Giovanni Pilosio,
Ruzin e amôr, Udin, 2018
«Bert, cjan de ue, indulà vâstu? Âstu biel fat i compits?», i disè Eline, butant il voli tal libri di scuele sierât su la taule.
«Ma mame, jo i compits ju ai bielzà finîts, o vevi nome di ripassâ».
«Ce presse e ce furie, e je passade nome mieze ore di cuant che tu ti sês sentât a studiâ e cumò di bot tu molis?».
Al scomence cussì chest romanç curt di Giovanni Pilosio, che, in vite sô, la lenghe furlane le veve fevelade pôc e, naturalmentri, inmò mancul scrite. E alore, ce aial fat? Al à fat il cors di lenghe e culture furlane li de Universitât de tierce etât di Udin e, dal risultât dal lavôr di un an academic, al à savût tirâ fûr la voie di scrivi, e di scrivi par furlan. Une conte lungje, li che si incrosin acjadiments dal dì di vuê cun chei de grande vuere e de disfate di Cjaurêt; paîs de Furlanie (Ruvigne) cun citâts francesis (Mulhouse, Strasbourg) e polachis (Katowice). Friûl, Alsazie e Slesie a son stadis simpri tieris contindudis di un stât e di chel altri e, propit par chel, a aspirin a di une sorte di autonomie.
I argoments tratâts a son chei in prin plan inte Europe di vuê, che e varès tante dibisugne di jessi unide, ma che e fâs fature a cjatâ soluzions ai problemis che le travanin, par rivâ a chê fradaie che l’autôr i tignarès tant.
Protagoniscj a son i zovins di za fa un secul che si batevin sui confins e chei di vuê, chei che a doprin Skype e Whatsapp, che a van a sintî i concierts dai lôr idui, ancje fasint cualchi centenâr di chilometris. Ma che si inamorin propit come che a fasevin i lôr paris e maris, e che a àn la sensibilitât di lâ a cirî lis lôr lidrîs, di volê savê cui che a jerin i vons costrets a emigrâ (e cence vê la preparazion che a àn lôr, cumò) o ben piês ancjemò, a lâ in vuere a copâ e fâsi copâ.
Un scuf, colât par tiere intune bataie, al reste platât un secul, in spiete di cualchidun che al rivi a sgarfâlu fûr, a netâ dut il ruzin ingrumât li cui agns, par viodi se al è pussibil che al vegni ae lûs l’amôr.
Insom dal volumut, une utile bibliografie e sitologjie e un profîl biografic dal autôr, cuntune fotografie che nus spieghe cemût mai che al cognòs cussì ben stradelis e stradelutis di fâ in biciclete, no dome in Friûl, ma ancje ator pal mont. ❚
Laurin Zuan Nardin
