Cuant che la culture musicâl in Cjargne
si fâs ancje di Atom. Dai 10 di Novembar ai 17
di Dicembar in diviers comuns e cun tancj ospits
E fâs vincj e une Primeveris la rassegne musicâl “I Concierts di Sant Martin in Cjargne”, pronte a scomençâ ai 10 Novembar e che e larà indenant fin ai 17 di Dicembar, cun diviers apontaments, a Davâr, Tumieç, Paulâr, Çurçuvint e in rêt cul “Cjamin di Sant Martin in Cjargne”, che al tache invezit ai 4 di Novembar par finî ai 9 di Dicembar. Tantis Primeveris si diseve, ma chestis propuestis culturâls che si fasin tra l’Atom e l’Invier a son tra lis pardabon pocjis iniziativis che a animin la Cjargne in chel periodi cun musiche, incuintris, aprofondiments. Parcè che sì, al è tant facil fâ robis di Istât cuant che a son i turiscj, lis feriis e il biel timp, tant plui dificil al è però imbastî propuestis di significât cuant che a restin dome chei pôcs che a àn la cjase là sù, cuant che nol è timp di feriis e al è tant frêt.
◆ E al è propit par lôr che e je pensade la rassegne conciertistiche fondade dal cjâr mestri Giovanni Canciani, il pari des cjasis museu di Paulâr, La Mozartine 1 e 2 (a son trente agns che la prime e je stade tirade sù didentri e difûr, simpri di lui), che di cuant che al è muart, tal 2018, e ven puartade indenant dai siei arlêfs e amîs, midiant de associazion Amîs de Mozartine. Forsit al è chi che al va cirût il sens di fâ culture di là dal event, di là dal sempliç intratigniment, di là de evasion, a pro invezit de citadinance, dal popul che al è a stâ in chestis tieris, cetant bielis ma ancje cetant dificilis, par stiçâ il sens di apartignince, dal stâ insiemi e dal produsi resonaments di condividi e di rindi materie di tocjâ, ancje midiant de musiche, art tant intangjibile che concrete.
◆ A son ben undis – che cun chei dal “Cjamin di Sant Martin”, fat in siet tapis, a deventin disevot – i apontaments de storiche manifestazion musicâl cjargnele, che o direzìn jo che o scrîf, e il violinist di nomee internazionâl Guido Rimonda, bielzà arlêf di Canciani intai siei agns di insegnament a Turin e tornât in cualchi mût a cjase dal mestri graciis a contats mantignûts tal timp.
◆ I artiscj ospits a vegnin sedi dal Friûl – o podìn fâ cont su lis miôr realtâts corâls, orchestrâls e di soliscj de nestre tiere – sedi dal rest de Italie e dal forest. Nons, chest an, che a fasin vignî i sgrisui: interpretis che a sunin par esempli tal Teatri La Scala, tal Regio di Turin, e intes salis plui famosis dal mont. No si lu dîs par esagjerazion, ma par vêr, stant che Rimonda al è ancje lui dentri de dimension dai musiciscj di “Serie A”, come che a confermin – par esempli, juste par dî une – i siei sucès discografics pe famose etichete Decca. Al à di pôc vinçût lis cinc stelis (une sorte di Grammy) cu la sô ultime produzion dedicade ai concierts di Giovanni Battista Viotti.
◆ La gnove edizion – anticipade di un conciert inte glesie di Sant Martin di Davâr ai 10 di Novembar cui Arcs dal Friûl e dal Venit, insiemi cul côr Rosas di Mont -, si vierzarà te dì di Sant Martin, ai 11 di Novembar, aes 18.30, propit tal Domo di Sant Martin a Tumieç: dut a teme dedicât al Sant, come che al è just. Il Côr dal Friûl-Vignesie Julie, insiemi cu la Academie di Arcs Arrigoni, cu la Orchestre di Cjamare di Pordenon, e cul organist Marco Cortinovis, ducj direzûts di Filippo Maria Bressan, a presentaran un program speciâl cuntune atenzion particolâr pe musiche sacre di Francis Poulenc, compositôr francês che a son juste 60 agns che al è muart, dongje di oparis di Ralph Vaughan Williams e Gustav Mahler.
◆ I ospits internazionâi a tachin cui 18 di Dicembar, cuant che aes 20.30 tal Museu Cjargnel a laran in sene il violinist messican Adolfo Alejo e la violonceliste cravuate Ana Turkalj. Ai 25 di Novembar e sarà la volte de violiniste, une stele dai arcs che e ven dal Kazakhstan, Aiman Mussakhajayeva, insiemi cul pianist Giuseppe Gullotta par pagjinis di Beethoven, Brahms e Ravel, simpri tal Museu. Inmò, ai 2 di Dicembar aes 20.30, inte sale Tiepolo in vie Cavour a Tumieç, al sarà ospit il Cuartet Adorno, formât di musiciscj che a son dentri tes miôrs orchestris talianis, cuntun conciert dedicât dut a Beethoven. Ai 17 di Dicembar, tornant al Museu Cjargnel e simpri aes 20.30, al sierarà la rassegne il Trio Johannes, une altre stele dal firmament musicâl classic.
◆ Di là di chei, no son ciert di dismenteâ lis nestris stelis furlanis: ai 26 di Novembar, tal Auditorium Linussio di Paulâr, aes 17.30 al larà in sene “Cjants di Incjaroi”, cun musiciscj, musicants e vôs furlanis, a sveâ fûr il nestri patrimoni antîc, in graciis di une ricercje fate in rêt cul Ecomuseu I Mistîrs. Ai 3 di Dicembar aes 18.00, te Mozartine 1 di Paulâr, il duet pianistic feminîl formât di Rosangela Flotta e Helga Pisapia al regalarà musichis di autôrs slovens. Ai 8 di Dicembar, tal museu di Tumieç e sarà la volte dal armonicist cjargnel Andrea Nassivera, un talent sigûr, e ai 15 di Dicembar aes 20.30 inte glesie di Sant Martin di Çurçuvint, il Cuartet Amîs de Mozartine al proponarà musichis di autôrs de Republiche Ceche, dongje di pagjinis barochis e di Giovanni Canciani. Di no dismenteâ infin il spetacul solidari cuintri lis gnovis puaretâts in Cjargne, ae decime edizion, proponût dal Lions Club e dal Rotary Club di Tumieç. Dut il rigjâf al larà in beneficence, e chest an a saran in sene Angelo Floramo e Nicole Coceancig cuntun toc di teatri, musiche e narazion intitulât “Cjargnelas. Storiis di feminis cuintri curint”. Dutis lis informazions, il calendari e i programs intal specific a son sul sît www.lamozartina.it. ❚
