IL FERÂL. Memorie e profezie

Se un popul nol sa dontri che al ven, nol pues savê dulà che al va. I mancjin lis coordenadis par une navigazion sigure e furtunade. Di chi la impuartance fondamentâl de memorie. Un popul al scuen cjalâ al so passât, il plui pussibil indaûr. Ma se un popul al pense o al vîf dome di passât, di memorie, magari di memorie nostalgjiche, nol va indenant instès. Parcè che la memorie e à un sens e un valôr dome se ti jude a cjalâ indenant, a prospietâ, a progjetâ, a preparâ un avignî.
Lis celebrazions dai moments fondamentâi de storie di un popul a son une vore impuartantis. Di fat ducj i popui a àn lis lôr fiestis. E cuant che tu vuelis cjastiâ un popul, ti i gjavis la memorie dai siei moments, dai siei monuments, de sô identitât, de sô unicitât. Se no fevelin di te, a un cert pont ti ven ancje a ti il scrupul di no esisti. Dal moment che si scuen esisti, tu vivis in funzion di un altri e tu vivis altris memoriis.
Al è il câs dal Friûl, che nol ven ricuardât in niò. La sô storie e ven contade, studiade, lete dome in funzion di chê taliane. Cussì i furlans a son rivâts, o ju àn fats rivâ, a dôs conclusions amaris e periculosis: di no esisti, di esisti dome come talians. […]
I furlans, che no san di jessi furlans, a fasin i talians. E par jessi plui crodûts, a fasin i talianissims. Cussì, biel che tal centri de republiche taliane a mangjin e a bevin e si sbombin di patrie e di dut, i furlans, ai cunfins dal imperi, adiriture a piturin i pâi de lûs cul tricolôr, come a Paluce, e se ur ven dade une cagnere di medaie dopo otante agns di disastris, si metin a vaî come scoreâts.
Al è duncje impuartant celebrâ la nestre fieste nazionâl, a ricuart dai 3 di Avrîl dal 1077 e dal diplome ducâl dât dal imperadôr gjermanic Rico IV al patriarcje di Aquilee Sigjeart, par dî che o esistìn, che o vin un non e une muse, une storie e une tradizion, un puest inte grande famee dai popui no mancul mertât e dignitôs di altris. Se o esistìn, o vin ancje cualchi dirit. Dirit a un puest, dirit a un rispiet, dirit a un avignî. No un puest o un rispiet o un avignî cualunche, ma il nestri puest, il rispiet de nestre identitât e peculiaritât, il nestri avignî come popul fra i popui, in armonie e colegance cun altris popui, ma no in sotanance o servitût. A chest pont la memorie e devente profezie, progjetazion di une autonomie pai timps di vuê e pai agns avignî.
[…] Une autonomie che e tegni cont dal nestri contest storic e gjeografic e economic e culturâl european. No nus interesse un sflic di libertât tal telâr centralistic des regjons talianis. O volìn, o vin dirit, o vin di rivâ a imbastî rapuarts vitâi, regolârs, normâi, direts cu lis realtâts politichis che a vivin tacadis di nô, usance la Slovenie e la Carintie, par slargjâsi a chel bacin miteleuropean e orientâl che al è il nestri polmon, la nestre aghe e il nestri aiar. Parcè che nô o vignìn di li e o vin tiessude la nestre storie plui biele propit li. Tant dal pont di viste gleseastic che civîl. Come un grant cercli plurietnic e pluriculturâl che al veve in Aquilee la sô risultive, il so centri, il so paradigme.
Dut chest al domande un grant sfuarç, une grande convinzion e determinazion, une conversion radicâl. Cun fadie, coragjo, fede, sgrimie.
[…] E sarà dure ma chest nol à di deventâ un alibi al nestri impegn concret e coerent sul grant breâr de storie.
PRE ANTONI BELINE
La Patrie dal Friûl n. 3 avrîl dal 1998