ATUALITÂT. Gnove edizion pal «Siôr Santul» di pre Toni Beline

Ai 30 di avost a San Denêl, in ocasion de IV edizion de Fieste Ladine (viôt la fotogallery a pagj. 26, ndr), e je stade organizade une academie in ricuart e in onôr di pre Antoni Beline. Pe ocasion al è stât presentât il libri Siôr Santul, che pre Antoni al veve publicât te golaine Cjargnei cence dius ancjemò tal 1976, a pene prime dal taramot. Un libri golôs, esaurît in pôc timp, tant che dopo cualchi an e je stade stampade une gnove edizion buride fûr di La Nuova Base, tal 1983. Di gnûf esaurît, dopo 25 agns Glesie Furlane lu à presentât in tierce edizion.
Il test al è stât metût te grafie uficiâl rispietant però ancje l’autôr tal so scrivi cjargnel di chei agns. O vin zontadis fotos dai timps di siôr Santul che a mostrin l’ambient dal protagonist. Lis fotos nus es à furnidis cun tante cortesie e gjentilece dal so archivi il Circul Culturâl “La Dalbide” di Çurçuvint, che nô o ringraziìn pe disponibilitât furnide.
Siôr Santul: si trate di pagjinis splendidis che a mostrin dute la vivacitât e scletece, la passion pe int e une certe distance de curie che si le cjate tal protagonist, ma che e je ancje dal autôr. Sì parcè che pre Antoni al presente Siôr Santul, ma si cjatin dentri tancj elements autobiografics.
Lis ideis che a trasparin in cheste publicazion a son ideis che pre Antoni al puarte indenant cuntune coerence e une linearitât straordenariis par dut il so ministeri. Za tai prins agns di predi al à intuizions e inluminazions che cence nissune esitazion o dubi di sorte lu compagnaran par dute la sô vite di om, predi, mestri, scritôr.
I agns di plevan in Cjargne a son stâts i agns des sôs sieltis decisivis e definitivis. Come che al dîs intune Olme, rivât a Rualp e Val e Treli «… O soi tornât a nassi, bandonant struture, erudizion, programs preconfezionâts, ogni sience e fuarce clericâl, par fâmi ultin cui ultins e spartî lis lôr ricjecis e i lôr limits, che no jerin “secundum ordinem Melchisedek”. Par capî e jessi capît, par cressi e par judâ a cressi. E si pues tacâ cheste aventure dome se si jentre a contat di anime, in plene gratuitât e disponibilitât»
(Olmis vol. 2 pagj. 9).
Roman Michelotti