Il “Jazz” in Friûl

Al è pardabon dificil cjatâ fûr lis primis olmis dal jazz in Friûl.
Un gjenar cence timp come il jazz, che al cjape lis sôs lidrîs de musiche popolâr e in fuarce di tantis contaminazions, nol pues jessi insuazât intune date precise.
Ai confins dal Friûl, si pues fâ il non dal triestin Lelio Luttazzi come un dai prins che al à slargjade cheste musiche cussì svariade a nivel internazionâl, come che al è stât pe sô grande cariere.
A partî dai agns Sessante, se no prime, il jazz furlan si fâs sintî simpri plui intes ostariis e tes baleris, in gracie di tante zoventût che oltri ae nestre musiche popolâr, si inzegne intal swing, tal fox-trot, tal boogie woogie e in altris balabilis.
I agns Otante e Novante a marchin la jentrade definitive dal jazz in Friûl, in fuarce di tancj musiciscj che a si son dedicâts par intîr a cheste forme di art, dispès miscliçade cui elements musicâi de nestre culture.
Vuê o vin cetantis realtâts, tra grups, associazions, locâi che a programin rassegnis e seradis jazz in Friûl.
Jenfri lis plui impuartantis, o ricuardìn la ativitât conciertistiche dal Bar Caucigh di Udin, dal circul culturâl Controtempo, di Euritmica, dal Circul dal Jazz Theolinious Monk, dal FVG Gospel Choir e di tancj altris, ducj o cuasi tirâts dongje dal coletîf Jazz FVG.
Cence dismenteâ il fat che tancj musiciscj jazz di nomee internazionâl a vegnin a regjistrâ il lôr disc a Cjavalì, intai studis di Artesuono, direzûts di Sefano Amerio, un inzegnîr dal sun tra i plui amirâts a nivel mondiâl. ❚ ✒ A.S.