I torments no cessin

Alc di bon, soredut di bande dal privât, al nas. Ma tal stes timp, il nivel dai servizis publics in mont al continue a peiorâ di mês in mês. E a ogni piçul segnâl di sperance (il sportel pe justizie che la Regjon e je rivade a fâ tornâ a vierzi a Tumieç), a saltin fûr altris trê di disconfuart. Lis Puestis, par esempli, no vuelin smetile di bastonâ i lôr utents. Dopo vê confermât par Setembar lis sieraduris dai sportei di Tierç di Tumieç e di Ospedalet di Glemone, in plui de riduzion di orari di chei di For Disot, For Disore, Dimpeç e Resie, cumò a son rivadis ancje a otignî di consegnâ la pueste ogni doi dîs. Ricuardìnsi che dal 2010 dome te mont e te pedemontane dal Friûl si son tiradis jù lis sierandis di ben 17 uficis postâi e in altris 28 si son taiadis lis zornadis di viertidure. La dirigjence de societât – che si à di visâsi che e je stade privatizade ma che e je simpri sot de ale dal ministeri de Economie – e fâs savê che e sarà la tecnologjie a permeti di superâ i problemis. Pecjât che in Cjargne si sta spietant ancjemò che internet al cori a une velocitât decente (in cuindis comuns plui dal 80 par cent de popolazion nol pues utilizâ la bande largje) e che i celulârs a cjapin ben il segnâl dapardut.❚
✒ D.Z.