IL GRANT LUNARI DAL FRIÛL. Setembar

IL SORELI, LA ATMOSFERE, LA NATURE
Il soreli, bandonât l’emisferi boreâl, al passe l’ecuatôr celest tal ecuinozi de Sierade (22 di Setembar), cuant che la durade dal dì e de gnot e je avuâl e e va indevant a sprofondâ tal cîl dal emisferi austrâl. Moviment e perturbazions atmosferichis che a segnin il passaç de stagjon cjalde a chê frede. Dopo lis bordadis meteorologjichis dal ecuinozi, il clime al tache a fâsi simpri mancul clip e plui temperât, cun zornadis celestis, frescjis e ancjemò soregladis e seris tenaris e turchinis. La nature e tache planc a planc a inmatunîsi e a tirâsi indaûr, i paisaçs si fasin plui dolçs e delicâts. E tache la languide Sierade.
VORIS DAL CICLI AGRARI
Prime part des vendemis, de racuelte di pomis e altris prodots de tiere (come lis cocis), che a viodin impegnâts ad implen coltivadôrs e tancj aiutants. Tai orts al ven controlât il stât des cuvierziduris des jechis (rêts, têls e altris protezions) in spiete des seminis de Sierade; lis feminis a semenin ancjemò salatis, lidrics, rucule, ravanei, valeriane, cauliflôrs, cevolis e spinazis. Tal zardin chest al è il timp plui adat par semenâ gnûfs tapêts di jerbe; il contadin al viôt ancje di sistemâ agadôrs pal miôr disgotâsi des aghis meteorichis in plui, dai ultins sflaçs di jerbe tai cjamps e de coltade di fin Istât dai terens. Tal zovin di lune si traplantin primulis, campanulis, violârs, malvons e digjitâi. Dentri de fieste de Nativitât di Marie (8-IX) i arments a tornin dai cjampeis, ativitât che e pues intardâsi dome fin ae fieste di S. Michêl (29-IX), date segnaletiche de racuelte des coculis e des cjastinis. ❚
Mario Martinis
______________________________
RINGRAZIAMENT AL AUTÔR
Gjavât fûr di “Il grant lunari dal Friûl. Sants, fiestis e tradizions dal cicli dal an” (Pasian di Prât, 2012): o ringraziìn l’autôr pe disponibilitât e pe colaborazion ❚ ✒ Redazion