Sfuei Mensîl Furlan Indipendent
Archivi de Patrie

I tesaurs di S. Vît dal Tiliment

............

Chest an o vin volût vierzi une gnove rubriche par presentâ dutis chês realtâts archeologjichis dal Friûl che, magari cussì no, a son mancul cognossudis ma no par chest mancul impuartantis. Par fâ chest o vin domandât la colaborazion de Societât Furlane di Archeologjie che dal 1989 si impegne cetant su dut il teritori par valorizâ e promovi il nestri patrimoni culturâl.
La zone di S. Vît dal Tiliment e je siore di olmis archeologjichis di diviersis epochis che a van de ete preistoriche fint al periodi roman e rinassimentâl. Cheste bondance di insediaments e je stade favoride ancje in gracie de presince di aghis di risultive che fin dai timps plui antîcs e à permetût al om di cjatâ un puest otimâl pe coltivazion e pe sô sussistence. No bisugne dismenteâ po dopo che, come che o vin ricuardât in altris ocasions, la zone dal Friûl e je simpri stade favoride de posizion strategjiche tant che linie di passaç pes areis alpinis e pont di colegament tra il mont italic e centri europeu.
Lis primis scuviertis preistorichis te zone di S. Vît a risalissin ae metât dal ‘800; in chescj agns di fat a vignerin in lûs une manarie in piere e silicis sclesadis. Po dopo, tai prins agns dal XX secul, Ludovico Quarina al individuà il cjistielîr de ete dal Bronç a S. Zuan di Cjasarse, inserintlu te liste dai cjistielîrs di planure vignûts sù te fasse mediane dal Tiliment e in zone di risultive (viôt Codroip,  Bonzic, Sedean, Gradiscjute di Vil di Var).
Ma un pionîr de archeologjie di S. Vît al fo Federico De Rocco, origjinari di Turide di Sedean, inteletuâl, artist e grant apassionât di archeologjie che si dedicà ae racuelte di materiâi dilunc dai agns ’50; De Rocco, ancje se nol jere un archeolic professionist, al fo une vore sistematic tal so lavôr di racuelte metodologjiche dai materiâi. Chest al permetè ae aministrazion locâl, cul jutori dal ent di riferiment, di meti in pîts tai agns ’60 un museu civic che al metè adun ducj i materiâi scuvierts te zone di S. Vît; il nuclei origjinari dal museu al fo formât propit des scuviertis dal De Rocco insiemi cun dai afrescs che a vignivin dal Palaç in Borc di Cjistiel e di altris glesiis dal teritori.
Dilunc dai agns il museu al è stât insiorât di altris materiâi, ma il contribût plui grant al vignì de straordenarie scuvierte de necropoli di S. Valentin tal 1973, il prin sît de ete dal Fier indagât in Friûl de professore Paola Cassola Guida e Giorgio Stacul de Universitât di Triest. La impuartance di chest sgjâf al ven dal fat che a forin cjatadis desenis di tombis a incinerazion cun diviers furniments sedi di oms che di feminis e fruts, cun vâs di crep decorâts e bronçs. Il studi sistematic di cheste necropoli di bande de professore Cassola Guida al à dât un grant contribût sientific par capî miôr la ete dal Fier chi in Friûl. Ducj i materiâi a forin po dopo metûts a puest e inventariâts cul contribût di Maurizio Buora. Tal 1986 in gracie dal lavôr di Serena Vitri e di Emanuela Montagnari Kokelj al fo fat un grant lavôr di inventariazion e studi dai materiâi presints tal museu e improntât un gnûf alestiment daûr di criteris sientifics e espositîfs modernis. Te stesse ocasion al fo ancje intitulât il museu ae figure di Federico De Rocco.
In plui di 50 agns di ativitât il museu vuê al è inmò centri di ativitâts didatichis e di difusion di storie antighe dal teritori di S.Vît, propit come che al varès volût Federico De Rocco. Dal 2008 il studi e la esposizion dai materiâi a son stâts afidâts ae Sezion Diestre Tiliment de Societât Furlane di Archeologjie che e à come coordinadôr Daniele Callari. ❚
✒ Venusia Dominici e Giovanni Filippo Rosset
In colaborazion cu la Societât Furlane di Archeologjie, Par informazions: Societât Furlane di Archeologjie, Puarte Vilalte, vie Micesio 2, Udin. Tel. 0432 26560. www.archeofriuli.it
___________________________________________
***
Murùs, tierce campagne di sgjâf
Tal mês di Lui la SFA e tornarà a sgjavâ li de vile rustiche romane in localitât Muris. Par informazion o podês scrivi a mlavarone@alice.it.
***
Sgjâfs a Codroip
Li dal cjistielîr de Gradiscje a Codroip, che o vin fevelât tal numar passât, si tignaran i sgjâfs a scomençâ cul prin lunis dal mês di Avost e par cuatri setemanis; ai lavôrs a partecipin la SFA dal Medi Friûl e il Museu di Codroip.
***
Atimis, cjamp archeologjic tal Cjistiel Superiôr
Dal 1997 a son in cors i sgjâfs tal cjistiel di Atimis, impuartants par numar di materiâi e pe scuvierte di diviers ambients dal edifici. Ancje cheste Istât si tornarà a lavorâ dai 29 di Lui ai 14 di Avost. Par informazions si pues clamâ il numar 0432 26560 o scrivi une mail a sfaud@archeofriuli.it. ❚

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +