Une gjarle siberiane in Friûl

Lis speciis di uciei che a rivin intune cierte aree dome ogni tant, di solit cun individuis singui o cun dome pôcs di lôr, a son definidis “acidentâls”. In gjenar a son speciis che si riprodusin e che a passin l’Invier in zonis une vore distantis des areis dulà che a capitin; in tancj câs, a son situazions meteorologjichis particolârs che lis sburtin difûr des rotis migratoriis normâls e che lis fasin rivâ in puescj che di solit no frecuentin.
◆ Ancje in Friûl a son stadis rilevadis desenis di chestis speciis: intal timp, cualchidune di chês – viodût il cressi des osservazions par vie di diviers fatôrs – e je “passade di categorie” e no je plui stimade acidentâl. L’elenc di chês speciis al è dut câs in inzornament continui, di fat ogni tant a ’nt ven cjatade une gnove.
Intal Invier dal 2019-2020 un individui di gjarle maron Lanius cristatus al è rivât in Friûl.
◆ La gjarle maron e à un grant areâl riprodutîf che al va dal flum Ob e des Monts Altai traviers la Siberie, la Mongolie, la Cine, la Coree fintremai al Ocean Pacific e al Gjapon; l’areâl dulà che a passin l’Invier al cjape dentri Indie, Indocine, Cine meridionâl, Filipinis, Arcipelac Malês.
Prime di cumò, la specie e jere stade viodude in Italie dome une volte (fin di Novembar dal 2002, inizi di Fevrâr dal 2003, tes vals di Mortizzuolo, tal comun di Mirandola, basse planure modenese), mintri che in Friûl no jerin stadis segnalazions.
◆ La localitât sielzude de gjarle par passâ l’Invier e je clamade “Cjase di Cosan”, e si cjate inte plane di Osôf.
Un studi fat dal autôr cuntune metodologjie sientifiche oportune, al à permetût di definî che il teritori dulà che si moveve l’uciel al jere di 2,6 etars e che al jere costituît di un prât cun sterps, arbui isolâts e in filâr, di un boscut, di un piçul grup di fabricâts rurâls e di un pâr di stradelis. Par chel che al tocje l’ûs dal teren, il prât al jere la categorie plui rapresentade (83%) e i fabricâts chê di mancul (1%).
◆ Fra i arbui e i sterps a jerin il pôl Populus nigra, il vuar Fraxinus ornus, la olmesse Ulmus minor, il tei Tilia spp., il pin Pinus pinea, il savût Sambucus nigra.
◆ Cun grande probabilitât, la sielte dal sît e je leade ae presince, in plui de vegjetazion arborie e arbustive, di centenârs di pâi di len e di elements metalics o di plastiche che a coventin par poiâsi, permetint cussì un control totâl dal teritori. Lis gjarlis, di fat, a usin poiâsi in puescj elevâts par tignî di voli la aree dulà che a vivin: chest ur permet ancje di viodi lis predis e di cjaçâ cun sucès.
Il sît in cuistion al è particolâr intal contest ambientâl locâl, stant che si trate di une zone sierade di spaltadis cun cjavai intun stali. I pâi di len e i elements metalics o di plastiche a son propit chei che a costituissin lis spaltadis e che a son de altece preferide de specie cuant che e cjace.
Un altri element che al pues vê influençade la sielte de aree al è il fat che, cuant che e je rivade la gjarle maron, diviersis areis de campagne dulintor – che in maniere potenziâl a varessin podût jessi idoniis –, a jerin bielzà ocupadis de gjarle poiane Lanius excubitor.
◆ Il studi, midiant di dâts cjapâts sù dal autôr intal timp, al à permetût ancje di confermâ la idoneitât dal sît pes gjarlis; di fat, intal periodi riprodutîf, chel al fâs part in maniere regolâr di un teritori di gjarle Lanius collurio, che e je la specie da famee Laniidae (chê des gjarlis) plui comune in Friûl inte stagjon di nidificazion.
◆ La gjarle maron e controlave cun regolaritât dut il so teritori – fûr che il boscut che lu frecuentave di mancul – e e cjaçave insets par tiere, a diference di ce che al capite intai climis cjalts dulà che a son tancj insets che a svolin.
◆ Par ultin, il confront cun ce che al è stât cjatât tal Orient estrem (Malesie e Taiwan), al à indicât che in Friûl la estension dal teritori studiât e je plui grande par vie di diviers motîfs, ma prin di dut, salacor, pe scjarsetât di predis rispiet ai climis cjalts. ❚