La esperience di Int/Art pe regjie di Dorino Minigutti lu conferme
E je rivade ae seconde serie Int/Art, cicli di documentaris curts direts dal regjist udinês Dorino Minigutti e fats de societât Agherose cul contribût de ARLeF, Agjenzie Regjonâl pe Lenghe Furlane, e dal Fonts regjonâl pal Audiovisîf.
Dopo dal sucès de prime serie dedicade ai protagoniscj de musiche, la seconde serie e cjape in considerazion il mont des arts visivis: de fotografie ae sculture, passant pal fumet, la grafiche e la art instalative e performative. Int/Art al stice une riflession su la influence e sul rûl che la identitât linguistiche e culturâl a àn pai zovins creatîfs, indagant trop che la lenghe e puedi determinâ une divierse sensibilitât artistiche.
Protagoniscj des cinc pontadis a son il scultôr Edi Carrer, la fotografe Alice Durigatto, la ilustradore Carin Marzaro, l’artist visîf Michele Bazzana e Luca Malisan, fumetist, che al à colaborât ancje cu “La Patrie dal Friûl”. Graciis ae colaborazion cu la sede Rai pal Friûl-Vignesie Julie, lis pontadis a stan lant in onde su Rai3. La ultime, su Malisan, e sarà trasmetude domenie ai 22 di Avrîl, aes 10.50, su Rai 3; in repliche, miercus ai 25 di Avrîl, aes 22.05, su Rai 3 Bis.
«Al è stât inmagant indagâ i contescj e lis modalitâts che cun chês i zovins protagoniscj di cheste gnove serie di Int/Art a àn costruît la lôr identitât. A son stradis diviersis tra di lôr, ma unidis di valôrs che chescj artiscj zovins, natîfs digjitâi, a ricognossin tant che determinantis pe lôr formazion artistiche e personâl», al marche il regjist Dorino Minigutti.
Dopo de musiche e des arts visivis, e je previodude in curt la produzion de tierce serie su scriture, teatri e danze.
Informazions su www.int-art.eu – www.facebook.com/intartdoc
par cure de redazion
