I CLASSICS – 4. SANT JACUM, LÀ CHE AL FINÌS IL MONT

Torzeonâ e pelegrinâ
Mi pâr di podê dî, duncje, che la storie dai oms si podarès leile no dome sui libris, ma ancje cjalant i pîts dai oms, soredut i pîts dai puars e dai tibiâts, che a àn traviersade la tiere e la storie. Un torzeonâ e un cirî che nol è dome economic, ma ancje culturâl, psicologjic, spirtuâl. Dal moment che lis fams di cheste creature limitade a son cence limit, al è naturâl che l’om al ziri e al ciri ce che i covente par sostentâsi e par vê une vite plene o almancul sopuartabil. Si cîr il pan de libertât e de dignitât; si cîr il pan de sience e de cognossince filosofiche; si cîr la persone che e pues jemplâ di pâs e di lûs il nestri cûr; si cîr il sens dal nassi e dal murî; si cîr il significât dal timp, dal cîl, des stagjons, dai gambiaments; si cîr pal timp che si vîf, par chel prime di vignî al mont e par chel dopo jessûts dal mont. Cjalant, duncje, chestis dibisugnis esistenziâls dal om, si podarà capî ancje in ce direzion che a son lâts, a van e a laran i siei pas. Parcè che, parafrasant il vanzeli, là che al è il to tesaur, li si indrece ancje il to cûr e i tiei pas.
Cheste fam e cheste sêt, che tai câs patologjics e je une tragjedie, e à ancje i siei aspiets positîfs. Se l’om nol veve dibisugne, no si moveve. Ni cui pîts, ni cul cjâf, ni cun nuie. Il progrès de umanitât al à une sante protetorie: Sante Scugne. Di fat i moments di plui grande scjarsetât di bens materiâi a son ancje chei di plui fuart stimul creatîf. E à cjapât plui surîs intune setemane la gjate di mê none che no i miei trê mus intun an. No parcè che la gjate di mê none e jere plui virtuose e volenterose, ma parcè che e veve plui fam. Che se le ves cjatade pronte, no si sarès çugnade nancje jê. Chest al vâl par ducj i laudatores temporis acti, i inemorâts dai timps che no tornin altri.
Ma il cirî, il cjaminâ, il spostâsi al compuarte pericui trements, pal cuarp e pe anime, pal fisic e pal spirt. Il pericul plui grant al è chel di pierdi lis lidrîs, il passât, la memorie, l’identitât. Cuintri dai fanatics dal villaggio-globale e dai predicjadôrs di un universalisim a 360 grâts, jo o sosten che l’om al è datât e localizât parcè che al nas intun timp e intun lûc, al salte fûr di une storie e di une gjeografie che lu fasin jessi cussì e no difarent. E la ricjece e la sperance de umanitât interie e je chest incuintri di personis cuntune storie e une muse difarente, che si confrontin e ognidun al da il so specific, acetant vulintîr il specific dal altri. Se no, no varìn spostament e incuintri di personis, ma dome di robots o di sclâfs.
O ai vût let di personis, metudis in pereson o cjatadis in situazions di riscli globâl, che a incidevin il non no dome sul mûr o sui trâfs de pereson, ma taiantsi la piel fint a fâ spissulâ il sanc, parcè che a savevin che la proprie identitât e jere la ultime briscule morâl e la ultime sperance.
Primo Levi, cjatantsi tal infier di Auschwitz, al à capît che al scugnive segnâ ce che al sucedeve ogni dì in se e ator di se. No tant par fâlu cognossi a chei altris, tratantsi di esperiencis masse personâls e traumatichis, e nancje par salvâ la memorie storiche, dal moment che la storie e je un mulin che al masane di dut e cuntune muele simpri plui svelte e ciniche, ma par cunvincisi che dut chest al jere sucedût. Parcè che il timp lu varès puartât a dubitâ ancje lui e, se e sparive la memorie ancje intes vitimis, al tocjave propit concludi che il fat nol jere sucedût.
Se chest al vâl par une persone o un fat circostanziât tal timp e tal lûc, cun plui reson al vâl par une emigrazion personâl o coletive, par une persone o un popul condanât a spostâsi di un continui par sielte o par dibisugne, là che il riscli mortâl di pierdi la memorie, che al sarès come pierdi la anime, al è il prin te liste dai pericui.
Cuant che une persone e piert il pont di partence, e piert ancje il pont là che e à di rivâ e chei tal mieç. Intune peraule e piert l’orientament. No dome l’orientament gjeografic, che chel si pues cumbinâ, rangjantsi o domandant, ma l’orientament culturâl, fat di lenghe, filosofie, struture psicologjiche e mentâl, e chel morâl, fat di esperiencis, di insegnaments, di ponts fers di ben e di mâl. E piert cussience e autocussience.
Pierdint l’orientament, si piert la sigurece e une aventure gjoldibil come il spostâsi al devente un traume. E je la stesse difarence che si à montant suntune coriere, in compagnie di amîs e cuntun bon autist, e montâ suntune coriere cun int foreste e cuntun autist che nol sa di ce bande che al à di lâ. No crôt che in chê coriere ti vegni voie di sivilâ.
Forsit vuê no si cjante e no si sivile ancje parcè che o sin intune coriere imense, framieç di int simpri plui foreste ancje se e vîf dongje di nô o adiriture cun nô, e nissun nol sa dînus ni se o vin un autist inteligjent o criminâl o mat, ni là che e larà a finîle cheste coriere.
pre Antoni Beline