Sfuei Mensîl Furlan Indipendent
Archivi de Patrie

Grancj events sì, ma al vûl plui impegn par fâ jevâ il turisim intal Friûl de Alte

............

For di Avoltri al domande stesse dignitât
di finanziaments di chei altris pôi schiistics regjonâi

Al bateve un pôc ancje il cûr de mont furlane miercus ai 28 di Novembar a Tokyo, dulà che e je stade presentade pe prime volte al Comitât olimpic internazionâl la candidature di Milan e Cortine ai zûcs invernâi dal 2026. Su la taule e je di fat la propueste di For di Avoltri tant che sede dal Biathlon, puartade indenant ancje de Regjon. Dopo dal ritîr de neozelandese Calgary, a sfidâ i talians e je restade dome Stockholm, ma l’inseriment dal Friûl inte candidature taliane al reste une partide dute di zuiâ, magari sburtant su la lidrîs dolomitiche comune.
Dut câs, i cinc cerclis olimpics a cjataran cjase tal Friûl de Alte. Par cumò inte version “junior” dai Eyof, i zûcs olimpics invernâi de zoventût europeane (par fantats dai 9 ai 14 agns) che la edizion dal 2023 e je stade assegnade al Friûl-Vignesie Julie a Marbella (Spagne) ai 10 di Novembar stâts. Il curling al larà a Claut, snowboard, short track e patinaç artistic a Plan dal Cjaval, biathlon a For di Avoltri, fonts a Sapade, sul Çoncolan lis gnovis dissiplinis, o ben freestyle e skicross, a For Disore il schialpinisim, hockey a Pontebe e par finî Tarvis e Nevee cun dut il schi alpin, salt e cumbinade.
Ancjemò grancj avigniments sportîfs, duncje, intindûts tant che clâf pal rilanç de mont furlane. Une ricete sot atac di tantis bandis, al baste visâsi par esempli dal câs di Turin che nol à volût aleâsi cun Milan e Cortine pe candidature 2026, vint vinçût in consei comunâl la componente politiche dai 5 Stelle (e no dome) che e denunzie i coscj alts di chescj avigniments, no compensâts di vuadagns adeguâts.
Ma ce pensino i sindics furlans interessâts?
For di Avoltri al brame lis Olimpiadis, ma al è tant ce fâ!
«Al è clâr che fâ i zûcs olimpics ca al darès un vuadagn enormi dal pont di viste de imagjin turistiche – e rimarche la sindiche di For di Avoltri, Clara Vidale –. E je une concorence fuarte, ma o sin convints di vê lis nestris cjartis di zuiâ, tant che il fat che ca a son nassûts diviers campions. Chel des Olimpiadis nol è dome che un sium, ma un domandâ par otignî pardabon. O vin ancje la fortune di vê la presince di Bella Italia a Plans di Luce, cun plui di mil puescj jet, che e podarès sodisfâ lis esigjencis dal event, in plui che naturalmentri il centri biathlon, ricognossût tant che une zoie ancje de Federazion taliane sports invernâi. Un grant sfuarç di volontariât de bande di tantis associazions al à fat in mût che il centri biathlon al tornàs a partî inte maniere miôr dopo des aluvions resintis».
Ma nol è dut aur chel che al slusiche, cualchi probleme al è. «La Regjon e à di crodi in nô – e sclarìs Vidale –, prin di dut metint il centri biathlon intal circuit Promotur. Al è un invistiment che al podarès puartâ une tornade di imagjin a dut il Friûl-Vignesie Julie. Cumò il nestri centri sportîf si base tant sul volontariât. Se invezit al fos tratât tal stes mût di chei altris centris sportîfs furlans invernâi che a son dentri intal circuit Promotur al sarès un biel salt di cualitât. Il probleme economic al è tant pesant, sedi pe manutenzion sedi par une revision complessive dal centri biathlon, che al scomence a sintî il pês dai agns. Chest al vâl ancje in relazion ai Eyof 2023». Cun di plui, al è di fâ in maniere che l’event sportîf al puedi deventâ pardabon une clâf di disvilup pe economie di chest piçul comun a vocazion turistiche (baste pensâ aes perlis alpinis dal Colians e dal lât di Volaie). «Si à di rinfuarçâ lis struturis alberghieris dal paîs, lis ocasions di lavôr e di cressite economiche cul indot dal sport – e sosten la sindiche –. La Regjon e varès di creâ, in viste dal 2023 e dal 2026, struments di invistiment e di incentîf par incoragjâ lis personis a invistî intal setôr turistic. Lu vin domandât plui voltis, ancje ae Uti de Cjargne. Si à di crodi a di cheste pussibilitât, o la mont e je destinade a murî. In plui, lis ultimis calamitâts naturâls no fasin altri che meti intal anim des personis la voie di lâ vie parcè che i discomuts, soredut intes comunicazions, a son tant grancj. La nestre int e je daûr a patî une situazion une vore grave di disservizi».
Pontebe i crôt: «Ocasion par miorâ il paîs»
Intai zûcs olimpics de zoventût europeane al sarà cjapât dentri ancje il comun di Pontebe cul palaç de glace, dulà che si davuelzaran lis garis di hockey. «Si visìn ancjemò de biele esperience des Universiadis dal 2003 – al rimarche il sindic Ivan Buzzi – che purpûr nus àn permetût di ampliâ il palaç de glace e di cressi lis dotazions. Dutis struturis che a vegnin dopradis tant ancje vuê. Chel che di gnûf chest event al pues puartâ, al è un ampliament dai puescj jet. Il palaç de glace al podarès jessi doprât ancjemò miôr se o disponessin di struturis che a fasin di forestarie. Al è l’interès fuart di diviersis scuadris di hockey su glace di vignî a Pontebe in ritîr invernâl o estîf. O speri, cul event Eyof dal 2023, di cjatâ lis risorsis par comedâ une struture alberghiere dongje dal palaç de glace, aromai sierade di 5-6 agns. O sai che ancje altris Comuns interessâts dai Eyof a àn il stes probleme».
I zûcs a jentrin ancje in mût virtuôs intun procès di miorament dal paîs previodût de leç regjonâl 14 dal 2018, che e à “compensât” Pontebe pal tramont dal progjet dal implant di assension par Pramuel, cul disvilup alberghîr conetût: «O vin un finanziament di 2 milions di euros par sdrumâ lis casermis dismetudis par un totâl di une desene di etars, e dopo 15 etars di stazion feroviarie dismetude – al sclarìs Buzzi –. O vin ancje za presentât ae Regjon un plan di fatibilitât par 11,5 milions di euros par une serie di intervents di recupar, tant che ripuartâ a vert furnît lis areis feroviariis dismetudis, completâ la piste di fonts, la aree wellness dal palaç de glace, par creâ un centri anzians comprensoriâl ristruturant une scuele dismetude, e par creâ un museu storic citadin. Dutis oparis che a jentrin ben intun troi di disvilup turistic, pensât de int midiant di taulis tematichis». ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +