IL FERÂL. (cuarte pontade) 1. IL TEMPLI; 2. I furlans

O scomencìn chest gnûf an dal “Ferâl”, la rubriche dedicade a pre Antoni Beline, riproponint une sô riflession a pontadis. Il test complet al à il titul “I Furlans e il templi” e al presente un resonament sul rapuart dai Furlans cu la fede e la religjositât.
pre Roman Michelotti
***
(cuarte pontade)
[…]
1. IL TEMPLI
(Cuant che o feveli dal templi, o feveli in pratiche di gran part o di dut ce che al rivuarde la vite e la struture de nestre religjon catoliche).
Strucant a mût di conclusion, si pò dî che la peraule “templi” e cjape dentri dute o cuasi dute la sfere dal mont religjôs e sacrâl, la sfere de anime, lis domandis e lis rispuestis ultimis, la stesse fonde e concezion de vite. Al è evident che si trate di cuistions personâls, che a tocjin la part plui profonde e intime de persone e duncje no son sogjetis ni a classificazions ni a etichetis, jessint il mont de fede un mont misteriôs, impenetrabil e indicibil. Ma al è tipic di une certe concezion di glesie monopolizâ no dome la peraule di Diu ma ancje la cussience e la fede dai oms, pa la cuâl si ven a consegnâ la fede tes mans de religjon e dai ministris de religjon stesse, identificant in pratiche une categorie dal spirt cuntune categorie sociologjiche.
La fede e je, o e varès di jessi, alc di diferent de religjon e la religjon alc di diferent, di plui larc e vitâl dal templi. Parcè che il templi al rivuarde soredut l’aspiet cultuâl de religjon, biel che la religjon e cjape dentri ducj i moments e i aspiets de vite. Ma nô o vin vude la preponderance o prevaricazion de dimension cultuâl su la dimension personâl e il templi al è deventât il lûc esclusîf de religjon, robe che no je sucedude, par esempli, tai protestants cu la lôr interpretazion personâl de Scriture e cu l’impuartance de Scriture al interni de vite familiâr. Par chel la crisi dal templi e je plui traumatiche e devastant te glesie catoliche parcè che, jessint dut peât al templi, cuant che al cole il templi al cole dut e si riscje di no cjatâ “piere sore piere” nancje di fûr.
2.    I FURLANS
Dopo di vê cirût di sclarî la peraule “templi”, mi tocje sclarî ancje la peraule “furlans”. Une peraule che nô o vin clâr il significât etimologjic di “abitants o int che e vîf in Friûl”, ma no la stesse clarece sul fat che a esistin ancjemò o adiriture che a sedin esistûts. O vivìn in timps che si met in discussion dut, fûr che lis macacadis, e ce che un al dave par scontât, come une sorte di postulât che nol coventave pierdi timp a dismostrâlu, al riscje invezit di jessi dineât par prin. Par altri, se si vûl meti in pîts il gnûf mont virtuâl de globalizazion, la strade plui curte e sigure no je chê di tacâ a gjavâ lis tendinis o i cuadris picjâts sù pai mûrs, ma lis fondis. E la fonde di un popul e je la sô esistence come sogjet culturâl, la sô identitât, peculiaritât, unicitât.
• i Furlans a esistin
Se nol esist il popul, nol esist il probleme. Elementâr, Watson! Se no esistin i popui, nol esist il probleme dal pluralisim, de diferenziazion, de diversificazion, dal rispiet no dome di un passât di salvâ ma ancje di un avignî di fâ sù seont un propri progjet culturâl. Fâ une mondializazion tal rispiet des diferentis culturis, lenghis, religjons, vocazions economichis e fâ une mondializazion univoche, compate, semplificade, standardizade, ideologjizade, seont un progjet onicomprensîf, e je la stesse diference che e passe fra un zardin e un bloc di peton, fra un paîs e un cimitieri. Si trate di dôs filosofiis, di dôs culturis, di dôs visions dal mont completamentri diferentis e alternativis. Anzit, par jessi plui precîs, si trate di une filosofie e di une no-filosofie, di une culture e di une no-culture, di une vision e di une no-vision.
A chest pont ancje un distrat e un vuarp al varès di capî che no son plui cuistions di int che no sa cemût passâ il timp ma di vite e di muart. E stant che, in cheste vision massificant, a àn di sparî dutis lis culturis reâls par lassâ il puest a la culture virtuâl o a la no-culture, no je plui cuistion di culturis maioritariis e minoritariis parcè che il fruladôr al messede e al gramole dut, come il falcet chel nol fâs distinzion fra une rose e une urtie.
Lassant di bande la posizion patetiche o patologjiche di cualchi pseudo-inteletuâl, che al è rivât a la assurditât di contestâ une identitât furlane e po al à fate une liste lungje e impietose di ducj i difiets di chest popul inesistent, a dinein la esistence dai Furlans ducj chei che a lein la nestre storie dome in clâf e in funzion taliane, rivant al massim a la distinzion singolâr fra piçule e grande Patrie (chê maiuscule e sarès chê taliane!). A son la stragrande maiorance dal scjap pluitost sclagn dai nestris luminârs. Ind è ancje di chei, ultins par ordin di timp ma no di impuartance, che a sostegnin che aromai no si pues plui fevelâ di identitât parcè che il procès di integrazion, di assimilazion e di aculturazion al taie il mont in sens trasversâl e partant la idee stesse di popul e je superade de famee dai popui. Teorie che si podarès ancje glotile se il discors al valès ancje pai Talians, pai Francês, pai Spagnûi e vie. No podìn pensâ che il virus de modernitât al bechi dome lis culturis plui piçulis e trascuradis.
[…]
(al va indevant sul prossim numar) ❚
✒ pre Antoni Beline