ATUALITÂT. Il Ministeri al ordene: insegnâ par furlan!

Doprâ il furlan par imparâ, ven a stâi doprâ la lenghe storiche in gracie dal insegnament veicolâr. Une tesi che no je gnove pai letôrs de Patrie, ma cumò a sostignîle no son i furlaniscj. Lu met neri su blanc la ultime Circolâr mandade aes scuelis dal dicasteri rezût di Mariastella Gelmini, che e da la prioritât te distribuzion dai finanziaments ai progjets che a dopraran la lenghe veicolâr tes scuelis.
“L’ûs veicolâr e contestuâl des lenghis minoritariis pal insegnament dai contignûts dissiplinârs dal curicul tant che la storie o la gjeografie… – si leç tal document dai 23 di Lui –, al à trasformât chês stessis lenghis storichis in lenghis vivis, e al permet che si puedin imparâ in maniere eficace: no si impare dome a doprâ la lenghe, ma si dopre la lenghe par imparâ”.
La cuistion dal insegnament veicolâr vie pal dibatiment su la gnove leç regjonâl sul furlan al veve fat vignî plui di cualchi mal di panze a cierts “difensôrs dal furlan cence esagjerazions”, ignorant chel che in Europe al è calcolât aromai tant che acuisît.
Contestazions cuintri de leç de Zonte Illy che a rivarin a sglavins dai bancs regjonâi de diestre: “Sproporzionât l’ûs veicolâr de marilenghe” al declarà al Gazzettino Luca Ciriani, conseîr regjonâl e cjâf grup di Alleanza Nazionale. A forin contraris ancje Isidoro Gottardo cjâf grup di Forza Italia e adiriture chel che al è a vuê il president de Regjon Renzo Tondo. Cheste volte al è il Ministeri de Istruzion dal Guvier Berlusconi, di Centridiestre tant che chel dal Friûl Vignesie Julie, che le promôf.
Tra i contraris, il segretari de Cgil Franco Belci al declarà al Piccolo “L’ûs veicolâr de lenghe furlane nol è previodût des normis nazionâls”. Po ben, te note, la Direzion gjenerâl pe autonomie scolastiche e ricuarde ancje i dâts di leç che a rindin no dome pussibil, ma ancje doverôs chest insegnament.
E al è alc altri ancjemò sore. Stant che il document al è stât mandât fûr par detâ i criteris par finanziâ i progjets di insegnament des scuelis pal an scolastic 2008/2009 (domandis dentri dai 30 di Setembar, di compilâ in maniere obligatorie par talian e te lenghe minoritarie), al prin pont si segnale aes scuelis il valôr dal metodi Clil (viôt La Patrie di Avrîl dal 2007): ven a stâi, la pratiche “che, integrant la lenghe cul contignût, cul insegnament des dissiplinis par mieç dal ûs de seconde lenghe, e à permetût di frontâ i contignûts cuntun metodi gnûf, origjinâl e plui stimolant”.
Te distribuzion dai fonts a saran “favorîts i progjets che a dopraran la lenghe tant che strument par davuelzi la ativitât didatiche”.
Il ministeri, tal mandâ fûr la sô note uficiâl, al à premetût che tal 2009 si celebraran i 10 agns de jentrade in vore de leç 482, che e à dât “aplicazion al detât costituzionâl e ae normative europeane”.
Redazion