Sfuei Mensîl Furlan Indipendent
Archivi de Patrie

IL FERÂL. La Italie raziste, o ben: la ore dai conts

............

Antoni Beline intun dissen di Gianni Di Lena.

Cumò par un an o sintarìn su ogni intono la solfe de unitât, stant che un altri an a colaran 150 agns che l’Italie e je stade imblecade. A rigôr di storie, bisugne dî che il Friûl ocidentâl, cence tant entusiasim, al è stât anetût 5 agns dopo, tal 1866, e il Friûl orientâl, adiriture tal 1918. Il pont di fonde nol è chel di celebrâ o no celebrâ un fat storic, ma di evitâ ogni forme di retoriche, di idealizazion banâl, di strombetâ un nazionalisim che al à fat vonde mâl a la Italie. La miôr maniere di celebrâ e sarès che di rindi un stât mancul mafiôs e corot, plui rispietôs des diviersitâts e ricjecis che la storie e à produsût. Fate la Italie sì, ma, par furtune, no son fats i talians, come che a smicjavin tal Risorziment. Chei a restin diferents e il stât che ju rispieti!.
pre Roman Michelotti

Aromai no passe zornade che la television e ducj i mieçs di informazion o disinformazion dal Stât no vegnin fûr cun câs di intolerance, di malinfidence, di asse cuintri dai »forescj». E par forescj si intint prin di dut chei che a vegnin di fûr de Italie, par passâ, planchin planchin, a chei che a vegnin di fûr de regjon. E stant che la pluritât dai vignadiçs e je di riunde meridionâl (no si à mai sintût a fevelâ di un flus che di ca sù al ledi par in jù), ve che a un ciert pont une buine part de Italie si cjate cuntune brute pice. E, grate che ti grate, e je une pice che i benpensants le clamin razisim.
A part la grande confusion, la imprecision, la deformazion dai fats, che di un câs a fasin un cjistiel o pensìn che e sedi une buine ocasion par lassâ di bande la retoriche, che cun chê no si cumbine nuie, e di cjalâ in muse la realtât, cirint di no spaçâ par carognis chei che a palesin un mâl che al è. In câs, a saran carognis chei che chest malstâ lu àn inviât, promovût, judât, e che no fasin nuie par meti rimiedi
Se dopo cent e passe agns di Italie unitarie, prime risorzimentâl po fassiste, po antifassiste, si cjatìn denant di dôs Italiis e di un Nord che nol pues plui digjerî la invasion dal Sud, al è clâr che no si trate plui dome di une matetât.
Al è alc che nol cuadre tal mût che cheste Italie e je stade repeçade. Cjalant i fats, tocje che la unitât de spice des Alps fin a la ultime ponte di tiereferme e jere plui une sflocje o une ilusion o une prepotence che no une realtât Si tratave di un dissen politic che nol tignive cont des realtâts culturâls, storichis e etnichis. Come meti adun plui cualitâts di fasui e po scjassâ dut tun tamês sperant che al salti fûr il fasuli standart. Al sarès stât un delit, parcè che si varès staronzade dute la diviersitât e la ricjece par fâ vignî fûr une robe bastarde e sterpe.
Cumò, tune clime plui libare o plui slavrade, cua1chidun al tache a dî »Vonde!».
E al passe par trist dome parcè che al vise la comunitât statâl dal malstâ che al è, che si lu sint in ducj e che si à pôre a pandilu. O pôre de religjon o pôre de politiche o pôre de publiche opinion. Salacor al è rivât il moment di tornâ a sclarî la cuistion.
Che la Italie e sedi fate di int diferente no je une invenzion di chel o di chel altri. E je une constatazion confermade de legjislazion statâl che no jere tant cjalde pai particolarisims. Parcè ano fatis lis regjons? Parcè ciertis regjons sono a statût speciâl? E cualis sono a statût speciâl chês plui vualivadis o chês là che la diference e je plui marcade, adiriture etniche, di gjernazie, di çocje?
Cuant che si tratave di fâ la Italie, tant de bande catoliche che de bande laiche, si fevelave di federalisim. Une idee che no si pues no cjatâle juste, par ducj, ancje se la reson dal Stât o la prepotence dal plui fuart no le àn lassade madressi.
La Italie e à une sô ricjece te diviersitât e dome salvant la diviersitât tune unitât plui largje si pues dî che la convivence e je positive. Se par jessi talians, che al è un fat prin di dut politic-aministratîf, o vin di staronzâ il cjâf ai todescs e ai furlans e scurtâur lis ongulis e i pîts ai meridionâi si capìs che une Italie dal gjenar e sarès une disgracie. Cjalade di ogni bande, ancje par ledrôs. Duncje la division in regjons e va tignude, e va rinfuarçade, cumò che no ‘nd è plui pericui di fuarcis centrifughis. Ancje par chel decentrament aministratîf che al sarès spieli di modernitât di maturitât e di sintiment.
La diviersitât e salte cuant che si scomence, a pueste, a meti adun in forme disordenade, prepotente e ricatatorie, fuarcis diferentis. Al sarès come cumbinâ un matrimoni fra int che no si vûl o che no je ancjemò preparade a vivi insieme.
Il miscliçâju par fuarce al jude a odeâsi no a volêsi plui ben. Parcè che il vivi insieme al è un ben cuant che al è cirût e bramât no cuant che al è imponût.
Duncje un Stât al à di fâ il pussibil par che ogni talian al puedi ve la pussibilitât di vivi a cjase sô, te sô clime fisiche e culturâl. Al da di plui parcè che al è in armonie cun dute la sô storie e al sa di lavorâ par un doman che al è so e dai siei fîs. Lassant la sô tiere, si cjatarà dislidrisât e al varà simpri ce pierdi. Se al tornarà cjase al varà pierdûts i agns de »profugance». Se al restarà lontan al varà pierdûts i valôrs e i peams de sô tiere di riunde. La emigrazion no je mancul dure fasint mancul chilometris o passant mancul frontieris. Chest esodi dai meridionâi viers il Nord, chest »viaç de sperance» come che lu àn clamat, in realtât al à servît dome a sfurnî i paîs là jù e a ingrumâ ca sù int disadatade, che si è cjatade cence lidrîs e cence pomis, distacade de sô risultive e no preparade a supâ la aghe de tiere che si jere sistemade.
Cussì o vin viodûts paîs a deventâ citâts, là che plui che convivence e jere grande confusion culturâl. Si lassave cori dome parcè che i bassarûi a puartavin mandopare e a consumavin i bêçs tal lûc di emigrazion. Cumò che no si à plui dibisugne di lôr, a Milan, a Turin e tes zonis industriâls dal Nord si scomence a berlâ cuintri di lôr. Ma lôr no puedin tornâ jù, parcè che ur son nassûts i fîs e i nevôts, che si cjataressin mâl ancje tornant tes tieris dal soreli.
Chest par chel che al riguarde il »triangul industriâl», là che i meridionâi a son vignûts a rimpolpâ la economie adatantsi a dutis lis voris e a dutis lis umiliazions.
Diferent il câs di altris tieris, come par esenpli il Friûl là che no son rivâts cu la valîs di carton, ma cun tant di lauree o di diplome o di jachete cu lis steletis. No jere une int disperade che e rivave a domandâ un toc di pan adatantsi a fâ robis che chei dal puest ur puçave di fâ. Chi di nô i furlans a àn continuât a fâ i contadins, i muradôrs, i operaris, e lôr a àn cjapade in man la scuele, la aministrazion, lis puestis, l’esercit, la polizie, i tribunâi e vie; in pratiche i puescj di comant. La leç ur dave dirit e par chel plui di un si à sintût in dirit di alçâ la vôs, di sbeleâ i furlans, di tratânus di biadaçs e di indurmidîts. Soredut si son sintûts fuarts de fuarce dal Stât, che ur deve titui e timbris, e no àn vût pêl di rivuart par che realtât plui vecje e plui vere de leç, che e je la int, cu la sô storie, cu la sô lenghe, cul so mût di fâ di sigûr diferent dal lôr. Gjavant cualchi ecezion si pues dî che no àn fate cuissà ce fadie par adatâsi. Parcè che si sintivin legjitimâts dal podê centrâl. E nissune istituzion, nè statâl nè eclesiastiche no ur à mai domandât, in gambi dal pan che a cjatavin, un tic di sensibilitât e di rispiet pe gnove realtât.
Cumò che il contest sociâl e economic al è gambiât, ancje i furlans a àn tacât a domandâsi se, par câs, nol sarès plui just, a paritât, dâi la precedence a la nestre int, in non di chê diviersitât che o vin dit prime. Nissun furlan nol disarà che nô o sin miôr di lôr, ma dome un prevignût o un vendût nol viodarà le diference, e grande, fra nô e lôr. Chest al è sucedût soredut par dôs resons: che i furlans a àn tacât a studiâ di plui, e duncje il materiâl uman pai uficis e pe publiche aministrazion al è; che i puescj di lavôr si ridusin, simpri di plui e duncje ogni om di sintiment al dîs che, a cjase sô, la cjadree i tocje prime a lui. No si pues pratindi il contrari. Al sarès catolic, ma no uman.
Ce si puedial fâ, denant di chest malstâ che di sigûr al cjaparà simpri plui pît?
Batisi par che la riforme de publiche aministrazion e cjapi simpri di plui la dimension regjonâl, in dut. Al rint di plui, al è plui onest, e al è plui rispietôs di chei valôrs che a vegnin prime de unitât di Italie.
Pretindi che la int che si è riplantade chenti e capissi che culì e je une altre tiere, une altre int, une altre culture. E come che lôr, a cjase lôr, a van indenant tes lôr tradizions sbombantsi de unitât taliane, cussì a àn di permeti che ancje i furlans, in Friûl, a puedin vivi di furlans, cence jessi obleâts a jessi i unics in Italie a sacrificâsi par une ideologjie. Che a cirin di adatâsi, di cognossinus, di insedâsi in chest nestri ambient culturâl e religjôs cun creance e cun delicatece. I furlans no ju pararan fûr instès, ancje parcè che a son bogns di bruntulâ dome cuant che nissun no ju sint. Se invezit a ciraran di deventâ dai nestris, a cjataran ancje un bon stâ. No par nuie nol torne jù nissun. Se po dopo a cjatin scrit su cualchi mûr cualchi peraulate, al è il minim che un popul invadût e umiliât in ogni forme al puedi fâ. O din dut, si lassìn puartâ vie dut; no vino propit nancje di rugnâ? Alore copaitnus daurman! Ma par podê dâ un judizi obietîf, si varès di disledrosâ la situazion. Tant a dî: fâ une leç là che i furlans a puedin invadi ducj i uficis dal Sud. Par cumò, stant che al è vêr il contrari, nus tocje di cjapâ il dam e lis colpis; stupits e triscj. E il Stât, che al è il prin responsabil di cheste porcarie, al à il coragjo di fânus ancje la predicje.
PRE ANTONI BELINE
La Patrie dal Friûl n. 6 jugn 1988 (911 de Patrie)

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

La tiere e la grepie / 2022: An internazionâl de pescje artesanâl e de acuiculture

Adriano Del Fabro – diretôr dal bimestrâl “SoleVerde”
Par une economie blu simpri plui sostignibile Lis Nazions Unidis a àn declarât il 2022 “An internazionâl de pescje artesanâl e de acuiculture” (Iyafa 2022), rimetint ae Fao il coordenament des ativitâts di sensibilizazion sul teme.◆ Il pes, i moluscs, i crustacis e lis alighis a son part ad implen des dietis, des ereditâts culturâls […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +