Sfuei Mensîl Furlan Indipendent
Archivi de Patrie

I Alpins sono furlans o talians?

............

La seconde domenie di Mai a Pordenon e je rivade la Adunade dai Alpins: miârs di penis neris a àn fat viodi ancje chest an il spirt di un dai cuarps militârs che a son plui bogns di mostrâ trop che a contin lis lidrîs e la voie di judâ chei altris. Dut câs – dongje dal compit di “Sentinelis de Patrie” (chê taliane) – i alpins a àn ancje dispès un sclet amôr pe lôr tiere di divignince. “A son simpri di plui intes adunadis i fantats, soredut zovins, che a sfilin cu la maiute o cu la bandiere dal Friûl”, al conte Roberto Toffoletti, une istituzion dai alpins furlans, che al è stât a cjâf dai 14mil socis de Ana dal 1992 al 2005. Daspò vê fat la Scuele Militâr Alpine a Aoste e jessi stât assegnât ai Bataions Tumieç e Mondovì, tornat civîl si è subit dedicât ae Ana deventant, a 27 agns, cjâf grup di Udin Centri, fin a vuidâ i volontaris de Ana provinciâl par 14 agns.
Ma i nestris alpins sono plui “furlans” o “talians”? Toffoletti nol à dubis: “I alpins no àn motivazions politichis, ju ten dongje dome la esperience di vite che ju à fats cressi e che e rapresentave, prin che la jeve e fos abolide, une vere scuele di vite, di condivision di valôrs e di regulis che ti faseve deventâ om e e judave a jessi prin di dut citadins, ancjemò plui che soldâts. Mi visi ancjemò che il gno “Lo giuro” e je stade la prime volte in vite mê che o ai sintût il pês di une responsabilitât, il valôr di une sielte”. Un vêr alpin par Toffoletti si impense di chês dôs peraulis in ducj i moments impuartants de sô vite, te famee, tal lavôr e inte vite sociâl. “Ancje par chest la Ana e je in dì di vuê une des realtâts plui penzis e plui vivis a nivel di volontariât, parcè che il spirt alpin al nas de necessitât di judâsi l’un l’altri e di vê cussience che noaltris no sin mai di bessôi, ma o sin comunitât. E propit parcè che lis penis neris a son une vore atentis ai valôrs comuns, ogni tentatîf fat intai agns passâts di strumentalizâju in clâf politiche o partitiche nol è mai rivât a vê risultât”. Toffoletti al à organizade ancje la Adunade dal 1996 a Udin e in chê volte o vin vût culì int di dute Italie ma o vin rivât a pandi dute la nestre braùre di jessi furlans e ancje i miôr caratars de nestre int. E chest al è sucedût ancje cuant che la Julia e je tornade dal Mozambico e pal 50m aniversari de costituzion de Brigade.
Vuê i socis de Ana a calin parcè che i militârs di cariere no son plui cussì tancj come chei di jeve, ma chest par Toffoletti nol è un probleme. “La associazion e varès di lâ a cirî ducj chei che a àn fat il militâr e no si son iscrits. Su Facebook a son un grum i puescj dulà che la int si scambie ricuarts sul so periodi di jeve”, al dîs, e al conte che cheste bisugne di inlidrisâsi e coventarès ancje a tancj zovins che a crein grups come “Sei di Udine se…”, o alc di che fate. “Vuê i zovins a cirin chei esemplis di amôr pes lidrîs che nô o vevin ogni dì sot dai voi. E la esperience alpine, fate magari par trê mês, e coventarès ancjemò une vore a fâ capî il vêr valôr des robis”. Intun mont di bulos, vandai e delincuentuts simpri plui zovins, insome, “no crôt che doi o trê mês di naie a stiçaressin la reazion negative che e à puartât ae abolizion de jeve”. Une abolizion che vuê e puarte a un distac net dai alpins de Ana de vite militâr che si davuelç intes casermis ogni dì. “Vuê i militârs a fasin il lôr lavôr, a son sot contrat ma il tacament al Cuarp nol è di sigûr chel di une volte. E cence jessi masse nostalgjics, o podìn par sigûr dî che la braùre e il sens di apartignince ae “Comunitât Alpine” a jerin plui fuarts in chei che a àn fat l’alpin par un an che in chei che lu fasaran par dute la vite”. Chest ancje parcè che vuê il reclutament al pescje in zonis che no son chês dulà che tradizionalmentri i alpins a vevin la lôr tradizion plui fuarte: lis monts dal Nord de Italie e l’Abruç, soredut. Vuê a son tancj i “alpins di planure” e la lôr motivazion forsit no je tant la difese de Patrie ma pluitost la vere sfide e je la concuiste dal pagnut. ❚
Walter Tomada

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +