Il 3 di Avrîl: un sburt ancje pe autonomie

Alc di gnûf al è tal aiar pai nestri paîs: la voie di riscuvierzi une identitât cetant antighe e je tornade di mode, a cjalâ lis tantis salis plenis di int che e à cjapât part ai tancj incuintris inmaneâts sul teritori in ocasion de Fieste de Patrie. Merit de iniziative de Assemblee di Comunitât Linguistiche, che e à puartât in 35 Comuns tancj relatôrs che a 940 agns dai 3 di Avrîl dal 1077 a àn spiegât sore nuie (dome par “amôr di Patrie”) ator par dut il Friûl la storie e la atualitât di chest inovâl; ma a son stadis tantis altris lis iniziativis su chest teme, e tancj i citadins che a àn tirât fûr lis bandieris cu la acuile dai scansei.
In tiermins di “marketing des ideis”, mai come in chest moment la domande di Friûl e je in cressite: e lis resons a son tantis, intun moment dulà che a nivel internazionâl, talian e nostran a son simpri mancul i ponts di riferiment par chei che a cirin di lei la realtât intune maniere culturalmentri coerente e moralmentri corete. La lint di globalizazion, doprade fin cumò ad implen, no baste plui: e come che ai timps dal taramot la nestre int si è peade ae bandiere e ae sô identitât di comunitât par tignî dûr e par fâ sù un altri gnûf Friûl, cumò al è deventât ancjemò une volte necessari peâsi aes nestris lidrîs. Parcè? Par resisti ae tampieste di un mont che i taramots determinâts dal marcjât e dal terorisim a rindin simpri plui malsigûr, al è ben cjalâsi tal spieli e imparâ ben ce che o sin stâts e ce che o sin deventâts in dì di vuê. E scuvierzi che dut ce che o vin fat di bon pe nestre tiere lu vin simpri fat tirantsi sù lis  maniis di bessôi, e cirint il plui pussibil di autoguviernâsi. Soredut, ricognossint lis  nestris comunitâts e lis  lôr diferencis e scoltant la lôr vôs. Lu fasevin al timp dai Patriarcjis e si lu à fat al timp dal taramot. Si scugnarà fâlu ancje tal avignì, ma par jessi sigûrs che il Friûl al percori cheste strade, bisugne movisi a meti dongje un moviment di popul che al sburti par une espansion de nestre autonomie. E che al cjali ae Europe des regjons cuntun voli gnûf, zontantsi a chei che a condividin cheste nestre vision.
Par chest, al va saludât tant che une vore impuartant il fat che Patrie Furlane e sedi jentrade (cu la poie de Union Slovene) inte European Free Alliance che e met dongje i moviments nazionâi dai popui di Europe. Al è il segnâl di un gnûf sproc, di une gnove tindince dai autonomiscj furlans: creâ puints e no sgjavâ fossâi.

Dome cuntun voli aes lidrîs e un altri al mont o podarìn studiâ un avignì diferent pai nestris fîs.
E tocje dâsi dongje, tirâ fûr lis miôr energjiis e dute la passion che o sarìn bogns. Ma tocje fâlu cumò. Se la int e domande plui Friûl, bisugne dâi une sperance. Ai 2 di Avrîl la strade par Sapade, plene di bandieris, e jere pardabon un spetacul. E tante int lade sù a pandi solidarietât ai confradis sapadins (no jerin puescj par mangjâ o par durmî cence prenotazion) e da un segnâl speciâl: che al pues madressi un moviment autonomist gnûf, zovin e inclusîf, e che la int i darès par sigûr un bon acet. ❚
✒ Walter Tomada