Sfuei Mensîl Furlan Indipendent
Archivi de Patrie

I CLASSICS. 15 – CUINTRISTORIE DAL FRIÛL La albe de nestre Patrie

............

La Guere dal 1915-18
Si jere dacuardi cui mucs e cui todescs e nol jere di spietâ che la Italie e gambiàs sunade; ma la storie – a cognossile ben – e dîs che al jere di spietâse. Ancje il sorestant talian Zuan Giolitti al cirive di salvâ la Italie de vuere, ma i patriots che a balinavin par Trent e par Triest a finirin cul sburtânus tal fûc de vuere, cul cjâf sglonfât di bufulis, ma cence ideis claris e conts sigûrs.
I furlans a forin ad ôr dal fûc e si lassarin cunvinci che ur tocjave murî par salvâ lis lôr cjasis. E pensâ che subit di là dal Judri altris furlans a restavin di parê indiferent e a murivin par tignî sù la Austrie. Epûr vonde pôcs di lôr si inacuarzerin che no si tratave dai nestris interès, ma di chei di chei altris.
Di insom la Cjargne fint ad ôr di Monfalcon al fo dut un maçalizi: undis bataiis dome sul Lusinç, centenârs di miârs di muarts par lâ indenant di cualchi metri.
I mucs a jerin in pôcs, parecjâts dome par difindisi. A tentarin une «straf –expedition» dal 1916 che no rivarin a fâ madressi, e une dal ’17 a Cjaurêt, che e spacà la front, ancje par vie che soldâts e uficiâi talians a jerin neris di murî dibant e di viodisi tratâts di cjans di Cadorne.
Al è un fat che la front taliane e à doprade la decimazion ancjemò plui che no i francês. Il piês al è stât che al fo dât ordin di scjampâ ancje dal Friûl ae puare int: ma parcè? A sun di dî che i mucs a jerin il boborosso, i sorestants a pierderin la lum.
Trope int ise lade jù pa la Italie di là de Plâf? A prin colp a diserin un 300.000, po a calcolarin sui 120.000, e il vescul Rossi al scjampâ cun lôr, bandonant la sô diocesi. Sigûr che nol veve il coragjo dal sfuei catolic, il «Corriere del Friuli», cuant che al publicà l’articul di coment a lis peraulis dal pape Benedet che al invidave a finîle e a tratâ di pâs  cence fruçâsi un cul altri: «inutile strage». Dut al finì cul justâsi par vie che il pape al improibì il gjornâl e i talians a assolverin i autôrs dal articul. Al è di imparâ che no si à di ubidî simpri, nancje al pape (1).
I mucs a jerin soldâts di bonfâ, plens di fam tant che scus: a robarin par mangjâ e a bevevin par dismenteâ. Lôr, catolics, a dispicjarin lis cjampanis par fâ canons: la nestre int no podeve capîju e no le dismenteà.
Cui cuatri di Novembar dal ’18, ancje la vuere e finì. La gjonde e fo grandone, ma i conts a jerin plui grancj:
– a mancjavin 25.000 furlans che a vevin lassade la scusse;
– il 90% des fabrichis a jerin fruçadis;
– miserie nere e disastris dapardut.
I monuments cu lis listonis di nons no paiavin i muarts, e nancje Trent e Triest no zovarin a tornâ a meti in pîts la culumie fruçade.
Ai furlans ur tocjave di tornâ a scomençâ e – viodêt ce destin – tornâ a cirî lavôr plui di une volte là di chei che ur vevin tirât in vuere.
La ete dal Fassisim
In Friûl il fassisim al rivà, come pardut in Italie, cu la prepotence, cul manganel, cul vueli di riç e la fonde des sociis dai combatents.
Culì chei de patrie a vevin chê dai monuments pai «caduti». Nol è paîs in Friûl che no lu vebi, cun listis di muarts di fâ vignî i sgrisui.
In Aquilee a faserin ancje la liturgjie dal «milite ignoto», par tignî sù la int che e veve vût muarts in cjase par vie de vuere.
I siôrs, in Friûl, parons de campagne plui buine, a capirin che l’afâr al deventave serio e si meterin cun Mussolin e dutune a tirarin fûr la patrie par sglonfâ la int cu lis busaris e tignîle sot cul manganel. Par lôr la Italie le vevin tradide a Versailles, e al coventave sacrificâsi par jê par fâle deventâ chê di une volte, come te ete dai Romans, rispietade e cul pît sul cuel di chei altris.
Ancje il pape si adatà, par vie che i semeave che al coventàs bati cuintri il comunisim, che al jere il gnûf «pericolo» par la religjon.
Al bandonà il partît popolâr dai catolics, che i tocjà in sorte vueli e manganel, e planchin al cumbinà cun Mussolin i «Patti Lateranensi» che al firmà l’11 di Fevrâr dal 1929.
Miôr di cussì!? Mussolin al veve risolte la cuistion romane e «dato Dio all’Italia e l’Italia a Dio».
I predis furlans cui lôr catolics a ubidirin. La vecje teolighe e restà un pôc vive te Azion Catoliche, che cul so «preghiera-azione-sacrificio» e cirive di no lassâ spotic il «credere-obbedire-combattere» dal fassisim.
Cualchi dispietut sal son fat, ma dopo dal 1932 si cjatarin dacuardi.
Ducj talians e catolics: il vescul di Udin Nuiâr al fo dacuardi e al improibì di doprâ il sloven ai predis de Slavanie, e da part sô la Filologjiche e cirì di restâ in vite cul fin di judâ la Italie a fâ deventâ talians ancje i furlans.
La crisi mondiâl dopo dal 1929 e sierà la migrazion, e la miserie e obleà i furlans a restâ a cjase e a contentâsi dal cjamput e de vacjute, saceantsi cul patriotisim. I paîs a sameavin plui ruspis e vecjos di simpri: si lavorave dome in cualchi strade, cualchi puint o cualchi brilie o bonifiche, al ven a stâi tai lavôrs dal guvier: par jentrâ al tocjave intindisi cul federâl fassist.
Cussì e rivà par fuarce la vuere de Abissinie, par fâ sperâ e tignî sù la int. Nancje lis «sanzioni» cuintri la Italie a fasevin inçopedâ il Duce, che al cjapà la Etiopie e al plantà l’Impero: robis che a finirin di sglonfâ il cjâf di ducj cul patriotisim. Ma di chê strade e nasseve une amicizie gnove cun Hitler e la Gjermanie, che si jere ancje metude a so mût su la strade di rifâsi.
Dutune si justà la cuistion molant la Austrie ae Gjermanie e pal Süd Tirol e pe nestre Kanaltal si obleà la int a sielzi di lâ in Gjermanie o restâ chenti par deventâ dome talians: dutune a baterin in Spagne, preparantsi a fruçâ France e Inghiltere par dividisi il mont.
I furlans a restarin incocalîts come i talians: a baterin ancje lôr in Abissinie, e in Spagne, e come chei altris ogni sabide la zoventût e leve a preparâsi a fâ la vuere tai «cors premilitârs». I fruts a deventarin «Balilas» cul «libro e moschetto», e a scuele i mestris ur jemplarin il cjâf di busaris patriotichis, stiçantju a crodisi miôr e i plui bulos dal mont.
I contraris, se a ‘nd jerin, no olsavin a vierzi il bec in Friûl, almancul in public.
Une dose di «oposizion» ancje al fassisim si pues cjatâle te barufe dai predis di Udin cuintri il vescul Anastasi Rossi che, scjampât tal an de invasion, al jere tornât fasint il talianon; al veve mandât «al confino» un par di predis dai mancul talians e fassiscj, al bateve il claut de ubidience fasint dut un tocjo di patrie e di religjon.
Cuasit ducj i predis a domandarin al pape di jessi diliberâts di Rossi e il pape ju contentà.
Un segnâl che propit dut nol jere ancjemò muart.
NOTIS:
(1) Il gjornâl catolic «Corriere del Friuli» al met sot acuse la vuere e par chest al ven sierât e i siei responsabii mandâts al confin.
CHECO PLACEREAN e JOSEF MARCHET

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +