Al è stât un dai plui grancj paris de Glesie

Al nas tor dal 347 intune famee impuartante di Stridon, citât che no si sa ben dulà poiâle su la cjarte gjeografiche. Cualchidun al dîs Bosgne, altris Dalmazie o Panonie. La ipotesi plui atendibile e indiche un lûc jenfri Emona (Lubiane) e Aquilee. Culturalmentri Jeroni si forme propit a Aquilee, ma si trasferìs prest a Rome, ancjemò prin di jessi batiât, par seguî lis lezions di gramatiche latine tignudis di Elio Donato, considerât un dai plui grancj inteletuâi dal moment. La culture dal zovin iliric e je fondade sui autôrs de classicitât, massimeme Virgjili e Ciceron. A Rome al fâs une vite disordenade: al studie tant ma al frecuente ancje i ambients plui degradâts: “intal mieç des deliziis di Rome, miscliçât intal bal cu lis frutatis plui zovinis”. Ma prest al sint fuarte la bisugne di une conversion radicâl te sô vite. Al tache a visitâ lis catacombis. Al reste impressionât de vite dai martars e cussì, inte gnot di Pasche dal 366 si fâs batiâ dal Pape Liberi e si sposte a Treviri, intal cûr de Europe, là che al cjape sù la vocazion monastiche. Lu cjatìn di gnûf a Aquilee intun periodi che al va dal 370 al 374. Ma il so spirt stranît e tormentât lu mene intal desert di Calcide, dongje di Antiochie, là che al cîr la pâs cu la vite solitarie, la preiere, la pinitince. Ma intal 378 al sint fuarte la esigjence di progredî inte dotrine, ingomeât ancje de ipocrisie di tancj muinis che si contindevin il primât de santitât. Al impare le lenghe ebraiche, al seguìs a Antiochie la vuide di Apolinâr di Laodicee, al cjape i vôts e al comence a scrivi chê opare esegjetiche e dotrinâl monumentâl che lu fasarà deventâ un dai plui grancj paris de Glesie. Simpri incuiet, al  bandone Antiochie par Costantinopolis, là che Gregori Nazianzenus lu inmaghe instradantlu a studiâ i tescj dai Paris. Al cjape sù la opare di Eusebi di Cesaree, il Chronicon, la storie dal mont struturade su plui colonis, une par ogni popul, cu le linie dal timp che e scor evidenziant ce che al capitave, in chel stes moment, in Egjit, in Grecie, in Asie minôr, a Rome. Une vision cetant moderne e plene di particolârs interessants tirâts fûr di une tradizion milenarie. Cuant che al torne a Rome al è deventât une autoritât, tant che il Pape Damâs, deventât so amì, i da il compit di voltâ la version greghe de Bibie par latin. Un lavôr che lu impegne par plui di vincj agns. Muart il Pape, la Curie romane, invidiose e superficiâl, e tache une opare di distruzion de sô figure, sporcjantle di cjacaris e di babeçs che no vevin nissune corispondence cu la veretât. Chest lu ingomee tant, che tal 385 al bandone la citât eterne par stabilîsi a Betlem, là che dut al è tacât a jessi inte sô concezion profondementri cristiane de storie dal mont. Chi al scree un munistîr e ancje un ospitâl pai pelegrins che a indreçavin la lôr strade viers Jerusalem. Par trente agns al scrîf, al copie manuscrits, al met dongje une biblioteche straordenarie. Al mûr ai 3 di Setembar dal 420. ❚