Sfuei Mensîl Furlan Indipendent
Archivi de Patrie

Cuant che il paron di Terna i disè a Tibaldi: «Nissun mi à mai domandât di intierâ l’eletrodot»

............

Tibaldi intun dissen di Giovanni Di Lena

Al mande lis sôs bordadis vie comunicât stampe. Ancje plui di un scrit par dì: l’ultin, jessût ai 23 di Avost, al è il numar 511. No lis mande a dî a di nissun, ma simpri “in mût franc, muse a muse”. E cuant che o finìs la interviste cuntun – gno malincûr – “viodarìn cemût che e larà a finî cheste vicende”, al mende ancje me: “E no, e je ore di finîle cul ‘starìn a viodi’. Il Friûl al varès di scomençâ a pretindi alc di plui e di miôr par se stes. E finìnle cun chest ategjament dal restâ a spietâ”. Chest al è Alvedis Tibaldi, l’om di Porpêt a cjâf dal Comitât pe vite dal Friûl rurâl, cu lis bataiis tor dal Eletrodot Terna di Udin Ovest a Redipulie. La ultime e je stade chê vinte denant dal Consei di Stât, che cuntune sentence publicade ai 23 di Lui al à blocade la infrastruture, par un vizi di forme. Ormai, però, cuant che i pâi a jerin za stâts plantâts e i cablis eletrics za stâts tirâts.
___
Cumò ce sucedial, Tibaldi?
Al sucêt che o stin lant indenant cu lis nestris azions. Nô o vin fatis une schirie di denunziis e esposcj in tribunâl. Lis denunziis, in prin, dai contadins plui coragjôs e plui zovins, presentadis ae Procure par dispropriazion improprie des tieris, esercitade cun pressions di ogni sorte. Par nô nol è un probleme di eletrodot sì o eletrodot no. Al è un probleme di democrazie e di esercizi dal stât di dirit, e su cheste linie nô si son movûts. O vin domandât ancje ai ministeris competents une indagjin interne e su plui fronts, dopo che che al è sucedût su chê linie di alte tension.
___
Ce domandaiso?
La demolizion dai tors tirâts sù in maniere “furbe”, cjale tu… propite tant che si jere in spiete de sentence. Chest al è il pont. La decision dal Consei e ven cjapade ai 21 di Avrîl, ma e ven publicade in Lui: il 90% dai lavôrs al ven fat in chel arc di timp, svelts svelts, corint come danâts, purpûr di creâ il “fat che al è fat”. E o zonti: cumò che a varessin di tirâ jù dut, o ai za mandade une segnalazion ae Autoritât pe Energjie par che Terna no fasi colâ eventuâi coscj dal lavôr za fat o di dismission de linie in bolete.
Al diseve di plui denunziis…
O vin denunziât subite il compuartament di Terna che e à zuiade la cjarte de pôre: denunzie par procurât alarme sociâl, par vie che e continue a batile sul fat che a saressin stâts black out. Po o vin denunziât la Rai par vê pandût chê gnove cence comentâ e cence meti nissun dubi. Ma o vin subite denunziât ancje il fat che Terna e lave indevant cui lavôrs e i abûs viers i proprietaris de tiere.
___
Di ce abûs fevelial?

Indi ai preparadis tantis di chestis denunziis: i câs di proprietaris che a vegnin cjapâts pal nâs cu lis “imissions in possès”. Duncje, chescj a restin in efiets proprietaris dal teren dulà che ti àn plantât il pâl, però i operaris e i assegnâts al lavôr a jentrin come se e fos une lôr proprietât e cence nancje visâti, e chê opare (il tor) e devente a caric dal paron dal teren, duncje tu âs di paiâ sore lis tassis, tu ti cjatis fra i pîts chescj manufats cun fondis di 300 metris cubics, no tu sâs nuie des conseguencis dal eletrosmog che tu âs sot di te. Nissun ti dîs ce che tu âs di fâ, lis precauzions che si àn di cjapâ in fat di salût… no je cognizion di nuie di dut chest. Dut ce che o contestìn al à a ce fâ cun chestis azions opressivis puartadis indenant abusant dai podês concedûts su chest cantin. Cuntun espost ae Procure di Triest o ai ancje domandât che la autoritât judiziarie e valuti il compuartament de aministrazion regjonâl, che invezit di prudelâ i interès dai citadins e des aministrazions comunâls e à lassât fâ, e tal interès di Terna e à razirât i parês dai siei stes uficis.
Terna e dîs che e à gjavât vecjos implants e liniis che culì a passavin. Insome… e à netât il paisaç.
Intant la gnove linie, come che za si pues viodi vuê, e je cetant impatant… si le viôt di dutis lis bandis, in barbe al concet di paisaç. Po dopo, che Terna e vedi butât jù altris liniis, al va sclarît che si tratave di struturis che a varessin stadis di jessi dut câs butadis jù, par vie che no jerin plui dopradis. Te cjalderie, al è finît ancje un altri colegament che Terna e fevele come se al fos so, ma che pal vêr nol è so: si trate di fîi e pâi des FFSS: e al è dut di viodi cemût che e larà a finî. Po dopo cuant che si fasin cierts confronts, al sarès plui coret meti sul stes plan liniis di potence ecuivalente, o almancul cun funzionalitât compagne. Chi si fâs un confront fra tors di potence dal dut divierse.
___
E sul pericul dal black out?
Ma vonde con cheste bale! Cun ce che o produsìn in Friûl-VJ, tu daressis la corint a dut il Nordest. O vin une centrâl Edison che e je ferme, e che cuant che e ven impiade, se e va ben, e prodûs il 20% di ce che e podarès. No ’nd vin dibisugne.
___
Di dute cheste vicende, ce i daie plui fastidi?
Jo no mi sei fat mancjâ nuie in cheste bataie. O soi lât ancje a Milan, cun doi contadins, par incuintrâ Luigi Roth, il president di Terna Spa. Al à fat rivâ dut il staff di Rome, e nus à ricevût. Alore jo i ai fate la domande secje: “Parcè in Piemont, une linie eletriche simil di 190 km la metês sot tiere e in Friûl o volês plantâ lis tors? Parcè no le soteraiso ancje chi di nô?” Lui mi à cjalât tai voi e mi à dite: “Parcè che nissun mal à domandât!”. Al è in chel precîs moment che jo mi soi sintût un co***. Cjapât pal nâs di ducj i partîts politics che in cierts câs o vevi ancje sostignût pes lôr posizions. Isal ce che si meritìn? Jo di dute cheste cuistion o fâs prin di dut une cuistion di dignitât des popolazions rurâls dal Friûl e di dignitât dal Friûl, par chest o continui a domandâ il rispiet de legalitât e dal stât di dirit.
Ce conseguencis aie puartât cheste sentence?
Un eletrodot simil al nestri jenfri Lombardie e Svuizare al è stât blocât, subite dopo la pronunzie dal Consei di Stât. Biadelore che cualchidun si è sveât.❚
Oscar Puntel

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +