Sfuei Mensîl Furlan Indipendent
Archivi de Patrie

I CLASSICS – 18. SANT JACUM, LÀ CHE AL FINÌS IL MONT

............

La puare preiere di un puar predi
In cheste coralitât di personis e di pinsîrs, dal moment che o vevi simpri peât il pelegrinaç di Sant Jacum al mont dai muarts, il prin puest lu ai riservât a chê procession di int che e veve finît di strissinâsi fint a la fin dal mont, dal lôr mont e de lôr vite, e che e jere rivade fintremai ae eternitât. Se, come che mi contave mê none e i miei viei di Cjargne, chei che no vevin podût lâ di vîfs a vevin di lâ di muarts, o ai imagjinât come intun sium, durât un lamp, dute la int di Vençon e de Cjargne e di Visepente e i tancj amîs cognossûts di frut in sù tal at di rivâ a Sant Jacum, stracs di un viaç suplementâr dopo di jessisi scanâts tal viaç obleât, ben plui lunc e problematic, de vite. Ju ai viodûts a rivâ denant dal grant sant, in cheste zone di fin dal mont e di inizi de eternitât, spaurîts di tant sflandôr, inceâts di tante lûs, spierdûts in cheste catedrâl imense, sudizionôs come dute la int di paîs, pinsirôs e intrigâts come i puars cuant che a àn di lâ a rispuindi, che ur clopin lis gjambis ancje se a son in plene reson. Ma ce vevino di rispuindi chês musis ingrispidis, chês mans cun creturis come agârs e deformadis dai agns e dai dolôrs e che a vevin contât plui Avemariis che bêçs, chês schenis pletis prin da la ore sot il pês de cjame fisiche e morâl, chês gjambis che si jerin strissinadis fin la ultime dì par santescugne e par rivuart di passâ par mantignûts? Cualchi pecjât lu varan fat ancje lôr, ma Diu isal par tignînus di voli come un carabinîr o par capînus come un gjenitôr almancul lui? Isal cui puars e cui piçui o cuintri? Une volte mê mari e à fermât il plevan di Vençon, dopo messe, par preâlu di lâ a meti une buine peraule in ‘seminari par vie che no vevin cun ce paiâ. E il plevan di Vençon i à dit che il ‘seminari nol jere obleât a paiâ i siei vizis. Mê mari, ingropade, i à rispuindût che il so vizi al jere chel di jessi nassude sfortunade e di scugnî sclopâ di lavôr di un scûr a chel altri. Ma i puars àno dome di rispuindi, in chel altri mont, come in chest? No àno mai il moment di fâ domandis ancje lôr, a di Chel che al passe par just e sant, e che duncje al scuen vê un misurin alternatîf a chel dai oms come che al è alternatîf lui? Ce àno di rispuindi, dal moment che no àn domandât di nassi, si son cjatâts tal gjespâr de vite cui fastidis che ur corevin daûr come che a vessin vude une calamite, a àn dât ae societât civîl e ae glesie il sanc e la medole, par jessi tratâts di une bande e di chê altre cence agrât e cence creance? A contin di un ebreu de Europe orientâl che al faseve il sartôr e ogni tant si aprofitave par robâ cualchi cuarte di vilût o di tele. Plui cualchi altri pecjât morâl o legâl. Rivât in pont di muart, il rabin i à domandât se al jere pront a lâ a rispuindi denant di Jahvè. Lui al à dit che nol veve grancj fastidis, dal moment che nol veve propit grancj delits.
«O crôt che le varà plui dure lui a rispuindi, cuant che i domandarai parcè che al à robât i fîs a lis maris e lis maris ai fîs e nol à mot un dêt denant di dutis lis injustiziis e lis carognetâts e lis violencis e i delits che si fasevin tal mont, cuant che i puars a alçavin lis mans viers il cîl, berlant e domandant justizie cence vê mai ombre di rispueste». O soi sigûr che la tante int cognossude e compagnade pe ultime polse no à di vê vût grancj fastidis a rispuindi e salacor, usade come che e jere a cjapâ dut cun rassegnazion, no varà nancje fatis lis tantis domandis che e varès vût dirit. Par chel la contemplazion dai miei muarts denant Sant Jacum e je stade di grande consolazion, parcè che a rivavin preparâts e in credit. E dal sigûr Sant Jacum ur varà consegnât cence fastidis la cape, segnâl de vite e passepuart pe eternitât. Ma la religjon no je dome robe di muarts, se Diu al è un Diu dai vîs. Podevio alore lassâ a cjase la procession di int che ancjemò e baline e e scombat sun cheste tiere, tacant di chei che o ai plui dovês di solidarietât e di colegance, come la int dai paîs che o soi stât e o soi plevan, i viei, i malâts, i disperâts, la int cence sperance e cence prospetivis e progjets, la sdrume dai vecjos che a spietin cun masse gole la muart e il truput dai fruts che a spietin cun masse pôre di frontâ il pelegrinaç de vite, la nestre glesie furlane cussì sante te part plui vive dal popul e cussì sfortunade tai siei sorestants forescj o distrats o vendûts o cunins, la nestre tiere, cjanton dismenteât dal grant bearç di Diu? Naturalmentri o ai preât pai predis, che si sintin servidôrs dal nestri popul te sô realtât nude e crude e no parons e colonizadôrs in non di une religjon che no partìs di Diu e no puarte a Diu. O ai preât pai sorestants civîi, che tant ben a puedin fâ se a doprin cun cussience e competence la lôr autoritât e a puedin sassinânus se nus doprin nô pai lôr trafics inconfessabii.
Un puest particolâr, par chel che e pues valê la puare preiere di un puar predi, lu ai riservât ai furlans che a son rivâts fint al confin dal mont no par lâ a preâ un sant e po tornâ acjase, ma par vuadagnâsi un pan stentât e insigûr, cu la prospetive di no podê tornâ nancje di muarts a polsâ in chê tiere che ju veve parturîts. Se grande e je la epopee di Sant Jacum, no mancul grande e meritorie e je la epopee de nestre emigrazion, che di secui e à disfurnît di energjiis vivis e di fuarcis inteligjentis e creativis cjasis e borcs, par puartâ in altris tieris e popui il nestri inzegn, come che l’aiar de vierte al puarte lontan lis semencis des rosis e des plantis par bonificâ altris plantis e terens. O âfs furlanis, che no podês gjoldi de vuestre mîl! O uciei de Cjargne e dal Friûl, che no podês gjoldi il nît fat par chei altris!
pre Antoni Beline

L’EDITORIÂL / La multiculturalitât e valorize il grant e il piçul

Zuan Marc Sartôr
Belle époque. Un student di Gurize al viaze cul tren dilunc la Südbahn (la Ferade Meridionâl, di Viene a Triest). Al torne a cjase dopo agns di studi inte universitât de capitâl imperiâl. Al à frecuentât la preseade facoltât di fisiche, là che si davuelzin lis prestigjosis lezions dal professôr Jožef Štefan, il famôs fisic […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +