Sfuei Mensîl Furlan Indipendent
Archivi de Patrie

Il gnûf president de Consulte provinciâl dai students: fra i impegns chel pal furlan, ma cun prudence

............


Al è Francesco Cojutti il gnûf president de Consulte provinciâl dai students, l’organisim che al rapresente passe 24 mil students des scuelis superiôrs de provincie di Udin. La sô elezion si è vude ai 10 di Novembar in ocasion de prime sentade plenarie de assemblee che si è vierte cui salûts dal president de Provincie Pieri Fontanini e dal Cuestôr di Udin Claudio Cracovia. Cojutti, che al vîf a Udin e al frecuente l’ultin an alì dal istitût Marinelli, al podarà contâ sul jutori di Paolo Petrucco (vice president dal Stellini) e dal consei di presidence che al è componût dai students Anna Chiara Vigna, Giuseppe Beltrame, Elia Pupil, Giovanni Fabris e Marion Angeli. La consulte provinciâl e met dongje 52 membris, 2 par ogni istitût superiôr des istituzions scolastichis dal cjâf lûc, sparniçadis su dut il teritori. Dongje de riunion plenarie che si davuelç ogni mês, i students de Consulte a animin ancje il lavôr des diviersis comissions tant che stampe, traspuarts, dirit al studi e salût. La Patrie dal Friûl al à intervistât Cojutti par cognossilu miôr e par savê cuai che a son i siei obietîfs tant che gnûf president de Consulte.
Jerial za impegnât dentri de Consulte prime di deventâ president?
Si, chest an scolastic al è il tierç consecutîf che o fâs part e par me al è pardabon un grant onôr rapresentâ la mê realtât scolastiche dentri di cheste situazion. Tai agns passâts o ai fat part dal Consei di presidence e po o soi stât ancje vice president. Se chest an o ai sintût la necessitât di fâ part ancjemò de Consulte e di metimi inmò di plui a disposizion, al è ancje pal docent referent dal orghin Emanuele Bertoni e pai students che o vin condividût cheste esperience.
Cemût aial cjapât cheste nomine?
Le ai cjapade cuntun grant sens di responsabilitât. Di fat, cuant che o ai vût la fiducie des fantatis e dai fantats rapresentants di dutis lis scuelis dal nestri teritori, o ai subit pensât cemût metimi in vore par no deludi sedi lôr che ducj i students che nô o rapresentìn. Dut câs, o riten di vê acuisît in chescj agns lis competencis che a coventin par vuidâ e sei puartevôs de Cps di Udin tignint simpri in considerazion che buine part dal merit dai pussibii risultâts a dipendaran dal sostegn di chei altris membris, sedi inte sede plenarie che dal consei di presidence.
Cuai sono i obietîfs che si è metût?
Tant che prin aspiet o riten che un brâf president al scuen metisi l’oblic morâl di rapresentâ dutis lis istancis che i vegnin presentadis, e al à di sei in stât di fâ sintesi des variis opinions dentri de assemblee plenarie de Consulte. Un altri aspiet une vore impuartant e je la creazion di un ambient di dialic e di condivision che al pues formâsi dome cu la disposizion ae scolte di bande des figuris puartevôs tant che il president e il vice president. Ae fin, i obietîfs personâls a coincidin cul promovi di plui la Consulte e inviâ gnovis colaborazions cu lis realtâts studentescjis dal nord est e des regjons forestis che a confinin cul nestri teritori. Tal detai, o volìn lâ indenant cui progjets di colaborazion cul Consei regjonâl: in proposit, il progjet Studenti in aula che al diven dal protocol firmât l’an passât. Un progjet che al à dimostrât trop impuartant che al è vê rapuarts cu la part interessade diretementi par vê servizis simpri miôr.
Ce rapuarts sono jenfri la Consulte e lis lenghis locâls come il furlan?
La Consulte si è impegnade a promovi la lenghe furlane e e larà indevant ancje chest an in chê direzion. A nivel regjonâl in chescj agns a àn fat part de Consulte ancje diviers students di chês altris minorancis e si sin mots par sburtâ l’orghin di rapresentance in relazion a chestis. O crôt che i plans formatîfs di cualsisei indreçament scolastic secondari di secont grât a sedin pardabon complets, ma chest nol vûl dî no risiervâ spazi a colegaments cu la storie, la lenghe e la culture dal nestri teritori che a puedin dome che insiorâ e rindi plui cussients i students.
di Piero Cargnelutti

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +