«Dutis lis voltis che si va a sgarfâ te memorie par gjavâ fûr ce che al covente par ricuardâ un fat o vê iniment un amì, cence fal si cjatìn di front a un ravueç di storiis, fatis de vite, oms, feminis, paîs pierdûts e afiets dismenteâts. Tant che, cence inacuarzisi, o vignìn cjapâts dentri de conturbie par no disberdeâsi plui dal ingropament».
Cussì Alberto Picotti al ricuarde il so amì Dino (Bernardino Virgili 1925-1983) inte prefazion di chest libri metût adun par cure di Giannino Angeli e publicât de Societât Filologjiche Furlane in colaborazion cul Comun di Martignà.
Virgili al è cognossût in Friûl massime pe sô opare L’aghe dapît la cleve, il prin romanç dut in lenghe furlane (1955). Il libri che o fevelìn, invezit, nus fâs cognossi e preseâ ancje altris aspiets de personalitât dal om, dal poete, dal educadôr, dal scritôr e artist furlan. Vincjedôs poesiis, li che a son di segnalâ, in particolâr, i Spirituals dal gno Paradîs (Jo o soi chel frut / che quan’ ch’al mûr al larà Carubin); vincjedoi tocs gjavâts fûr dal romanç, li che a tornin a vivi moments significatîfs de vite di une volte: lis sagris, lis vendemis, la emigrazion (la strade di Gjermanie…), lis filis intes stalis, la nêf e il frêt, il cjalt e il sut, il rosari intun latin roseât… Une ventine di prosis che, dispès, a àn un savôr di poesie par vie che a misclicin realtât cun magjie (Il cjaradôr des animis) o che a disin di piçulis storiis di amôr (Emme come mamma) o ben che a doprin la scuse di un cjaruç par incrosâ la grande storie cu la piçule storie (Il cjaruz di Bas); altris poesiis di cuant che al jere zovin; tocs di critiche leterarie gjavâts fûr de La flôr, la antologjie de leterature furlane in doi volums publicade intal 1968 e ristampade intal 1978; disleelenghis, filastrocjis, cjançonutis cun valence didatiche par insegnâur il furlan ai fruts.
A completin il volum i “pinsiruts” scrits dai siei arlêfs di prime elementâr pal lôr mestri che al jere benzà malât, une bibliografie dai siei scrits e une schirie di fotografiis di epoche.
O vin in chest volum un biel e util imprest par cognossi miôr chest rapresentant di prin ordin de culture, de lenghe e de letarature furlanis e ancje un just omaç a un om che al diseve che “nol è nie di plui biel che jessi fruz”. ❚
Laurin Zuan Nardin
