I costums di Davian

Al è il 1811 e il professôr Angelo Garbizza al è incjariât de Republiche Cisalpine (o sin sot dal sorestant francês) di fâ une relazion sui ûs e costums locâi pal “Dipartiment dal Tiliment”. Cussì, cuant che al rive a Davian, nol pues fâ di mancul di notâ il vistît tipic de int dal puest. Cul dissen “Uomo e donna delle montagne di Aviano”, il studiôs nus regale une des primes imagjins dai costums di chest paîs de provincie di Pordenon, che vuê al fâs vignî subit tal cjâf i americans de Base Usaf, ma che invezit al à di ufrî un patrimoni culturâl unic leât al folclôr, che al è inmò vuê une vore vivarôs. No son tancj, di fat, i avianês che no son lâts almancul une volte a balâ cui danzerins.
Chest patrimoni indissolubilmentri leât al paîs pedemontan e cognossût in dut il mont, dal 1924 al è tutelât e puartât indenant dal ‘Gruppo folkloristico Federico Angelica Danzerini di Aviano‘, che tal 2012 al à ancje publicât une impuartante opare storiche “I Costumi de Aviàn” di Lorena Menegoz e Fabrizio Padovan (Libreria Al Segno editrice). Pagjinis che a contin dusinte agns di storie, cuntune racuelte di detai dai costums, specifichis sui modei, materiâi, e accessoris, curiositâts, documents storics e ilustrazions, dai prins dal Votcent a vuê. Chi dentri e je la storie di Avian, dal so bal e de sô int, e la Storie cu la esse grande: i danzerins a àn balât denant dal imperadôr Francesc I di Austrie, e a personalitâts tant che Guglielmo Marconi e Ernest Hemingway. A son stâts part de ‘Opera Nazionale Dopolavoro‘ e dal 1969 a ospitin, ogni an, inte seconde setemane di Avost, grups di dut il mont che si cjatin chi par balâ in cheste bande dal Friûl Ocidentâl pal Festival Internazionâl dal Folclôr.
Vuelistu savê di plui? Va su www.danzerinidiaviano.it ❚
Natascia Gargano