Sfuei Mensîl Furlan Indipendent
Archivi de Patrie

IL FERÂL. Une fieste pe Patrie

............

O pensi che nol sedi popul che nol vedi sgarfât te sô storie par cirî cualchi simbul, cualchi fat, une date particolarmentri significatîfs, emblematics e iluminants vivûts come riferiment di dignitât, di libertât e autonomie. Pal nestri popul lu veve capît benon pre Checo Placerean che al à vude la intuizion di riclamâsi ai 3 di Avrîl come date, a Aquilee come lûc e memorie, al patriarcjât come organizazion, al messâl e Bibie come struments che a dan dignitât al popul furlan.
Al è dal 1977, a 900 agns juscj de nassite de autonomie dal Friûl, che si à scomençât a ricuardâ cheste zornade. Partîts, a prin colp, in pôcs e pal plui ancje sbeleâts, cumò la fieste e à cjapât pît, e je ricognossude e acetade a nivel uficiâl.
An par an pre Antoni nol à fat di mancul di ricuardâ e di rifleti su cheste date che e rapresente un dai moments plui lusorôs e di fonde de nestre storie, no par vivile cun nostalgjie, ma par cjatâ la energjie di cjaminâ e di jessi protagoniscj ancje vuê.


pre Roman Michelotti

O scomet che se si va a domandâur ai oms di religjon, di politiche, di culture e di scuele ce che ur ricuarde il 3 di Avrîl, pôcs o nissun a savaran dâ une rispueste. Epûr in chê zornade dal 1077 al è nassût uficialmentri il ducât dal Friûl, plui cognossût come “Patrie dal Friûl”.
Pe prime (e ultime) volte o vin vude une autonomie che in altris parts de Italie nancje no s’insumiavin, cu lis comunitâts sentadis in parlament a pâr cul predessam e la nobiltât. La tant propagandade “Magna charta” di Zuan Cence Tiere, dal 1215, no leve plui in là de nobiltât. Une istituzion cussì uniche, ancje se tes mans dal patriarcje, e ven definide da l’enciclopedie russe “patriarcjât indipendent laic di Aquilee”.
Une realtât impuartante, determinante, fondante de nestre storie, nassude a Pavie di Milan in gracie di un imperadôr ricognossint, Rico IV, chel di Canossa, e di un patriarcje ghibelin fedêl, Sigjeart, e finide miseramentri ai 6 di Jugn dal 1420, sot des sgrifis di Vignesie ancje par colpe des divisions de nobiltât.
E pûr cheste date no dome no je ripuartade sui libris di storie talians, ma nancje tai nestris autôrs furlans. Nancje tal grant Paschini, ancje se si trate di un fat storic sucedût. Invezit la sflocje di Romolo e Remo ducj si è obleâts a supâse.
Parcè no fevelino di nô? Parcè che no vuelin che nô o esistìn come realtât autonome ben definide. Se no si fevele di un, chei altris a pensin che nol esisti e lui stes al finìs cul dubitâ di sè o di convincisi di esisti dome in funzion di chei altris. Di fat la storie dal Friûl, e duncje il popul, e ven fûr dome in funzion da l’Italie, al pont di fâ dai furlans lis sentinelis, lustradis e dopradis, de talianitât.
Just duncje ricuardâ chest moment. Par dî che o vin ancje nô une storie, une muse, une impuartance, un puest, un alc di ufrî a la grande famee dai popui. Se no vin memorie no vin cussience e duncje no vin avignî. Come cristians, la nestre memorie e cuiste un significât plui profont, sacramentâl. Di fat, tal misteri di Crist muart e resurît, si metìn in comunion cun dutis chês animis buinis che nus àn fat dal ben. Parcè che la messe e je memorie, presince e profezie. In plui o crodìn che la strade di un popul, come chê dai sengui, e je tes mans di un Diu provident e fedêl, che al cognòs e al rêç i timps e i distins.
No ricuardìn robis cussì lontanis par fâlis tornâ. Nol è pussibil e nol è just. Ma dome par tornâ a sintî la gole e la braure de libertât. Une libertât di vuê pai oms e pai timps di vuê. Une libertât che no ven firmade o regalade dal alt, ma mertade e vuadagnade dal bas. Une libertât e une autonomie corâl e no élitarie, globâl e no setoriâl. Une libertât che e cjapi dentri dut il popul in dutis lis sôs manifestazions: religjosis, culturâls, politichis, sociâls, umanis, economichis, ambientâls. Tal contest de gnove Europe, là che si pò tornâ a meti in circul la tradizion e la vocazion universâl di Aquilee.
La celebrazion dai 3 di Avrîl no je un lament par un ben pierdût, ma une meditazion e un impegn par un ben di cuistâlu simpri e di no molâlu mai. Un ben che al vâl la vite parcè che dome se si è libars si pò clamâsi vîfs. I timps che o vivìn, cui gnûfs imperialisims e universalisims, no son i plui adats par un popul come il nestri, cence santui e colonizât. Bisugnarà scombati, crodi, impegnâsi a ogni nivel, no lassâsi comprâ e no vendisi. Resisti par esisti. Par fâ la part, nestre e dome nestre, che Diu nus à dât di recitâ. Sul palc de storie. No daûr des cuintis, sot dal palc, o ator pe sale a vendi bagjigjis.
Dome cussì la memorie di une date e devente profezie, coragjo, scomesse, fede. Tal Diu che al opere te storie e te storie lûc di Diu. ■
Cirint lis olmis di Diu, n. 4 pag. 153,  04.04.1998

pre ANTONI BELINE

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +