Sfuei Mensîl Furlan Indipendent
Archivi de Patrie

MUSICHE. La Patrie dal Friûl e à il so Imni uficiâl. Cumò si à di doprâlu!

............

La composizion e je za disponibile in dodis versions

La Patrie dal Friûl e à il so Imni uficiâl. E veve bielzà, e e continue ben fuarte e sigure, a vê la sô lenghe, la sô storie, la sô identitât, lis sôs bandieris. Carateristichis che le fasin uniche e rapresentative in ducj i particolârs. Cumò il Friûl al à ancje un so cjant, une sô melodie su peraulis di impat emotîf fuart, par une idee nassude doi agns fa e deventade realtât. Chest in gracie di un concors di composizion musicâl bandît dal Istitût Ladin Furlan “Pre Checo Placerean”, in colaborazion cu la Agjenzie Regjonâl pe Lenghe Furlane e cul Messaggero Veneto. Daspò di une scolte impegnative e atente des dîs composizions anonimis ametudis, par orchestre classiche e côr, daûr di un bant cun regulis precisis e cuntune comission di specialiscj sot de presidence dal compositôr di grande nomee Azio Corghi, l’imni vincidôr al è infin risultât “Incuintri al doman”. Peraulis di Renato Stroili Gurisatti e musiche di Valter Sivilotti.

La comission esaminadore e à marcât che “la musiche e il test si integrin a vicende, midiant di une scriture vocâl e strumentâl di grant respîr e di slanç di cjant potent”. La nomine e je stade fate in ocasion de Fieste de Patrie dal Friûl a Voleson, e la prime esecuzion assolude e je stade ai 6 di Otubar tal Domo di Lignan, cuant che l’imni, cun largje partecipazion di public e autoritâts, al è stât interpretât di bande de Mitteleuropa Orchestra, direzude di Marco Guidarini, e dal Coro del Friuli Venezia Giulia, preparât di Cristiano Dell’Oste.

Tancj i preseaments e i batimans, par une composizion che e esist bielzà in dodis versions diferentis – par esempli, par côr feminîl, maschîl, bande, vôs blancjis -, e dutis si puedin discjamâ tal sît de ARLeF (www.arlef.it). Prest a vignaran fatis versions in chês altris lenghis dal Friûl, ven a stâi il sloven e il todesc, e pe prossime Fieste de Patrie al sarà prontât il cd di chest progjet impuartant.

«La ambizion e je che chest imni lu cjanti plui int pussibile – al dîs il poete Renato Stroili Gurisatti -, che al deventi un moment di identificazion. Al è un imni un pôc particolâr, parcè che la plui part dai imnis e nas par vie di un nemì, di une vuere, di une vitorie di rivendicâ. O pensi par esempli a chel todesc, che al à apont lis primis dôs strofis che no si puedin cjantâ, proibidis de Costituzion. Jo e Valter, o vin cirût invezit un sium. Parcè che il Friûl al à inmò bisugne di siums, se mai a ‘nd à vûts».

Il mestri Valter Sivilotti, l’autôr de musiche, al rivele che «o corevi ator di chestis notis bielzà di un pôc di timp e mi jeri confrontât cun Renato su chest element melodic. O crôt che cheste tipologjie di musiche chi, e rapresenti ben il nestri teritori. O sin timits, ma o vin voie di rivendicazion. Secont me, la sensibilitât nestre e à inmò dute di vignî fûr. Cjalant ancje ce che o vin lassât tal passât, o pensi a dute la storie dal Friûl, ma ancje a dut chel che al sucêt cumò dentri di nô furlans. Come cuant che si cjacare di talent musicâl. Ce che al è? E je une robe dentri di nô, e le vin, ma inmò dute di tirâ fûr, lant apont incuintri al doman».

I doi autôrs a zontin: «Il Friûl al è une miniere che e à cetantis oportunitâts. Bisugne lavorâ parcè che chestis a puedin vignî pardabon fûr. O vin talents leteraris, musicâi, ma la nestre espressivitât e je ancjemò une vore comprimude. Ancje parcè che o stin fasint malementri paragons cui senaris culturâi che o vin ator di nô. Nô o vin une capacitât di espression origjinâl. La musiche, cence altri, e à in chest sens plui vôs».

Il diretôr de ARLeF William Cisilino, ae domande se ai furlans ur coventi un imni, al rispuint: «O vevin bisugne di un imni par risolvi un probleme pratic: ce sunâ o cjantâ cuant che si vûl memoreâ o celebrâ un moment di fieste par ducj i furlans? No mi riferìs dome ae Fieste de Patrie, ma pensìn ancje a manifestazions sportivis o a events culturâi di varie nature. Cumò o vin une cjançon e un test di riferiment, individuâts midiant di un concors viert a ducj. Cumò al è impuartant organizâ iniziativis par pandilu e par fâlu cognossi. Al sarès ancje oportun che l’Imni al fos ricognossût par leç di bande de Regjon, come che al sucêt pal Imni di Mameli». ❚

Alessio Screm

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +