GNOVIS IN CURT. Cunvigne numar 90 pe Societât Filologjiche Furlane

E je siore di apontaments la zornade che e viôt la scree dal 90m congrès de Societât Filologjiche Furlane a Voleson (PN). Ai 29 di Setembar di fat  inte biele suaze de citadine medievâl e sarà la ocasion par un incuintri dai socis, ma no dome.
Il program al previôt di cjatâsi inte matine aes 9.00 li dal municipi di Voleson e subit dopo di cjapâ part ae Sante Messe, che e vignarà celebrade par furlan li dal Domo.
Aes 10.30 al sarà il moment dal corteu par rivâ aes 11.00 li dal Auditorium des scuelis mediis “Erasmo da Valvason” pe scree dai lavôrs.
Si vierzarà cuntun benvignût di bande dal “Coretto Alpini e Amici” e cu lis musichis di Paolo Forte e subit dopo cui salûts des autoritâts. Po dopo e sarà la cerimonie pe XVI edizion dal Premi “Andreina e Luigi Ciceri”. Il dut si sierarà cuntun altri moment musicâl.
Aes 13.00 si larà li dal Centri parochiâl pal gustâ dai Socis e aes 15.00 si podarà gjoldi di une visite vuidade tal biel cjistiel medievâl te place dal paîs e scoltâ musiche corâl in diviers ponts di Voleson.
Aes 17.30 di gnûf li dal Domo par scoltâ un conciert di orghin cun Marco Rossi e la vôs di Laura Antonaz su lis musichis di Lazaro Girolamo Valvasensi.
La zornade si sierarà in place Libertât cu la esibizion dai tamburins e dai sbandieradôrs.
Par gustâ cun plats fat di pueste pe ocasion si pues notâsi li de Societât dentri dai 20 di Setembar, il cost al sarà di 25 € par persone.
Il 90m Congrès de Societât Filologjiche Furlane si inserìs inte suaze dai festezaments di “Medioevo a Valvasone” che si tignarà ai 13, 14 e 15 di Setembar, manifestazion che chest an e je rivade ae 21e edizion. ❚
✒ V.D.