A vignaran finanziâts progjets di inclusion
che a sburtin al cambiament. Il president Morandini: “La peraule di ordin: sperimentâ!”
L a Fondazione Friuli e à presentât il gnûf Bant pal Benstâ sociâl, che ancje chest an al met a disposizion 600 mil euros par progjets sul cussì clamât “welfare” di comunitât e pe poie aes fameis impegnadis inte cure di minôrs, anzians e disabii. I progjets, de durade massime di un an, a podaran jessi presentâts di sogjets des provinciis di Udin e Pordenon, cuntune impostazion gnove di aleance tra public e privât e tra profit e no profit. Lis domandis a varan di jessi fatis dentri dai 29 di Fevrâr. Il bant si zove de colaborazion de aministrazion regjonâl e de poie di Intesa Sanpaolo.
◆ “Dal inviament di chest Bant indenant, aromai vot agns indaûr, la peraule di ordin e je stade simpri: sperimentâ!” al à declarât il president de Fondazione Friuli Giuseppe Morandini. “Di fat, dome cu la sperimentazion si pues imagjinâ di cjatâ soluzions a problemis complès e intal interès gjenerâl – al è lât indenant -. Intune cu la Regjon e cun Intesa Sanpaolo, al è stât pussibil sostignî ativitâts che a àn pontât sul inseriment e su la inclusion midiant di sport, lavôr e scuele, o par indotâsi di tecnologjichis inovativis, o a pandi l’ûs di modui di confuart pes fameis. Cun di plui, la sperimentazion e à permetût di invistî ancje su la prevenzion e l’esempli dal progjet ‘Anziani in Movimento’ nus fâs braurôs pai risultâts che al è daûr a puartâ. Cumò, cun chest gnûf Bant, la nestre poie e va indenant par che lis sperimentazions di sucès, come che al è za daûr a sucedi, si tradusin in buinis pratichis consolidadis par miorâ in maniere continue la cualitât de vite des nestris comunitâts”.
◆ Chest cuadri al è supuartât ancje dai risultâts finâi de ricercje trienâl davuelte dal istitût Jacques Maritain sui impats e sui cambiaments puartâts de Fondazione Friuli midiant dai finanziaments dal Bant sul benstâ sociâl.
◆ “I progjets sostignûts dal 2020 al 2022 a son stâts indreçâts viers i familiârs assistents di famee e intal trieni il numar di beneficiaris al è passât di 110 a 230 par ogni progjet – al à sclarît il consulent sientific Luca Bianchi -. Ancje la partecipazion dai volontaris e je cressude: in medie a son stâts 11 intal 2020 e 15 dal 2022”.
◆ Un altri element che al caraterize il bant de Fondazione Friuli al è il fat che nol à coventât dome par dâ fûr servizis in maniere direte, ma ancje par creâ chel ecosisteme fondamentâl par difindi e valorizâ il benstâ sociâl di comunitât.
◆ “I intervents finanziâts no si son limitâts dome a une erogazion di prestazions e di servizis che a tocjin la poie e la assistence aes personis fragjilis – al marche Bianchi – ma a àn ancje smicjât, là che si rive, al potenziament personâl intune otiche di inclusion sociâl. La percentuâl di progjets che a àn cjapât dentri ativitâts formativis e je cressude vie pal trieni, passant di un za bon 50% dal 2020 al 60% dal 2022. Tant che consecuence, intai progjets che a àn previodût chest gjenar di ativitâts formativis, o vin notât un numar simpri plui alt di chei che a àn gjenerât une incressite di competencis pes fassis vulnerabilis, rivant al 85% dai intervents. Un altri obietîf tocjât al è stât chel dal aument de percentuâl di progjets che a àn gjenerât oportunitâts di ocupazion pes fassis vulnerabilis, il 67% intal 2022”.
◆ “La inclusion, la riduzion des disparitâts e il benstâ des personis a son il cûr de nestre identitât, che no je dome chê di une bancje, ma ancje di une istituzion al servizi de coletivitât – e à marcât Francesca Nieddu, diretore regjonâl Venit Est e Friûl-Vignesie Julie di Intesa Sanpaolo -. Al è par chest che o confermìn la nestre poie ae Fondazione Friuli, che e à un rûl fondamentâl pal teritori. Favorint une sinergjie stabile tra public e privât e valorizant progjets di cualitât, e à puartât in miôr la cualitât de vite di tantis personis in cundizions di fragjilitât”.
◆ “O soi pardabon interessât ai risultâts dal Bant pal benstâ sociâl 2024 de Fondazione Friuli – al à dit intes conclusions de presentazion l’assessôr regjonâl ae Salût Riccardo Riccardi -. Chest progjet nol à dome slargjât in maniere significative il so rai di azion, tocjant un numar plui grant di beneficiaris, ma al à fat inovazion ancje intal mût di frontâ il benstâ sociâl di comunitât, pontant sul potenziament personâl e su la inclusion sociâl. La Fondazione Friuli e à dimostrât in concret cemût che une impostazion inovative e cooperative no dome e pues rispuindi aes dibisugnis imediadis des personis, ma e rive ancje a meti jù lis fondis par un avignî plui just e inclusîf. Cheste impostazion di lavôr e rapresente un model par altris iniziativis regjonâls e talianis, dimostrant che il vêr cambiament al rive cuant che lis istituzions a lavorin intune pal benstâ di ducj. La esperience dal Bant pal benstâ sociâl de Fondazione Friuli, duncje, e je une testemoneance di trop che cheste colaborazion e pues miorâ la vite des fameis. La Regjon Friûl-Vignesie Julie e je braurose di supuartâ progjets come chest, che a promovin un benstâ sociâl comunitari, a son atents aes dibisugnis dal teritori a son in stât di rispuindi cun eficacitât aes sfidis di vuê”. ❚
