Sfuei Mensîl Furlan Indipendent
Archivi de Patrie

IL FERÂL. 3 di Avrîl dal 1077 …il stat nazionâl furlan, cu lis sôs istituzions e cu la sô muse, al nas e al jentre te storie

............

Al è il prin articul che pre Antoni al fâs in ocasion de prime fieste de patrie,a 900 agns dal Ducât dal Friûl. Nissun veve mai pensât di ricuardâ une fieste cussì significative te storie dal popul furlan. Cumò la fieste e je jentrade in forme uficiâl ancje tes istituzions, ma fin al 1977 nissun si jere mai interessât a la date. Pre Checo al à vude la intuizion, e pre Antoni al à scrit in lunc e i  larc in merit.
Cumò a tornin elezions regjonâls, e no dome. Si torne a sintî ator di plui bandis che i bêçs pe lenghe e culture furlane a son staçâts. Di sigûr e je une posizion ignorante di cui che nol cognòs ni la storie ni la culture, che a son, insieme cu la economie, l’anime, la vite di un popul. Di bêçs straçâts si sa che and è tancj, ma di altris bandis. Cui sa se i furlans si visaran di ce che a disin i politics?

pre Roman Michelotti
Tal lunari di Diu ducj i dîs a son compagns e no valin redenzie nuie, parcè che Lui al è fûr dal timp e paron dal timp e mil agns pai siei voi “a son come il dì di îr, ch’al è za passât, come un turni di vuaite vie pe gnot» (salm 89,4).
Tal lunari dal mont, ch’al misure lis sôs etis in miars e miars di agns, nûf secui no son cuissà ce. Dibot nancje no si nacuarzisi che a son passâts e che a vedin lassât un segn.
Tal lunari di un popul, ch’al pò murî di vuê a doman, che a puedin sumiergilu dal sì al no, nûfcent agns a son un grum. E a valin ancjemò di plui se il popul al è piçul e espost a dutis lis intemperiis e robariis e porcariis dai grancj e dai prepotents che, magari cussì no, no si piert mai la semence.
Il popul furlan al à scugnût supâsi liberazions a pitinton. Nol jere rivât un a deliberânus che a sec al plombave un altri a deliberânus di chel di prin. Ogni viaç nus à tocjât cjantâ tedeums ch’a vevin dute l’ande di un miserere e il cont de liberazion nus rivave simpri a nô. Puntual e cui interès.
Ancje lis nestris fiestis a son stadis plui fiestis di chei altris che no nestris. Bastarès cjalâ sui nestris lunaris “nazionâi»: aniversari de republiche, aniversari de liberazion, aniversari de vitorie (int vin vude une sole), centenari de unitât, aniversari de cumbine fra chel di ca e chel di là da l’aghe e cetera.
Un slac di fiestis forestis che a nô no nus vignivin lafè nuie. Epûr lis vin fatis e lis fasìn orepresint.
Par chel mi semee dijust fâ fieste un viaç par nô, dome par nô, par une robe che e je dome nestre: i nûfcent agns de nestre indipendence, che a scjadin propit ai trê di avrîl di chest an. Che se l’Italie e à fat cjoche, za fa cualchi an, par un secul di vite (o di vitis), nô o vin nûf voltis tantis resons par fâ une sagrone come che Diu comande. Parcè che un grant al è·ancje facil ch’al rivi a tirâ indenant e, se nol rive, si jude; ma un piçul al è un câs che nol socombi. La storie e pant che ducj i monuments dai grancj a son fats cui claps puartats vie ai piçui.
Tornâ a cjatâsi, tornâ a contâsi e a contâle dopo tant timp al è un dirit e un dovê no dome viers di nô ma ancje viers di chei che a vignaran. No si fâs sù cence fâ in sot e, par che lis fondis a tegnin, tocje lâ in sot fin che si cjate cret. Il Patriarcjât di Aquilee, te so funzion gleseastiche e civîl, che dopo si fondin dutune come che tal om il cuarp e l’anime si dan dongje te persone, al è un dai cjantonâi de nestre storie, che la int studiade e inleterade e varès di tignîlu simpri come telâr par capî il nestri popul e lis nestris liendis: un popul che nol è mai stât preot e clericâl ma instès religjôs fin te medole. La nestre int e varà ingrumade un pocje di fote cuintri i predis e il gleseam ma no à mai vût stilo o odio cuintri la Glesie o lis glesiis. Dibant no’nd jere tantis e tant bielis cuant che al è rivât il taramot. Chest leam gleseastic e civîl, religjôs e ghibelin, cheste fede che e vîf te libertât, chest tirâ jù il cjapìel denant di Diu e fracâlu denant di ducj chei mancul di Lui … se no si capìss chest, no si capìs nuie ni dal Friûl ni dal popul furlan. No podìn studiâ la nestre int ni cu la prospetive di Rome ni cun chê di Moscje. O laressin a riscjo di fâ violence ae origjnalitât furlane. Pa la cuâl al è dibant domandâsi, in chest centenari: “Ma la Glesie Furlane jere propit Glesie? Valadì la int, il popul di Diu vevial un puest in cheste organizazion o no?”. E chê di Rome lassavie puest ae int cuant che il Pape al contindeve di jessi il soreli e di vê la clâf che e viergeve chest e chel altri mont? O ben: “Ma la int. come masse, come popul, come classe, ce funzions vevie intal Stat Furlan?”. Valadì jerial un Stat pardabon democratic … antifassist o no?”. Parcè? Varessino vût di inventâ nô la rivoluzion di otubar? E dopo de rivoluzsion di otubar, cu la gnove libertât de sesule e dal martijel, la int comandie plui di prin?
La storie si à di rispietâle e ancje i fats no si à di pastrocjâju o di pretindi di interpretâ cumò ce ch’al jere une volte. E alore, sun chest intono, si pò dî che la Glesie Furlane e jere une vere Glesie e che il Stât Furlan un vêr Stât. E par chei timps avonde ben!
No vin nissune pice di meti sù un Stât teocratic a ûs dal Tibet o dal Vatican. E nancje, pal moment, no vin chê di fâ une vuere di indipendence. Però o podarìn, mi pâr, fâ fieste par une date tant impuartante e ancje cirî ce che e pò dînus une indipendence vude nûfcent agns indaûr e cumò pierdude. E ancje o varìn dirit di contâsi come popul che si dà dongje ogni tant par cjapâ coragjo e magari par miorâ in ce che si pò e ancje pretindi ce che si à dirit. Cence nissun rusin e cun tante gjonde tal cûr. Parcè che, tocje berlâlu: “Se il Signôr nol fos stât de nestre bande, cuant che i umign si son metûts cuintri di nô, cu la rabie che ju scjaldave nus varessin glotûts vîfs; lis aghis nus varessin ineâts. come une montane nus varessin puartâts vie, une aghe grande nus varès tirâts sot. Benedet seial il Signôr che nus à gjavâts des lôr sgrifis” (salm 123, 1-6).
E se, o ben o mâl, nus à dade une man fin cumò, par tant timp, volêso che nus lassi implante propit cumò ch’o vin tante dibisugne a parâsi dai oseladôrs forescj e nostrans?
Patrie dal Friûl, n. 3 Març dal 1977
✒ pre Antoni Beline

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +