, Austrie, Olande, Belgjiche, France, e in tancj altris Paîs, fintremai in Canadà e taiStâts Unîts. A cjantin un larc repertori, tra l’altri eseguint ancje l’integrâl par côr virîl di Francis Poulenc, che chest an a colin i 60 agns de muart. Tra lis tantis ativitâts, o consei di lâ a viodi il lôr sît www.coromonteverdi.it par une disamine esaustive sul lôr cont; e merete menzon la publicazion di vot volums di musiche e cjants componûts e elaborâts dal Mestri Orlando Dipiazza.
◆ Cetant merit al va ricognossût ancje ae corâl ospite dal festival “Cori d’Europa”, il Côr de Universitât Cardinâl Stefan Wyszy´nski di Varsavie. Fondât tal 1968, si è esibît in cuasi ducj i Paîs di Europe, partecipant aes manifestazions corâls plui impuartantis des lôr zonis e fûr, come al “Gaude Mater” di Częstochowa, al “Wratislavia Cantans” di Wrocław e al “Warsaw Autumn”, dedicât ae musiche contemporanie.
◆ Impuartantis lis lôr colaborazions cun soliscj e orchestris, come cu la Sinfonia Varsovia, Orchestra de Radio Polache di Varsavia, e la Orchestre Filarmoniche Nazionâl. A cuvierzin un repertori che al va dal Rinassiment al dì di vuê, e a àn regjistrât ben une dozene di cds.
◆ “Cori d’Europa” al permet di cognossi realtâts corâls significativis par un messaç di pâs e armonie che o vin bisugne di meti in pratiche e di condividi. ❚