I CLASSICS. 20 (fin) – CUINTRISTORIE DAL FRIÛL La albe de nestre Patrie

Il taramot dal ‘76
Ai 6 di Mai dal ’76, a lis 9 e doi minûts sot sere, un taramot trement al à scjassât il Friûl massime su la prime linie des monts, si pues dî di Sacîl fint a Cividât. Glemone, Vençon, Osôf, Buie a son stadis disfatis, cence contâ i paisuts dulintor; Tarcint, Maian, Spilimberc, Tresesin, la Cjargne fracassâts. Un miâr i muarts, miârs i ferîts.
Tocje dî che l’ospedâl di Udin le à metude dute come che le àn metude dute tante altre int sorestants o no.
Altris, sicu il centenâr di miârs e plui di soldâts che a jerin in Friûl, stant a ce che a àn dite i gjenerâi, le àn metude un pôc mancul (a ‘nt varessin doprâts dîs mil.)
La int no si è metude a ciulâ o a criçâ a talian vie, ma e je restade suturne e cence lagrimis come che o fasìn simpri cuant che nus capite une disgrazie grande. I muarts a son stâts sapulîts cun tante dignitât, e i vîfs si son metûts a pensâ di justâ ce che al jere restât in pîts.
Cetante int furlane, taliane e todescje che a àn dade une man, un vistît, di mangjâ, un jutori a chei restâts dome cu lis mans. Nissun al pratindè cuissà ce tai prins doi mês; i furlans a protestarin cuintri il guvier regjonâl par vie des strassariis sul cont di scomençâ a justâ lis cjasis.
Ma in Avost e Setembar, cuant che si à viodût che i sorestants regjonâi no jerin bogns di mantignî ce che a vevin imprometût, al ven a stâi un lodar a ducj pal unvier, la int e pierdè la pazience fint a vosâ in muse al president dal guvier di Rome, che se no si moveve al jere miôr pensâ a la Austrie.
Cussì ai 13 di Setembar a lis 11 e 20 un altri taramot trement al finî di butâ jù ce che al jere restât. Ma il gnûf malan al veve vuardât i politics de rabie de int che e steve pierdint la pazience, e al veve butade jù la vore di centenârs di ex alpins fate cun afiet in tantis cjasis sdrondenadis.
Plui di un al à pensât che i furlans a vessin pierdût il coragjo di tornâ a scomençâ, massime cuant che dal 15 al 17 di Setembar e tocjà viodi cuasi dute la int de zone dal taramot a partî par lozâsi a Grau, a Lignan, a Bibion…tornarano? Cjaparano la valîs par cjatâ plui fortune pal mont?
Al passà un Atom e un Invier che nol lassave viodi sperance.
La Vierte e viodè a tornâ cuasi dute la int tai siei paîs, anzit tai siei borcs.
Cussì ca e là i soldâts o chei de Feuerwehr mucs o todescs a puedin jessi rivâts a dâ une man plui adore.
L’afiet pe lôr tiere nol veve bandonâts i furlans, che no molin il lôr Friûl par puar, plen di vueris e di taramots che al sedi.
Il furlan al reste tacât ae sô tiere, ma il taramot al à judade la int a sintîsi plui furlane: dopo il taramot il mont al à cognossût ancje i furlans, e nol è plui di sbassâ il cjâf a pandisi par furlans.
Il Friûl al tornarà a dreçâsi – o vin di sperâlu – :se 40.000 muarts furlans ta lis ultimis vueris, se plui di un milion di furlans stranfâts pal mont tal ultin secul no àn disfat il popul furlan, al è di jessi sigûrs che i plans dai urbaniscj e lis buzaris de politiche cui rudinaçs dal taramot no sapuliran il Friûl.
pre Josef Marchet e pre Checo Placerean