Une testemoneance scrite di Giovanni Battista Candotti nus dîs tant dai siei talents
Al è nassût a Mantue Francesco Comencini, ai 21 di Setembar dal 1729, e al è rivât a Udin che al jere un om madûr, a cuarantesîs agns, tal 1838, daspò vê otignût – midiant di un concors public – l’incaric di mestri di musiche dal Istitût filarmonic udinês. Al à ancje maridât, l’an dopo, la udinese Anna Maria Fortunato, e cun jê al à fat cuatri fîs.
◆ Francesco Comencini al jere pianist, organist, insegnant di cjant, compositôr, diretôr di orchestre, arpist, formât a Mantue indulà che prin di vignî in Friûl al jere organist titulâr de catedrâl di Sant Andree e al veve ancje fondât, cui musiciscj Campani e Bignami, une Societât filarmoniche in intese cu la Reâl Academie di Siencis e Arts.
◆ Tal 1854, daspò cutuardis agns di permanence e ativitât a Udin, al à vût di tornâ tal so paîs di nassite, par cuistions politichis, e si è cjatât mestri intune scuele privade.
◆ Su chest, e je ce tant interessante une letare dal predi organist e compositôr di Codroip, in fuarce a Cividât, Giovanni Battista Candotti, che al conte di lui in ocasion de sô partence, intune letare jessude su la riviste “L’Alchimista Friulano” dal 1854. Nô o voltìn par furlan il toc che nus interesse.
◆ «Cuindis agns che al à passâts inte provincie cjâf dal Friûl, tant che mestri dal Istitût filarmonic e organist de Metropolitane, a àn metût in plene lûs sedi la sô distinte abilitât musicâl che lis sôs dotis sociâls. Cognossidôr profont de biele art che al professe, puartât pal studi dai classics di dutis lis scuelis, sunadôr sovran dal re dai struments, al jere venerât di ducj in cheste provincie pe art musicâl li che si dilete. Afabil intal so jessi, gjubiâl inte sô conversazion, furnît di svariadis cognizions in tancj rams dal savê uman, al jere delizie di dutis lis societâts cultis, e al à acuisît fra nô no pôcs amîs di vêr cûr, e tra chescj no par ultin sigûr cui che al scrîf chestis riis. Tant che sedi i amîs che i amiradôrs a vain la sô partence come une sventure par ducj. Ma se al è pierdût par Udin, al è resurît par Mantue».
◆ La storie par fortune e à volût che nol fos pierdût pai furlans. Di fat, Francesco Comencini al torne a Udin tal 1864, dîs agns dopo, ricjapant l’incaric di diretôr de scuele musicâl furlane e restant li par dute la vite. Al è di fat muart a Udin ai 14 di Jugn dal 1864.
◆ Si conte che Comencini, che al jere stât mestri – forsit di arpe – di Jacopo Tomadini, coleghe e sucessôr di Candotti, al jere cetant amì de famee dai Nievo, di chel Ippolito che al à scrit dal Friûl che al jere “un piçul compendi dal univiers”.
◆ Di Comencini o vin doi biei ritrats: un fat dal pitôr furlan Fausto Antonioli, un altri, che o vin metût in foto, al è di Giuseppe Malignani, dal 1852. Sentât su la bancjute di un pianoforte, al ten in man une composizion di musiche sacre e tal fonts dal cuadri in piçul si viôt un orghin, e inte cantorie une serie di cjantôrs e musiciscj. Une biele sene par un musicist e compositôr di musiche sacre e profane di cjamare – diviersis sôs oparis a son conservadis tai archivis musicâi di Udin, Cividât e Palme – dute di cognossi e di aprofondî. ❚
