Sfuei Mensîl Furlan Indipendent
Archivi de Patrie

IL COMENT. Maseri al done al Ateneu Palaç Antonini. Une grande oportunitât

............

Une volte la int che e faseve dal ben e jere tante in Friûl. A jerin tancj chei che sul model american e dai paîs dal Nord de Europe a vevin fate fortune e a lassavin ae comunitât part de lôr ricjece par judâ chei che a jerin mancul fortunâts. Di Toppo Wasserman, Fior, Morpurgo Hoffmann, Mauroner e cetancj altris: i nons di chescj oms e di chestis fameis a son ancjemò inte memorie de citât di Udin.
Int benemerite che dut câs nus somee part di un passât lontan: e invezit oms dal gjenar a esistin ancje in dì di vuê. Lu dimostre la storie straordenarie di Attilio Maseri, di divignince furlane, ma che al à simpri vivût a Rome. Al è cognossût a nivel mondiâl tant che un dai chirurcs plui innomenâts pes tecnichis operatoriis a cûr viert: cheste volte al è stât bon di vierzi il cûr a ducj i furlans intune volte sole, e cence jentrâ inte sale operatorie. Al à di fat comprât de Bancje di Italie il maraveôs Palaç Antonini, che l’architet visentin Andrea Palladio al à progjetât tal ‘500. Un edifici di valôr storic e artistic inestimabil, come che inestimabil al è il contribût di Maseri ae ricercje mediche e sientifiche.
Purpûr il miedi, che al è simpri restât leât al Friûl, nol à cjalât al cost de operazion (si fevele di 5 milions di euros), ma pluitost ae straçarie di viodi une struture cussì grande e preseabile intal plen centri citadin, cun di plui te zone de Universitât, cence utilizazion dal 2009. E al à pensat che, invezit di jessi bandonade, une opare gjeniâl tant chest Palaç e varès podût fâ di scune a altris gjenis, e deventâ un centri di ecelence pai studis plui inovatîfs che a rivuardaran la comunitât. Il professôr Maseri nol à dât nissun vincul ae destinazion de sô donazion, e la Universitât e la citât par ricognossince a clamaran il palaç Antonini-Maseri.
Ce dî? Al somee un at cussì gjenerôs che al sa cuasi di miracul. Ma che al oblee a pensâ par chest edifici un avignî ae altece dal sfuarç che il so donadôr al à fat. Il retôr Alberto Felice De Toni al à dit di volê fâ une “Cjase de Furlanetât”: dificil capî ce che al podarès volê dî, ma i resonaments fats fin cumò intal Ateneu furlan a somein puartâ in direzion de creazion di un centri che al meti dongje i furlans sparniçâts in ogni continent par dâ gnovis oportunitâts di sinergjie ae nestre tiere e a ducj i contescj dulà che i cerviei furlans a laran (par pôcs agns o par simpri) a lavorâ e a fâ cressi lis lôr competencis.
Considerant che par creâ une rêt cui furlans di inaltrò zaromai a esistin Friuli nel Mondo e Efasce, e che la “Cjase de Furlanetât” e jere ancje un progjet de Filologjiche in vie Manin, al è di sperâ che la prime sinergjie e sedi chê fra ducj i sogjets che si ocupin di furlans tal forest. In cheste maniere o podaressin considerâ che la “operazion” di Maseri e varès vût za un grant sucès ancjemò prin di concretizâsi in jutoris concrets a pro dal mont sientific e culturâl furlan: e sarès di fat la dimostrazion che la Universitât e pues tornâ a jessi ce che i siei fondadôrs a volevin che e fos, ven a stâi un catalizadôr des energjiis miôr che la nestre tiere e prodûs, ma ancje un motôr par disvilupânt di gnovis. ❚
Walter Tomada

Int di Cjargne / Magjie a Cjarsovalas

Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +

L’Editoriâl / Cuant vignaraie la “adunade” dai furlans?

Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +

Festival di Poesie Alpine / Autôrs di Ladinie, Grisons e Friûl a confront

Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +