Il furlan sul canâl di Youtube Ecolinguist

La lenghe furlane e je rivade ancje sul canâl di Youtube Ecolinguist, che al conte 200.000 e passe iscrits. A colaborâ a un gnûf video che al met a confront il furlan cun altris lenghis dal mont al è stât Michele Calligaris, che al à 37 agns e al è di Romans dal Lusinç. «O ai contatât Norbert Wierzbicki, un fantat polac che cumò al è a stâ in Scozie e che su Youtube al sta daûr al canâl», al spieghe.
◆ Midiant dai videos sul canâl si pues prime di dut vê acès a cors di polac e di cec, ma ancje fâ confronts tra lenghis de stesse famee linguistiche, par esempli tra une persone che e fevele une lenghe slave e altris personis che a doprin altris lenghis slavis, par capîsi.
◆ Cussì Michele al à partecipât a une sorte di zûc. «Pal canâl Wierzbicki al prepare ancje videos li che une persone e spieghe e e à di fâ induvinâ cuatri o cinc peraulis te sô lenghe mari a personis che a fevelin une altre lenghe. Ognidun al à di fevelâ dome te sô lenghe mari e il risultât al è interessant e cetantis voltis ancje divertent». Michele al veve domandât a Wierzbicki se si podès fâ un video che al metès a confront il furlan cul catalan e il rumanç dai Grisons, ma nol è stât pussibil. «Al à rivât a cjatâ la disponibilitât di trê personis che a fevelin par spagnûl – une dal Messic, une dal Uruguay e une de Spagne». Pensant aes reazions che i trê zuiadôrs a àn vût intant che ur spiegave lis peraulis furlanis che al veve sielzût, Michele al dîs che a son stadis interessantis. «Jo o capivi benon ce che a disevin, ma no lôr me. Probabil forsit che cuntun rumanç o cuntun catalan o varès fat plui fature». Tal moment che o vin scrit chest articul il video al jere inmò in preparazion. Cumò o podês pal sigûr lâ a dâ un cuc al canâl. ❚