IL FERÂL. Cualuncuiscj? No, ingomeâts!

Par un cont o par chel altri ogni an in cheste stagjon si cjatisi in cualchi berdei eletorâl. Si sa che la storie, lis problematichis e duncje la politiche e gambie, si adate, i partîts si fasin e si disfin. I articui di pre Antoni a jerin cetant peâts al moment che a sucedevin i fats. In cheste rubriche ju riproponìn e cussì o podìn di une bande riviodi il nestri passât, di chê altre capî che se al somee che dut al gambii, in realtât te sostance pôc o nuie al gambie: arogance, grandis promessis, gole di cjadreis, minorancis fermis ai lôr problemis di simpri… E duncje, se pûr contestualizâts, chescj pinsîrs a puedin simpri fânus rifleti.
pre Roman Michelotti

Sicheduncje la comedie, che cuant che al va di mieç il ben de int, e cjape il savôr e lis dimensions de tragjedie, e je finide. In farse. Congrès là che si santifichin i segretaris dai partîts, corsis sù e jù pes scjalis dal Cuirinâl par acetâ il mandât e par tornâlu indaûr, tentatîfs che no tentin nuie, mediazions che a àn dute la idee di une missete parsore dal cjâf de int; socialiscj che si clamin fûr, democristians che a vuelin tornâ dentri, republicans che no stan ni ca ni là, socialdemocratics e liberâi che a cirin di viodi di ce bande che al tire l’aiar par cirî di dî alc che, tal lôr intendo al varès di jessi seri. E simpri lis solitis musis, e simpri chei che, tal ultin, a varessin di comedâ ce che a stan sassinant di agnorums.
No podìn lamentâsi se a Napoli ur sta plui a cûr di cjapâ il scudet o se i zovins no àn nissune passion pe “politiche” (ma saressie cheste chi la politiche?), se la int “normâl” e gambie canâl a pene che al salte fûr un dai solits a spiegâ ce che nol è il câs di spiegâ, e ancjemò suntune television e suntun aradio che o vin di paiâju in ducj. Insome dî che sot la Austrie al jere miei al è dî masse pôc. Chi no si rive a viodi un dissen, un implant, un telâr, une filosofie che no ledi plui in là des cjadreis simpri plui largjis par podê poiâ un cûl simpri plui passût. E tante, masse arogance. No àn nancje il pudôr di fâle daûr dai sterps come lis pelandis o di fâle e platâle come i gjats; cumò lis lôr trainis lis “spieghin” par television, clamant cîl e tiere a testemoneâ la lôr reson.
Però là che al vuelin, a fasin. Par esempi a àn rivât a firmâ cumbinaments tal ultin minût di guvier. Robe che no sucedarà par mai tai confronts di leçs che a àn la fonde su la Costituzion, come chê des minorancis. A van berghelant che la Costituzion e va comedade parcè che e je masse viele, cu la cuâl che a àn ancjemò di finî di metile in vore.
Cuntune situazion cussì sporcje, là che pai furlans si slontane simpri di plui il moment di viodisi ricognossude chê cragne di leç, ce isal di metisi a fâ?
La tentazion di mandâju ducj a trai e je plui che umane, soredut là che a ‘nd è zovins cence lavôr e paîs cence avignî. La pice di cjastiâ i cinc partîts e je plui che juste. Si trate di viodi ce che si pues fâ, oltri che porconâ o mangjâsi il fiât di rabie o sbombâsi di dut.
Tal rispiet de libertât che ognidun al à tal segret dal vôt, o crodìn che si vedi di tignî presints chei partîts e chei oms che plui a àn lavorât par dânus un sclip di dignitât e di ricognossiment. No podìn votâ un partît republican che si è palesat piês dai missins. E se i cuatri scrodeâts de elare a àn podût rivâ a imblocâ dut, al vûl dî che chei altris ur àn dade cuarde. Pa la cuâl, dai cinc, no ‘nd è di gjavâ nissun.
Sot votazions a vignaran ducj a imprometinus, magari par furlan, di dânus, cu la prossime, dut ce che invanamentri o vin domandât fin cumò. Cirìn di no jessi stupits. Cirìn ancje di no jessi cence memorie. Se al è pussibil e se nus trai il cûr, cirìn ancje di voltâ pagjine. In plene cussience e libertât savint che i puars e i piçui a àn dome chel moment e chê ocasion li par fâsi sintî e par decidi.
PRE ANTONI BELINE