Il Disc Miniaturis

15 liniis che insiemi a metin dongje secui di musiche, di orient a ocident, de antighe polifonie medievâl ae contemporanie, dut creât, ornât, assorbît, riscrit, rivelât de vene cence fin di Glauco Venier. No dome pianoforte, in cheste opare origjinâl, ma ancje sistris, percussions africanis, cjampanis, gongs e inmò sore, lis oparis di Giorgio Celiberti e Henry Bertoia, altris doi artiscj furlans. Lis crôs metalichis dal prin e i açalins dal secont, sunâts tant che a fossin struments musicâi, cu lis lôr risonancis a jentrin in intese perfete cu lis vibrazions des cuardis batudis dal piano. Art e nature, storie e atualitât, miniaturis. Dut tai dêts di Glauco, mestri des armoniis plui insolitis e evocativis, poete di melodiis gran scontadis e tal stes timp cetant gjoldibilis, ae massime potence.
Dut al tache cuntun sunôr di sistris, viertidure di Ritual, un toc caraterizât di acuardis sospindûts, che di volte in volte si fasin plui insistents a partî di lungjis polsis, cjamadis di significâts. Daspò al ven Tiziano’s painting, in memorie dal pitôr umanist, a traviers di une melodie delicade, vierte aes rispuestis des cjampanis. Bizantine icon, Serenity, Abstractio, Prayer, Madiba, a son chescj i tocs firmâts di Glauco cu la sô istintualitât ritmiche perfete, trasformadore di atmosferis intimis, e de sô alte cjantabilitât, di une dolcece infinide. No mancjin lis rivisitazions di altris autôrs, tant che Gunam di Alessandra Franco, une des plui bielis vôs dal jazz talian, Asian Song di Gurdjeff e De Hartmann, Krunk di Mansurian, fin a Ce jour de l’an di Dufay, compositôr simbul dal Rinassiment flamant. Un disc preziôs, di scoltâ e di tornâ a scoltâ, cence fin. ❚
✒ Al.Sc.