IL FERÂL. L’ort di Ildegarde

Fevelant di ort in chest numar de Patrie, mi soi impensât de Olme che pre Antoni al veve scrit te sô rubriche par “La Vite catoliche” e che Glesie Furlane e à publicât tal IV volum “Cirint lis olmis di Diu.
Tun mont simpri plui globalizât e artificiâl ancje tes robis plui sacrosantis come il nudriment, il rapuart cul propri habitat, l’ort al devente un dai lûcs plui concrets, inmediâts e a la puartade di une vorone di personis che nus permet di no pierdi il contat cu la proprie tiere, cul propri mont, cui propris savôrs, cuntun mangjâ che si sa ce che si met in bocje, cun plantis e jerbis che oltri a sostentânus, nus garantissin plui salût tal cuarp e serenitât te anime, stant che nus permet di mantignî une straordenarie armonie tra om e creât.
E Ildegarde in chest e je stade mestre sapiente e moderne.
pre Roman Michelotti
––––––––––––––––––––––––––
Se e fos ancjemò in vite, e varès dibot la etât di Matusalem, ma la sô vision dal mont e je straordenariementri zovine e lis sôs recipis e decots si ju cjate tes miôrs erboristeriis e speziariis de Gjermanie. O stoi fevelant di sante Ildegarde di Bingen, nassude te Assie renane tal Istât dal 1098, ultime di dîs fîs e consacrade a Diu come lis decimis de Bibie.
A 8 agns e compagne sô santule Gjudite di Spanheim tun romitori e a 17 si consacre a Diu tant che benedetine ma cence clausure.
A 38 agns le sielzin par badesse, compit che e onorarà par 43 agns, fintremai a la muart.
Ildegarde e je une des feminis plui completis no dome de ete di Mieç ma de storie de glesie. Mistiche, e fâs scrutinâ lis sôs rivelazions di sant Bernart e dal pape; tra une malatie e chê altre, e salte fûr dal convent pai cuatri viaçs di predicazion che le viodaran sui pulpits des grandis catedrâls di lunc fûr dal Reno; e interven cun fuarce tes cuistions politichis e religjosis de sô ete e, par ordin dal confessôr, e publiche i siei libris, tacant dal Scivias, “Cognòs lis stradis”, un classic medievâl. Ma la sô specialitât al è il studi dal om e des sôs malatiis e des jerbis e des lôr virtûts, che i da une competence e une autoritât unichis. Nus restin “Il libri de midisine semplice”, plui teoric, e “Il libri de midisine composte”, plui pratic. E un numar infinît di conseis di botaniche.
Nol è facil strucâ la ricjece teologjiche, filosofiche, psicologjiche e naturalistiche di Ildegarde, come che nol è facil zirâ tal so ort. Parcè che Ildegarde, te sô vision unitarie, no si interesse dome dal ort e des jerbis, ma di chel che lis dopre e soredut di chel che lis à creadis par un so progjet ordenât, che si clame gracie e salût, e che al ven comprometût dal disordin o pecjât o malatie. No si trate duncje di cjatâ la jerbe juste pe malatie juste ma di cjatâ la cause de malatie, che par solit e diven o e compuarte une disarmonie tra chestis trê realtâts colegadis: Diu, l’om e il mont.
Diu al à metût un ordin e une armonie, che a durin fin che l’om al ubidìs al so creadôr. L’om al pues saltâ fûr dal ordin ma il mâl al compuarte il cjastic. Se però l’om al torne a Diu, al varà tant l’ordin interiôr che la salût. Ildegarde e à ancje piturade une ruede cosmiche, là che l’om e la creazion a son dut un par vie de corelazion tra microcosmo e macrocosmo. Ma la ruede no dome e pee tra di lôr l’om e il mont ma ju pee cu la Trinitât. Se unitarie e je la vision dal mont e dal ordin, unitarie e sarà ancje la vision de malatie e la ricjerce de salût, dal moment che ancje lis jerbis a dipendin dal ordin di Diu, come l’om che lis dopre e il mont che lis fâs cressi. In chest Ildegarde e je plui moderne e complete e concrete dai nestris botanics e erboriscj.
Ancje il mont furlan al à cjaminât su la strade di Ildegarde cuant che al à viodût intal mont naturâl une sô sacralitât e intes jerbis la man di Diu. Lu prove la usance de benedizion dal mac di sant Zuan, praticade in Cjargne, e la nomenclature religjose dade a tantis plantis e rosis: lagrimis, cjavei, voi, jerbe, scarputis de Madone, voi, passion dal Signôr, jerbe di sante Palonie e di sant Zuan. E veve provade su di se la lôr fuarce benefiche une devote e esperte di Ildegarde, Gjuliane Bianchi.
Lis catedrâls gotichis a son sdrumadis o visitadis tant che un museu. La catedrâl spirtuâl de badesse di Rupertsberg, che e à par volt il cîl e par paviment la tiere cu lis sôs plantis e energjiis spirtuâls, e deventarà simpri plui il lûc là che la nestre gjenerazion positivistiche, materialistiche e malade, e va a cirî la salût globâl tune armonie globâl. Benedete Ildegarde!
pre Antoni Beline