E je une storie che E scomence a GrEdiscje di Sedean, e cres in dut il Friûl, si slargje a nivel european e e zire dut il mont. E je la storie dal pianist e compositôr plui amât, studiât e sensibil dal Friûl, Glauco Venier. Il musicist artesan, il fabricant di suns, al à a pene publicât pe etichete Ecm (Edition of Contemporary Music), l’ultin so disc dal titul Miniaturis. Prin talian dopo Stefano Bollani, a incidi in piano solo pe cjase discografiche, la plui impuartante a nivel internazionâl di jazz e di musiche contemporanie. Un om sclet, Glauco, votât fin sul nassi ae art dai sunôrs, cressût inte semplicitât de vite contadine, tra i cjamps, i curtîi, lis buteghis, lis glesiis, lis baleris, la int di paîs. Cumò al è tra i compositôrs preferîts di Manfred Eicher, il patron de Ecm, un guru, un visionari de musiche che lu à volût, cence se e cence ma, inte sô scuadre di artiscj mondiâi.
Propit a grediscje, intal paîs dai cjastelîrs, Glauco Venier al à tacât a meti man aes tastieris e a coltivâ la sô vene musicâl, che il timp nus dimostre di fantasie inesauribile, profondissime. Inte glesie di Sant Stiefin, dulà che dut al è scomençât, su un orghin Zanin, il zagut si è inviât, daûr la vuide dal plevan, a cognossi lis nozions di fonde de musiche. Il modalisim dal gregorian, la polifonie sacre de epoche rinassimentâl e baroche in particolâr. «Chê musiche mi cjoleve vie, come cumò. Plui le studiavi, plui mi cjapave. Oris e oris su chel strument, su chês pagjinis». Ma ancje i cjants spontanis de int, tra vilotis e vecjis danzis, la musiche des sagris e des baleris lu apassionavin, in chei prins agns Setante dulà che, dongje lis polchis e lis mazurchis, si faseve simpri di plui indenant il jazz, i balabils, la musiche foreste che e passave te radio, tai juke-box, tai discs. «Une dì, o jeri fantacin, il gjornalâr mi à regalât un vinîl, nissun lu comprave. Mi à dit: “tu che tu sunis, ti pues coventâ”. O soi lât dret a cjase, par metilu tal vecjo zirediscs scancarât: Louis Armstrong. Une rivelazion.»
Daspò e je rivade la sielte di studiâ al conservatori di udin, dulà che al à otignût un brilant diplome in orghin, e tai prins agns Novante al è rivât il moment di traviersâ l’Atlantic, in gracie di une borse di studi vinçude par studiâ al Berklee College of Music di Boston, une grande istituzion, dulà che pôcs a son cussì brâfs di jentrâ. Di chi indenant, in fuarce di tancj incuintris, colaborazions, progjets, concierts in ogni lûc, studis cence fin, la strade di Glauco, simpri plui e simpri miôr pianist, e à cjapade la direzion slargjade di une ricercje totâl inte musiche, cu lis sôs contaminazions, jenfri la classiche, il jazz, la contemporanie, cence mai dismenteâ la origjin de sô ispirazion: il Friûl.
«La musiche e je come l’aiar. e va dapardut, dulà che e à voie. come i furlans. Tante musiche e je passade e e passe ancjemò pal Friûl, e tante il Friûl a ‘nd à. Une tiere cuntune storie musicâl cetant profonde, miscliçade, che e va des origjins di cheste art, aes monodiis di Aquilee, ae polifonie plui elaborade, aes danzis, aes cjançons, cjapant dentri ambients cults e popolârs, sacris e profans, lenghis e derivazions. Cheste fantasmagorie sonore mi clame ancjemò a esprimimi, daûr dai sintiments che mi guviernin». Un furlan pal mont. No si contin i artiscj che cun lôr Glauco Venier al à lavorât e al lavore. Nons tant che Toots Thielemans, Lee Konitz, Kenny Wheeler, Steve Swallow, Joey Baron, Marc Johnson, par dî di cualchi forest, cence contâ i talians. Si podarès jemplâ il gjornâl di nons di musiciscj, i miôr in circolazion. Come lis placis, i teatris, i festival dulà che al à sunât: dapardut.
Dopo tantis esperiencis dal vîf e in studi, di bessôl o in ensemble, cu lis mans sore l’avoli di un pianoforte a gran code, Glauco al è tant che un artesan che al plasme, rinovant ogni volte une materie sonore antighe, che le trasforme di fâle sunâ simpri plui gnove, in virtût di un bagai jemplât di un viaç cence fin. Une sapience tecniche sutile, une poetiche ispirade di ideis raris, o miôr unichis, la maturitât dal pianist e dal compositôr di Grediscje di Sedean si rinove cence mai dismenteâsi di se, e e torne al so Friûl. Chê tiere che si sint, pure e sclete come lui, in discs tant che L’Insiùm, une opare mestre, o La Ballata della Speranza su poesiis di Turoldo, Dal libro dei balli di Giorgio Mainerio, 12 musiche per 12 quadri, ispirât dai lavôrs di Celiberti, e tantis altris oparis, ancje componudis su peraulis di poetis tant che Cappello, Tavan, Giacomini, Cantarutti, Pasolini. Cence dî dal laboratori permanent di ricercje musicâl L’Insiùm, fondât cun Michele Corcella, che al met dongje dispès une schirie di artiscj e di musichis di ogni bande inte nestre Regjon.
cun miniaturis, glauco al segne il so vincjesim cuart disc, un dai miôrs. Al è dome di scoltâ. Si sintin i fiers dal mistîr, il lavôr meticolôs dal fari, lis finecis dal mosaicist, la fuarce dal marmist, la lime precise dal intaiadôr, la delicatece dal vederâr e dute la maravee des buteghis e de nature mari dai nestris lûcs, di dongje e di lontan. ❚
✒ Alessio Screm
(L)Int Autonomiste / Al esam di maturitât cu lis dispensis sul nestri sît
Dree Valcic
✽✽ E je une grande buse intal percors che planc a planc al è daûr a fâ l’insegnament de lenghe furlane inte scuele. Plui che une buse o podaressin definîlu un gorc che al va a pericul di gloti ducj chei si movin in chest setôr fondamentâl de nestre culture identitarie.✽✽ Si cjatìn di fat […] lei di plui +
L'Editoriâl / Risierve di valôr
Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +
Salon Internazionâl dal Libri di Turin 2023
Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +
COROT. Nus à lassâts Sergio Salvi
Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +
Vuê al è il 3 di Avrîl, si fâs la Fieste de Patrie. Fûr la bandiere dal Friûl! Mandi a ducj i furlans! Buine Fieste de Patrie!
............
Chest an si davuelç ai 16 dal mês la celebrazion che e memoree l’inovâl dai 946 agns de nassite dal Stât Patriarcjâl 3 di Avrîl dal 1077: une date fondamentâl pe origjin de nestre identitât di popul furlan, dal moment che propit cheste zornade e je considerade in maniere uficiâl tant che chê de nassite […] lei di plui +
Glesie Furlane / Grop amîs di pre Toni. Program dai events pal 2023
1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +