Carlo Sgorlon,
Ombris tal infinît,
Societât Filologjche Furlane,
Pasian di Prât, 2010
“Fatime Nissim, une biele zovine persiane, di pôc parsore dai vincj agns, e rivà a
S. Martin, un paîs de Basse, dopo vicendis une vore complicadis. Culì e podè viodi subit che l’inzegnîr talian che al jere stât so amì te citât di Abadan, no i veve contadis bausiis. Di fat tal borc e cjatà prontis par jê, intune cjase di contadins, lis trê stanziis che i vevin prometudis”.
Al scomence cussì il tierç romanç par furlan di Carlo Sgorlon, publicât de Societât Filologjiche Furlane. La zovine persiane de storie no je rivade di bessole in Friûl, e puarte cun se une vite gnove intal grim. I nassarà une frute, Eve, cuntun caratar ferbint che i ven de bande orientâl dai siei vons, che un al jere stât vuerilîr patriot. Une frute cun doi paris (e, plui tart, ancje un putatîf), par vie che la mari no le conte propite juste, in realtât e à vût doi oms e no sa cui che al è il pari de frute. La integrazion intun paîs forest no je mai facile, ce maravee se Fatime e cîr di slissâsi la strade cun cualchi bausie! Po la frute e cres, e cumbine cualchi dam, sicu ducj i fruts (ma ancje di plui…), e cognòs int interessante, parfin une viele ministre siorone che e à gust di zuiâ di cjartis cun jê. E che e varà une fuarte impuartance pal so avignî. La piture e devente la vere passion de sô vite e e fâs tancj cuadris, ma il plui biel e plui intens al à tant che titul propit “Ombris tal infinît”. Al rapresente doi oms che si petin sul ôr di un sfondaron e che no san nancje parcè: une metafore de esistence umane.
Naturalmentri e incrose ancje lis viis di cualchi om: Nicolau e Vitôr, in particolâr. E no saran esperiencis facilis, nancje chês.
Intal libri no mancjin riferiments ai acjadiments storics: lis trasformazions dal paisaç, il cumierç di armis, i riviei dal sessantevot, lis brigadis rossis e vie indevant.
E nancje no mancjin, come in dute la narative di Sgorlon, riflessions filosofichis e metafisichis, sintiments spiritualiscj e religjôs.
E in plui il libri al regale peraulis dismetudis, che al è un pecjât di no doprâlis di tant bielis che a son: malepasche, gaiandre, sdranade, ringhespîl, tachil, faniculis, darote. ❚
Laurin Zuan Nardin
