Eletrodot: nissune posizion radicâl iperambientaliste, ma dome considerazions e indicazions di sintiment

La CISL di Udin si è interessade di lavôr e di economie reâl, soredut di manifaturîr, ancje cuant che masse politics, sindicaliscj e imprenditôrs a jerin inceâts de new economy, gnûf “soreli dal futûr”. E à ribatût in maniere ossessive, e lu fâs ore presint, che il sisteme produtîf provinciâl e regjonâl al va difindût e rilançât costruint un contest di riferiment ancje locâl che al judi e che nol complichi la vite aes impresis, cemût che masse dispès al sucêt. Chest parcè che i fatôrs competitîfs di contest a son fondamentâi pe riessude di une aziende. Lis impresis, di fat, a àn sucès prin di dut par capacitâts propriis ma ancje, in part consistente, par resons a lôr esternis.
E esist e e je basilâr chê che i disin competitivitât di sisteme. Dai tancj e cognossûts fatôrs competitîfs di contest la infrastruturazion, materiâl e imateriâl, indi je une componente decisive. Secont ciertis stimis, un adeguament des infrastruturis al puartarès cun se, intal arc di une desene di agns, un aument di cirche il dodis par cent dal PIL nazionâl. Al va fissât, però, cualis oparis a vedin pardabon un sens e une utilitât sistemiche e cualis che a sedin dome che un afâr pes lobbies dai costrutôrs, cence ufrî nuie e, anzit, gjavant aes comunitâts e ai teritoris coinvolts. Une volte aciertade la utilitât di une opare, cheste e va costruide intal mût plui sigûr e che al impate mancul pussibil, doprant lis tecnologjiis plui inovativis. Al è necessari che i procès decisionâi che a rivuardin lis infrastruturis a sedin tâi di cjapâ dentri pardabon i sogjets sociâi, economics e istituzionâi che si cjatin intes areis coinvoltis fin dal principi, dal studi di fatibilitât ae progjetazion e ae programazion. Fâ partecipâ e responsabilizâ par fâ in mût che la proteste di pôcs no impedissi la realizazion di oparis necessariis, ma ancje par fâ sì che la opare e sedi pardabon utile e ancje rivuardose des Comunitâts e dai teritoris. Proceduris seriis e ciertis ancje par fâ in mût che lis decisions cjapadis no puedin jessi metudis simpri in discussion. Intal câs dal eletrodot Redipulie-Udin la CISL di Udin, duncje la CISL de aree interessade, e je stade cjapade dentri dome intal Jugn dal 2012, prime dai Sindics e dopo, in maniere masse svelte, de Regjon. Al è ancje par esperience direte, duncje, che la CISL di Udin e sosten che il metodi, cuant che e je in bal la costruzion di une grande opare, al è impuartant cuasi tant che il merit. Une procedure, al va sotlineât di gnûf, che e sedi impuestade a un rûl efetîf di ducj i atôrs. Cussì nol è stât, almancul pe CISL di Udin.
Intal merit, dome ciertis precisazions. La CISL di Udin no je contrarie al eletrodot, ma a chest gjenar di eletrodot parcè che al impate masse. E si viôt! Covential par razionalizâ e meti in sigurece la rêt eletriche regjonâl? Al covente  prin di dut a Terna par deventâ simpri plui une imprese di nivel european. Chest al è un obietîf plui che condivisibil. Ma al va precisât, par amôr di veretât, che in Friûl-V.J. di energjie a ’nd è a suficience e che l’eletrodot nol puartarà nissun benefici di presit de energjie ai citadins e aes impresis locâls par vie des normis europeanis coercitivis su la concorence. Si varès di interogâsi, dopo, sul parcè che – cundut dai tant sbandierâts problemis di manutenzion e di plui servitûts – si puedin costruî eletrodots intierâts in dut il mont, fale in Friûl.
Al è indiscutibil, infin, che lis Açalariis Bertoli-Safau, tant che ogni aziende energjvore, a vedin un bisugn assolût di ciertecis in fat di continuitât di provision e di impegn di potence eletriche. Cheste dibisugne, però, no scuen par fuarce jessi sodisfate propit di un eletrodot aeri.
De bande de CISL di Udin, in definitive, nissune posizion radicâl iperambientaliste, ma dome considerazions e indicazions di assolût sintiment. ❚
Roberto Muradore, Segretari Gjenerâl UST CISL Udin