Il Friûl a “Suns Europe 2023” cui suns de nature di Devid Strussiat

Ancje chest an “Suns Europe”, il festival european des arts performativis intes lenghis minorizadis, al à puartât cun se dilunc di dut l’Istât tancj apontaments musicâi, presentazions di libris e aprofondiments. Tra chescj, l’event plui impuartant, il concierton che ai 14 di Otubar al à viodût esibîsi sul palc dal Teatri Gnûf “Giovanni da Udine” Devid Strussiat, che al a rapresentât chest an il Friûl.
◆ O vin vût la ocasion par scuvierzi insiemi chest talent ecletic de basse furlane, che si è fat za cognossi pal so impegn in progjets di conservazion naturâl, tant che “Aeson”. Chest progjet al è partît dal 2008 de risierve naturâl de Fôs dal Lusinç, par svilupâ tal teritori percors inedits tra land art, art urbane e multimediâl, produzions musicâls, teatri e divulgazion de culture naturalistiche. Strussiat nol è duncje dome artist, ideadôr o promotôr di festivai, ma al è ancje cjantautôr. Di là dal apontament di “Suns Europe”, l’artist si è esibît in diviers festivai in Cjargne e, ai 28 di Otubar, a Codroip par compagnâ cu la sô musiche la serade de premiazion dal “Premi San Simon”.
◆ Intun moment dulà che la nature si ribele, il so messaç al è clâr: «Provìn a fâ di mancul di metisi nô tal centri dal mont, ma viodìn di convivi cul mont ator di nô.»
Lis sôs produzions a metin tal centri lis conessions tra la tradizion culturâl furlane, cetant siore, e la musiche contemporanie, cirint simpri une armonie tra om e nature.
◆ Sul palc dal Teatri Gnûf al à puartât doi tocs, compagnât dai campionaments ambientâi cui microfons dai “TriOrganico”. Tocs caraterizâts dai sunôrs de nature, cun suns di insets, tant che cialis, pudiesis, e ancje l’aiar, il mâr. E al conte: «La nature nus cjacare, nus conte robis… Scoltìnle dentri di nô.»
◆ I componiments di Strussiat a son plui che mai dialics cu la nature, poesiis che a fevelin di jê e cun jê, a dut ce che nus sta ator.
Strussiat stes al è polistrumentist: al sune ghitare, sax, flauts, bas, tar e al è ancje cjantant. Al interprete in clâf inovative lis tradizions culturâls dai lûcs de basse furlane, come chei dal Lusinç.
Al à produsût cinc albums come solist fin tal 2006, e dal 2008 al è insiemi cul coletîf musicâl “i Salici”, e cun lôr al à publicat trê albums, un EP e sonorizazions par diviers documentaris.
◆ “I Salici” a son ideadôrs di “Aeson” insiemi cun Strussiat: al è un progjet ispirât des aghis dal Lusinç, dulà che i components dal grup a son cressûts sunant musiche medievâl, folk, e rock psichedelic o progressîf. «Creaturis maraveosis, i vencjârs. I suns a parin vignî fûr dai boscs. Chel folk-prog psichedelic dai prins agns Setante, ma ancje suns cence timp e cun tante magjie.»
“I Salici” a àn debutât cul album “Nowhere Better Than This Place, Somewhere Better Than This Place” tal 2013, doi agns daspò cun “Sowing Light” e tal Avrîl 2020 a àn publicât il tierç album, “The Eyes Of The Unconscious Riot”: un viaç musicâl che al conte di une trasformazion interiôr che e tache dopo di un sconfuart profont. Une trasformazion che e va daur dai riflès de nature, des sôs stagjons e dal mût che cheste e rive simpri a cjatâ un rinovament.
◆ «Se o vin fûr di cjase une lûs piade e o viodìn une pavee che e zire come une mate, provìn a distudâ la lus, viodìn ce che e fâs che nus sta intor.»
Mai plui di cumò o vin bisugne di conetisi cu la nature «cui voi dal mont», convertint ideis in ats concrets. Devid Struissiat e ducj i siei progjets si animin di chest, lassantsi ispirâ dai arbui: «fasìn rêt, creìn aleancis solidis, stabilis e trasversâls, promovint la responsabilitât individuâl, par fâ sù une societât plui atente viers il ben dal Planet.»
◆ Stait daûr de sô pagjine facebook @devid.strussiat e dal sît http://www.pagefound.com/ par scuvierzi gnûfs videos, instalazions artistichis e progjets in divignî. Lassìnsi traspuartâ de musiche e di chescj suns che nus da la nature par tornâ a conetisi cun jê. ❚