Furlan a scuele a risi par colpe de burocrazie

Tantis voltis al fâs comut dâ lis robis par scontadis, ancje se al è pôc timp che lis vin concuistadis. Par esempli, i furlans a dan aromai par scontât il dirit dai lôr fruts a podê sielzi l’insegnament de marilenghe inte scuele. Une volte al jere un sium, ma al è deventât realtât cu la aprovazion de leç 29 dal 2007: di bot, però, fra cualchi setemane i furlans a podaressin sveâsi cence il furlan a scuele, parcè che il dirit che no si è rivât a dineâ in gracie de leç cumò al riscje di jessi dineât cu la burocrazie.
La situazion, par cui che no le cognòs, e je cheste: daûr de leç, ogni scuele de zone de regjon di fevele furlane e à di ativâ chest insegnament, se lis fameis lu domandin. Il 70% lu fâs. Chest al à un cost (che si cuantifiche daûr des domandis che a rivin di ogni istitût), ma i finanziaments a son simpri rivâts cun setemanis (o mês) di ritart a pet de partence dal an, obleant simpri lis scuelis a un “tour de force” inte programazion che al domandave di tacâ lis lezions ancjemò prin di vê i bêçs o di concentrâlis dutis ae fin dal an, cul pericul di çoncjâ lis ativitâts e di no sigurâ ad implen un dirit ai fruts e aes lôr fameis.
Chest an, però, la situazion e je plui grivie di simpri. La gnove aministrazion regjonâl e varès di fat decidût (o doprìn il condizionâl parcè che no je olme di deliberazion in chel sens) di riviodi i criteris di ripart su la tutele de lenghe furlane e in spiete di fâlu e à prorogade “sine die” la assegnazion dai riparts pal insegnament dal furlan a scuele. De cuistion e varès di ocupâsi la Comission permanente pal insegnament dal furlan che e je stade in part rinovade, ma no ven ancjemò convocade. In spiete di gnovis, lis scuelis no san se lis spesis par furlan a son cuviertis, ni par chest an (dulà che i bêçs a son za stâts stanziâts, ma no je licence di spindiju) ni pai agns a vignî.
La consecuence cuale ise? Che intant, cence savê ni se i bêçs a rivaran o no, ni trops che a saran, i dirigjents chest an a podaressin fâ saltâ l’insegnament dal furlan e nissun al podarès dâur tuart. Se a cambiassin i criteris e no fos plui cuvierture finanziarie adeguade, lis scuelis no podaressin plui fâ la programazion (che cumò e je trienâl) e duncje il furlan al saltarès ancje pai 3 agns seguitîfs.
La aprovazion dai Ptof (Plans trienâi de ufierte formative) e va fate prin de scjadince des iscrizions, ven a stâi a Zenâr. O contìn che par in chê volte la situazion e sedi risolte, che la Comission si dedi dongje e che e aprovi criteris che a permetin di insegnâ il furlan come che al è stât fin cumò e ancjemò miôr. Se nol ves di jessi cussì, ducj i furlans a savaran che i lôr sorestants – simpri a pro dal furlan in ogni campagne eletorâl – a àn violadis intune volte dôs leçs, une statâl e une regjonâl. E ocjo! A metin a risi un patrimoni di risorsis e di esperience che tai ultins agns si è consolidât e insiorât intune comunitât di insegnament inzornade e inovative. Al sarès un pecjât mortâl. E al sarès inutil pintîsi cuant che al sarà masse tart.❚
Walter Tomada